Mizoram State BJP hmanga STATE SUM HARSATNA SUTKIAN KAN DUH EM?

Kum 2022-23 chhunga Mizoram sawrkar budget hi, vaibelchhe 12400 vel a ni. Heng zinga vaibelchhe 1210 vel hi indaih lohna (puk ngai) awm tura ngaih a ni. Kan hriat tawh angin kumin budget ah hian Mizoram sawrkar hnathawk (a nghet 50000 vel) leh a nghet lo (mi 30000 aporox) te hlawh tur hi indaih lo saa pass a ni a. Pawisa puk tur Crores 1210 hi sawrkar hnathawkte hlawh tura ruahman (budget) ni ngei tura ngaih a nih laiin, kum bul aṭangin kan puk nghal pang chu a nia, tunah hian Crores 900 chuang kan puk der tawh nia maw le! Hei pawh May 2022 (Audit statement) lehnghal. Thil hrechiang ṭhenkhat chuan 5th August hian State sum hi Audit leh tur niin an sawi a, thla hnih chhunga hei zat kan bat hman chuan eng zat tak bat belh leh ang i maw le?

Kan sawrkar hian sum enkawl lam hi a thiam fahran lo a nih hmel hle mai. An sawkar hmasak lai pawh khan leiba hnutchhiah an ngah hle a, Kum 2008-a Congress an lo sawrkar pawh khan, sawrkar hmasa kih hnawk thenfai ngai a tam luat vangin NLUP pawh kha kum 3 hnu (ni 964?) ah an launch thei chauh niin CM khan a sawi nghe nghe.

Tuna MNF sawrkar hian, Congress sawrkar inrenchem rah sengin cheng vaibelchhe 1500 chuang an rochun niin a lang a, 'An sawrkar hlima kawngpui eng emaw zat an siam theihna chhan kha a ni' an ti. Tunah hian, kan state sum dinhmun hi a chhe hle niin a lang. Sum tamzia kan sawina hmui a la ngai reng a, a tak ram thleng erawh chu hmuh tur a vang telh telh thung. Kan CM-in Central lama budget awmzia a sawifiahna ṭawngkam khawh lut chur chur, duhtawka thal theih chu a lo ni chiah lo a nih hmel e.

Tuna kan CM hi, kum 2019 Aug-Sept chho vel khan Central sawrkar dawrin chawlhkar hnih ngawt Delhi a zuk cham a, Prime Minister erawh a hmu thei lo thung. Hemi ṭum hian Central thuneitute a zuk vuak dup vek thu sawiin, 'Kan tihtur awmchhun chu Project siam char char a ni mai,' a ti a nih kha. Hemi zulzui hian a ni mahna project ṭhenkhat chu an hmu nual reng a, chumi zulzui chuan Playground chhawng leh phullem phahna tur te, Hawla Indoor Stadium hming thai bo paha Aizawl Stadium (Batminton Hall) sakna lungphumte kan hmu nghal nain, tunah chuan heng cheng nuai sang chuang senna turah te pawh hian hnuhma thar hmuh tur a la awm lo a, chutiang bawkin Armed Venga Field Chhawng siam turte pawh a ṭhingzo leh ṭhiap ta bawk.

Mizoram sawrkarin Project /DPR a siamho hi phai lam Company + consultancy firm ṭhenkhat nen inthurualin an tiho ṭhin a nih hmel a, hengho hi tunhnai khan an beidawng ta viau a ni awm e. Inthlang ram kan nih angin, sawrkar siamna bulpui chu election a nih miau avangin, nakkum lawka inthlang tur state ṭhenkhat leh Mizoram angah te chuan sawrkar project ṭhenkhatah chuan Central lam hian state BJP President recomendation an phut tel a ni awm e. Hemi chungchangah hian Mizoram state BJP President Pu Vanlalhmuaka chu sawrkar aiawhte'n an bia ni ngeiin a lang. Pu Hmuaka chuan, "NDA thlawptu in ni a, In party MP-te pawh Parliament-ah Treasury bench-ah kan ṭhuttir mek laiin Mizorama kan MLA neihchhun chu opposition lamah in ṭhuttir a, hei hi tihdanglam phawt ni rawh se," a lo ti a ni awm e. He thuah hian Mizoram sawrkar chu a lu a hai viau a rin thu kar hmasa lawka Attal Bhawan-a BJP political session ah sawi lan a ni.

Mizoram sawrkar sum harsatna hi a namen lo hle a nih hmel. Hetih lai hian sawrkar hnathawk inzawmkhawm pawl chuan 3% DA tihpun an phut ve mek bawk. Central sawrkar thu anga CSS sumte State Nodal Deptt/Agency lama transfer vek a nih hnuin, state Treasury lam an khawro nghal a, SNA te hnenah heng sum aṭanga 50% dahlet leh tura tihna awm mek anga sawina a awm bawk.

