LOCKDOWN NI 85 NA

A fawng vuantu kan nih ve loh avangin sorkar hian eng ang theihna chiah nge a neih kan hre ve phak lo. Mahse, sum, hun leh tha, etc, kan sen zozai leh vawiina kan dinhmun thlir hian, Covid-19 hi kan hual ṭhelh deuh hret em ni chu aw... tiin a ngaih theih. Khawilai takah khan nge kan ṭhelh tih erawh sawi thiam a har khawp mai. 

Tun dinhmunah chuan, mipui vantlang zingah he hripui hi darh huk thei dinhmunah a ding nite pawhin a lang ta. He hripui hi a kiang mai dâwn lo ni pawhin a ngaih theih bawk. Engpawhnise, Pathian ṭanpuina i dil zel phawt ang u. 

Hetiang hi kan dinhmun a lo nih tâkah chuan kan nunphung pangngai tam tak kan thlâk danglam a, hripui kâra awm dân tûr kan zirte pawh a ngai ta hial niin a lang. Sorkar leh kan mithiamte min zirtirna leh kaihhruaina te hi kan ngaihpawimawha kan zawm ṭhat pawh a ṭul telh telh dawn niin a ngaih theih. 

He hripui hlauhawm tak karah hian kan nun hi kan her rem thiam loh chuan chhiatna leh vanduaina hian min nang thei reng a ni tih hria a, kan fimkhur hle a ngai a ni. 

He khawvel, kan khualzinna ramah pawh hian sual hian min chenchilh reng dawn. Min nangtu in min nàn ang anga kan awm tawp chuan sualah kan tlu ang a, chatuan ram thleng zo lovin kan bo pil mai dawn a ni. Chuvangin, sualna in hléi a lènna hmunah hian sual hliam tuara kan awm loh na turin, rinna kawngah hian fimkhur taka kan kal a, Pathian thutak leh Kohhran inkaihhruaina hmanga kan inven a pawimawh em em a ni. 

Covid-19 laka kan him theihna tura ramri kan veng ang hian, kan nunah sualin min luh chilh loh nan ramri te khamin inveng ang u. Sual nen kan in chiahpiah nuaih chuan kan inveng seng lo palh mai ang. 

Khawvel hian nitinin kan nunah thil hrang hrang a rawn phur thleng zut zut ang. Chung chu Ral Aṭanga Thlir (RAT) ringawt kan duhtawk chuan sualin keimahniah nasa taka bu khuarin kan thlarau nun a tichhe vek thei a ni tih hriain, Isua Krista, Ringtu tana Pathian Chatuan Remruat (Rt PCR), hmangin uluk takin Screening/ Test i lo nei zel ang u. 

Chu mai chu a la tawk lo, Pathianah siam­tharlehna kan chan theih nân, engtik lai khan nge? eng ang takin nge? sual nen kan lo intawn tih hi ngun taka kan in chhui let (contact tracing) fo a ngai a ni. 

Chuti a nih loh chuan, Bible-in, "Mi ngaiha kawng dik ni awm taka lang, a tawp chu thihna kawng ni si a awm (Thuf. 14:12; 16:25), a tih hi phur zetin kan zawh tûrh tûrh ang a, chatuan boralnaah kan lut chut si ang tih hlauhawm tak a ni. 

I kawng zawh lai kha chhut ngun teh, 

Kawng hlauhawm boralna a ni lo maw?

Chhiatna rapthlâk lehzual i thlen hma hian,

Aw, i kawng zawh kha chhut nawn leh rawh.

Kan kawngte hi enfiah ila,

Thinlung ama lamah chauh hawn ila;

Kalvari panin pheilai i khai ang,

Chutah kan tlantu nung kan hmu ang.

Lalpan malsawm rawh se. Amen.