HO SI, HO SI LO, CHAKAI KAN LEI A

Hmanah Sialsuk Tlangdung Chakaia eizawngte eizawn dan leh an chakai humhalh dan leh an Aiawt chiah leh en dan te kha Zonet-ah an rawn tichhuak a, a ṭha ka ti a. Chakai  hralh tur an sawngbawl vel dan kha a thianghlim a, a len leh tet thuah pawh a bawma an dah kha a fair ngawt mai. Chakai, chengkhat thir tiat (a aia lian hret pawh a ni hlawm) aiawta a tlak chuan an chhuah leh zel - a chhan chu a len deuh huna man atana an duhna leh Chakai an humhalhna chi khat a ni. 

Aiawt hi ka chiah tam ve tawh a, a nuam ka ti hle ṭhin a. Awt chhunga lo tla tawh hi chu "A nu englo dam" rual lek a nih loh chuan Ai-ipah ka khung hmak ṭhin. Sialsuk tlangdung khuate chakai zawrh hi chu "chakai awrizinal" ka ti mai a, ka hlut em em ṭhin. Sialsuk tlangdung khuate chakai pack dan ang ni lo, hnang tah chhunga an hnawh emaw an ṭingmita an khai bawr ang chi emaw hi ka chhungten an rawn lei chuan "chakai daplikeit a ni maw, tinge in rawn lei" tiin ka ei chak lo hle ṭhin. 

Sialsuk tlangdung chakai awrizinal ngat ei chu a tui bik a, chuti ang chakai awrizinal pack chu Rs. 250/- ten kan lei ṭhin a, a manhla ṭhin hle. Lei pawh a inchhirawm lo hle.

Mahse, Tuivawl chengkawl ni lo chiang bal, "Tuivawl chengkawl a ni" tia zuarte Sihfa anṭam ni der lo, an hralh theih nana Sihfa anṭam hming chhala zuarte an awm ang bawk hian heti anga Sialsuk tlangdung chakai anga pack, chakai daplicate hi a lo awm ve tho a nih dawn hi. 

Nikir thla, ni ruk ni, kum sang hnih sawm hnih, hripui avang inkharkhip ṭum 5 na a ni 6na, zinga ka chhungten chakai an lo lei chu ka en a, "E, Sialsuk tlangdung chakai in lo lei a ni maw, ava tui dawn ve aw" ka ti a. Chu Chakai pack dan chu a en chiang lo tan chuan Sialsuk tlangdung chakai pack a ang hle. Mahse kan en chiang a, Sialsuk tlangdung chakai pack dan ang ve tak, changel kawr leh hnang hlai deuha hlai a them dawh a pack, a pack-na bur sei lam inches 20 (feet 1 leh inchees 8 a sei) a ni a, tah chuan chakai chu an rem ṭhat a, an pack chu bucket-ah kan han phelh darh a. Kawi tia lenglawng pakhat leh a dang te ber phei chu Sialsuk tlangdung lama miten an man, an chhuah leh tak ang tia lek lek leh a tlei ve hret 2/3 lai niin a vaiin 9 an ni. 

Kan colony-ah chungkaw 3 in kan lei vek a, "Nangni in chakai lei kha eng nge a an?" tiin kan inzawt hlawm a. He chakai kan lei em hi zawng, kan lung a awi mawlh lo e, kan lei tawh a, ei a ngai tho dawn a nih hi. (He thu in chhiar meuh chuan chakai hi kan ei tawh mai thei, eng khaw chakai nge kan lei tih bak, a zuartu hi tunge kan hre tawh si lo) Sialsuk tlangdung chakai nia sawi a nih avangin an rawn lei a ni. Mahse kan han phelh chuan chakai sikhaw te te 8/9 te chu Rs 250/- in kan lei hlawm a nih chu. 

A pack-na sei lam hi feet 2 leh inch 8 a sei a ni a, chumi tluana kar awl lang miah loa chakai 9 an rem khat ṭhat thiam kha an va han technician tehlul em! In rilru mitthlain han thlir chhin ve teh u. A lo berah chakai lian kawi tiat vel chhah zawng hi inches 1 a chhah ni ang ta se. Feet 20 a sei hmawlhah han ram khawm tlar chhin ve mah teh u! A kawmkawraw lang zawng pawh ni lo, a bawpui lang zawng vek leh nghal! 

Kan lei hi a tam ber a, 9 a ni a, kan ṭhenawmte lei chu 8 ve ve a ni. Thlalak a mi ang hian no 1 hi ka ta a ni a, no 2 leh 4 hi kan in hnuaite ta ve ve a ni. No.3 hi a pack-na a ni. Kan phelh hma-a a in pack lai ṭheuh thla ka lo la lo kha a pawi ngawt mai! 

Heti ang hi Sialsuk tlang dunga Chakaia eizawngte zawrh a nih ka rin loh nen le. 

Kan leina nuin a lakna khua a sawi pawh ka hre ran mai a, tu tih chu ka hre lo, mikhual/ veng dang mi a ni. Sialsuk tlangdung ta ang nia chala chakai an lo zawrh chuan chik viau ang che u. Chuti lo chu kei ni ang hian pisil sikhaw te te i lei ve palh ang e! 

Hri len lai a ni a, hmanni lawkah social media-ah 'Sairil rah ei chakai' ei a hlauhawm thu an sawi lar em em a, mi tam takten chakai ei an hreh ruk deuh laiin, hri avanga chawhmeh van lai ni bawk nen miten sum an mamawh lai a nih hi tiin a zuartu ṭanpui nan chakai hi kan lei ve chu a nia. 

Inkharkhip lai a ni a, chakai te pawh an inkharkhip ve avangin an chhuak lo a, a man an har viau ang. Chakai LTF te thu awi lo zual vak chhuak an man emaw ni dawn ni. He ti taka chakai a chhiat a, a to em em ni! 

Ka han sawi chhan chu, mi tute pawh hian rinawmna i nunpui ṭheuh ang u, tih hi a ni.