Ram leh hnam humhalhtu turte

Central YMA chuan ram leh hnam humhalh kum a puang dup dup a, anni hi ram leh hnam humhalh tura kan chhuanvawr an nih laiin ramri a buai lai khan na takin an dem mai mai a. Kuhva smuggling pawh Sihhmuia check gate siamah an duh tawk hle niin a lang a, an lung a awi leh ta tho a ni.

CAB an do dan lah kha a tawpah khan an inbe rem leh ta vel mai mai a, kan ram leh hnam humhalhtu tura kan chhuanvawrte kal dan hi hriatthiam a har hle mai a, a nihna takah chuan a mak tial tial zawk a ni.

Ram leh hnam humhalh ṭulna ber pakhat kawngpui siam danah PWD nen MoU an han ziak nawn leh ta bawk a. Congress sorkar laia CYMA leh PWD MoU awm sa khan awmzia a neih lohzia chu kan kawngpui dinhmunah khan kan hmu mai awm e.

Tuna MoU thar hi kuhva check gate Ṭiau kamah ni lo Sihhmuiah an pawm theih avang hian kawng chhe deuh pawh kan en liam leh dawn ta nia rinhlelhna nen kan en ta hi ka lung a awi thei lo a ni.

CYMA hi pawl chak leh pawl thianghlim, Mizoram tana ṭha ber duhtu mihring awm khawmna a nih loh hi ka la ring phal miah lo a. Tumahin politics kailawn atan an hman duh pawh ka la ring phal lo.

CYMA hruaitu nih vangin contract, supply leh hna hrang hrang thawhna atan an nihna hi an hman phal pawh ka la ring bawk lo. He pawl hian Mizoram ram leh hnam hi han humhalh mawlh teh se, anni lo hi chu innghahna kan nei chuang lo.

CYMA hian rin a hlawh loh tial tial laia hruaitute an hausa tawh tih ṭawngkamte hi chu mi phunchiar falte phunchiar thil mai mai angah lo dah ta mai ila. Phun phun hian awmzia a nei lo a, a sawt loh hun a thlen erawh chuan kan CYMA zahawmna leh rinawmna hi tute emaw hruaitu khel hian an pet liam mai ang tih hlauhna hian kan khur ru der der thung a ni.

CYMA hi chu kan la zah reng a, sawiselna leh dodal­na karah pawh anni lo hi chu ram leh hnam humhalhtu tur kan neih loh avangin an hruaitu ṭhenkhat leh Minister tute emaw inkawm hnai lutuk tihte pawh hi mi phun ri mai mai ni se.

CYMA chu pawl thianghlim leh politics lama tih bik nei lo ni zel se, kan ram leh kan hnam hi min humhalh sak zel rawh se.

- C Lalrindika