Kan Ramin Eng Nge A Mamawh?

Mamawh hi chi hrang hrang kan nei ṭheuh awm e, chhungkua angah te, mimal leh khua, veng angah te mamawh leh ṭul chu kan nei ṭheuh a. Hengte hi a ngaihtuahtu bik deuhte kan nei ṭhin. Chhungkaw nu leh pate'n inchhung mamawh chu an ngaihtuah ṭhin a, khawtlang leh khuate chu hruaitute'n an ngaihtuah ṭhin. A ngaihtuahtute an fel a, an ṭhat chuan inchhungkhur a phuisui a, a nuam a, khawtlang leh khuate pawh a changkang ṭhin. An ṭhat loh erawh chuan inchhung a tlabal a, ram, khuate pawh a hnufualin rethei hle ṭhin. Miṭhalo tak te pawh hi ram hruaitu, khawtlang hotu anni ve thei a, engtin nge an lo nih theih tih lam erawh chu zawhna chhan har tak a ni ve mai thei.Aw le, kan thupui han sawi tura ka tih hi a huphurhawm ang reng viau a, mahse, engtin tin emaw kan ti ang a, awmze neiin kan chhuah thei em ang chu maw? I'n lo chhunzawm zel dawn teh ang.

Ram Dinhmun – Kan ram dinhmun dik tak hi eng nge maw ni le, kan ṭha viau a lawm maw le, kan ti mai thei, i'n lo sawi dawn teh ang. Tlangram chhengchhe tak a ni a, mahse, ruahtui a dawng ṭha hle. Chuvang chuan thlai ilo, engkim mai tih theih deuhthaw chu a ṭha duh em em a ni. Hetiang a nih lai hian buh leh balah chuan thla thum ei vel bawr chauh kan thar, thlai tharte pawh hi kan chawkluh a ṭhahnem hle. Leilung hausakna engmah haichhuah a awm lo a, gas, oil, etc., te kan chawkluh vek a ni. Mipui tam zawkte hi loneiha eizawng kan ni a, kan ram economy la ni ta reng chu sawrkar hnathawk te an ni. Kawlphetha hi kan thar ve nual ta a, tui tam laiin 60MW dawn lai te kan thar ve a, lawmawm hle mai. Industry, factory, company, etc., lian tham eng mah a la awm lo va, chhiah (Tax) lut pawh a tam thei lo. Chuvang chuan, sawrkar pawh a rethei hle. Central aṭang hian sum tam tak a lo kal ṭhin a, mahse, kan ram hruaitu fel tak takte hian vawiin thlengin kan dinhmun ngai – chawmhlawm state, nih hi min la pelhpui hleithei lo a ni ber mai.

Mi Dik A Mamawh – Kan ramin eng nge a mamawh tih chu ti hian lo chhang ta ila - mi dik a mamawh. Mi dik chu tu ber hi nge ni ang le? A nih loh leh mi diklo chu tu hi nge ni le? Kan zavai mai hian min mamawh a, mahse, mi dik chu kan ni vek thei dawn si lo a. Aw le, kan awmna hmun ṭheuh aṭangin hetiang hian kan ti thei a ni. Sumdawng, dawrkai, i nihna aṭang khan mi dik ni turin ramin a mamawh che.Sawrkar hnathawkte pawh eiru lo turin, thamna la lo turin ramin a mamawh che. Kohhran rawngbawltute pawh biakin pawn lama piangthar ni zel turin a mamawh che. Chutiang bawkin ram hruaitute pawh mahni inhaivur, hleih neih, corruption laka mi dik ni turin ramin a mamawh che. Keini mipui nawlpuite pawh sum hmuh theihna tur ringawt ngaihtuah lovin vote-te thlak ṭhin ila, sawrkar hotute pawh dawr ṭhin ila. Kan contract/supply hnathawhnaah te pawh Mizoram hian mi dik ni turin min mamawh a ni. A ṭul huna dawt sawi mai mai lovin, mi dik ni turin min mamawh ṭheuh a ni.

Mahse, Mi dik Ni Tur Hian – Mi dik nih chu kan duh ṭheuh ngei ang, mahse, mi dik ziktluak ni tur hian a huphurhawm riauin ka hria.Ṭhiangte'n zu an in sap sap laia in ve duh miah lo nih chu a harsa khawp ang. Thawhpuite'n motor car nalh tak tak, in leh lo ṭha tak tak an neih lai a, nei ve miah lo nih chu a harsa khawp ang. Thilpek/thamna mite'n an pek laia pek ve na chang hre lo nih chu huaisen a ngai khawp ang. Ram hruaitute zingah pawh min vote duh lo tur thil han tihsak chu a har khawp ang, mahse, mi tin huap tura thil ti ngam nih chu ramin a mamawh si. Ram hruaitu rethei leh bengvar lo nih chu huaisen a ngai khawp ang. Party worker-te zingah pawh midang party huap thei nih chu thil awlai lo tak a ni ngei ang. Ram hruaitu rethei tak chu mipuite pawh hian kan ngaisang meuh lo, mahse, ramin a mamawh si. Eng kawngah pawh hian midik ni tur chuan huaisen, tawrh, kan ramah chuan a ngai.

Kan ramin mi dik a mamawhzia te, mi dik ni tura huaisen a ngaihziate kan han sawi a, chutiang a nih chuan Mizoram mipuite chu kan dik lo vek tihna a lo ni reng mai em ni ang le? Ni e, kan dik lo vek a ni. Mi dik tlem te awmte pawh hian an tilang ngam ṭhin lo a ni, a chhan chu mipui tam zawk hian a hun leh hmun hria, a ṭul huna la ru thei, a ṭul huna hnar der leh thei kan duh tlat. Kan support zawk tlat! Hei hi kan inenfiah ṭheuh a ngai, a nih loh chuan kan ram chu a ṭhang tak tak thei dawn lo a ni. Aw le, mahni ṭheuh inenfiah chungin kan ramin eng nge a mamawh, tih hi I ngaihtuah tlang ang u.

- Lalchhandama Colney Ph - 9862982321