Hetih lai hian sawrkar chuan, inthlan dawna an lo tiam tawh angin SEDP chu July thla chhunga sem hman an tum thu Dy CM meuhin a puang a nih kha. Hei vawiin hi August thla thar a lo ni ta. SEDP sem thu hria kan awm em aw?

Tuna kan sawrkar hi, thuneihna duh luat vanga tiam theih zawng zawng tiam chunga mipui bum pawh hreh lova, rorelna chang tiin sawi ta ila, a dik lohna a awm lo vang. Opposition an nih lai khan kan CM ni ta hian, an vanglai taka an tlak chhanah EVM Rigging a chhuanlam a, Goal veng awm lova penalty pet a tehkhin bawk. Inzirchawpin kum 10 CM ka ni a, tunah hi chuan CM leh ngat ila chuan ka thiam tawh khawp ang, a ti a nih kha. Hei tunah a CM leh ta ngei a, thiam kan ti em, CM nawn leh turin kan duh em le?

Mizoram ang, thawhchhuah nei tam lo state tan chuan Central sawrkar do hi a finthlak loh hle. BJP nena thawkho zia zang kan nilo tih fote pawh hian nghawng ṭhalo a nei ṭan ta a ni mahna! Mi ṭhenkhatin, Delhi leh Punjab state te ang khuan hruaitu ṭha nei ila, Central ring lutuk lo hian kan awm thei ang an ti ngawt ṭhin. Hei hi kan hriat tawk loh vang a ni. Delhi chuan Chhiah tam tak Mizoram budget aia tam daih quarter tinin a khawn chhuak thei a, Punjab pawhin buh leh bal a intodelh piah lamah, tam tak hralh chhuah tur a nei bawk. Keini ve chuan, Ṭiau chhum zin chhung ei pawh kan thawkchhuak lo.

Mizoramin kum khata Taxation deptt hmanga chhiah kan lakkawm hi Crores 713 (target) a ni a, tlem azawng chuan an khum awm e, hemi piah lama kan chhiah lakluh chu Crore 150 vel chauh a ni. Heng zawng zawng hi kum khata P&E deptt enkawlna daih tawk chauh a ni. Heng bak sawrkar deptt 42 zet a hnathawktute hlawh leh hmasawnna thil kan hmuh zawng zawng hi Central sawrkar min pek vek a ni.

Kan politician ṭhenkhatin, kan budget hi dik taka hman chuan a tam tawk a, hmasawnna hnathawh nan pawh kan indaih tawk, tiin an sawi ṭhin. Mahse a dik lo. Kan budget hi dik taka hmanin kan indaih tawk chiah a, hmasawnna hnathawh nan a chuang tlem lutuk. MNF sawrkar tirh (2019) budget hmasa berah khan Developement hnathawh nana sum dah chu, Crore 450 vel a awm. Hei pawh hi opposition an nih laia an sawi ṭhin, Zu zawrh vanga Police boral mi 800 chuang leh kum tina sawrkar hnathawk pension leh hna ruak hnawhkhah loh vanga chuang mai mai a ni zawk.

Tichuan, UT sawrkar hmasa ber kha Indira sawrkar khan break rawn rapin, an che thei lo mangang khan, Congress nena in-merger an rawt a, tun thlengin Congress party chu mi tin hriat khawpin a lo lian ta. Sulhnu tam tak hnutchhiahin Mizote duh ber Remna leh Muanna min pek hnuin, Central Minister hial kan neih ve phah bawk. Kum 8 vel kal ta khan Arunachal Congress sawrkar MLA ho chu BJP ah inpe dualin Sawrkar thar a piang a, inthlan lehah pawh an tling nawn leh a, tun thlengin an la sawrkar a, Central Minister hial an neih theih phah a nih hi.

Politics thila ṭanrualpui tih lohah chuan, India Vai (Hindu) ho hian keini tlangmiho hi min ngaina teh chiam lo. India pawisa phal taka min pek theihna awmchhun chu an zawmpui lo nih ve mai hi a ni. Sakhaw thil leh politics hi tuna BJP/Shiv Sena etc hian an kalpui tih chu a chiang reng. Annihovin India/ Hindustan an tihah hian, an rilruah NE India hi a lang lem lo tih hriat a ṭha. British-in hmun khata min awp vanga India rama rinluh mai niin, Indian ve hram hram kan ni ber. Sakhua leh ei leh in thute hi state sawrkar thuneihna Or mimal zalenna a nih avangin, innekchep leh Bawng talh etc. thu hi insawiṭhaihna chi a ni lo. A mawlthlak lutuk.

Tichuan, kan sawi tak ang khian, tuna kan sum harsatna vang hian sawrkar lai hian Arunachal dungthul hian min inlehsan ve dial dawn nge, Central BJP duhdan angin, State BJP letter-head a hmang ṭangkai phawt dawn tih chu hunin rawn hrilhfiah teh se.

- Vanlalhuma Kawlni