Sawrkar hnathawk transfer chungchang hi

Kan hotupa pakhat hi a hnathawhna lam­ah kai sangin thing­tlang hmun cheng­ker zawkah a thawk ta a. A hna thar zawma hun eng emaw chen a han awm hnu chuan lo hawin titi-na hun remchang kan nei a. A thawhna hmuna miten an mamawh dan te, hnathawktu hmasain kahpah taka a thawh avanga a vil hneh lohzia te leh hna a ngahzia a sawi a. A thawhna pisaa kaite bakah a awmna khua leh a bial chhung mite pawhin amahah beiseina sang tak nei chungin lawmthu an hrilh hial a ni. 

Sawrkhar hna­thawk tam tak hi sawn an ni ṭhin a, hei hi dan hnuaia tih vek a nih avangin sawisel ngawt theih a ni lo. Sawrkhar mi chhawr (Govt. servant) an nih miau avangin an hna an thawk zel duh a nih chuan a chhawrtu, hlawh petuin awm tura a tihna hmunah chuan i-he lovin an awm mai tur a ni; a bak a awm lo. Sawrkhar hnathawk ṭhenkhat chuan sawn an nih lohna turin phungbawm an sawm thiam viau a, zak thei lo taka tu tute emaw nawrin an hlawhtling ve leh mai ṭhin a ni awm e. 

Kawng lehlamah chuan kan ngainat zawng, sawrkhar hna­thawk fel deuh, thawk ṭha deuh, kohhran leh khawtlangin kan lo chhawr sil deuh tawhte chu kan keipui sa hauh leh deuh ṭung ṭhin a. A chang phei chuan thuneitute ruahmanna sawh sawn tumin khawtlang hruaitute kan vir buai a; hlawh petu emaw kan nih tih hial turin kan che leh vak mai ṭhin. Hetiang thawm hi hriat tur a awm leh zeuh zeuh a, tih chi viauin ka hre lo. 

Hna thawktu tha chu khawi hmunah pawh kan duh vek, doctor te chenin. Thawktu indaih lo leh a aiawh tur ruahman lawk pawh an awm si lo a nih chuan kan lo ṭang mar ta deuh a nih pawhin kan thiam­awm thovah ka ngai. 

A bikin zirna in ṭhenkhat phei hi chu Headmaster kai tharte enchhinna hmun emaw tih mai turin head­­master nghet pawh rei an nei hman lo, buaithlak ve tak a ni. Engpawh nise sawrkhar hnathawk transfer hi a chhawrtu sawrkhar thu thu a ni a; mipui kan lo inrawlh chiam hi a fuh ber lo. Amaherawhchu, khaw­tlangin kan ma­mawh ngawih ngawih lai, a thlaktu tur ruahman lawk pawh ni si lova an han chhuak leh daih mai ṭhin hi chu a thinrim­thlak ve bawk si. Kan aiawha rorel tura kan thlante hian a thlangtu mipuite mitmei veng chungin leh kan mamawhnate hrethiam chungin rua­hmanna siam ṭhin se a duhawm ber mai e. 

- R.Lalfakawma, Seling