AMC HUAM CHHUNG A, LEI LAIH LEH A HMUNHMA SIAMREM CHUNGCHANGA MIPUITE HRIAT VE NGEI TUR

The Mizoram Municipalities Act, 2007 (Act No.6 of 2007) Section 371 behchhan leh thuneihna AMC a pek angin kum 2021, October ni 29 aṭang khan, “AMC (Site Development & Slope Modification) Regulations, 2017” hi a huam chhungah hmangin, thla 9 chuang a lo tling ve ta reng mai! “Vanlal nau ang a ṭahna kalvari-ah an dang chuang love” ti ti ṭhin mah ila, he khawpuia kan hman mek danah hi chuan kan lo va dang nasa si em! “A ṭhen pawh kan hre lo, he luikam aṭang hian” ti kan awm leh fo ṭhin avangin, Aizawl khawpui chhunga hman mek lei laih leh a hmunhma siamrem chungchanga inkhuahkhirhna dan hi tu emaw talin kan lo ṭangkai pui takin mipuite hriattur pawimawh zualpui han thailang ve ila.

A tum

Kan hriat ṭheuh angin, Aizawl hian leimin kan tawk ta fo mai a, nunna tam tak kan chan mai bakah, chenna In, vantlang in leh hmasawnna hnathawh pawimawh tak takten a tuar ta fo bawk. Heng a lo thlen chhan ni bera lang chu a leilung inthuahthip dan, a hawi zawng, a khikchah dan, tui luan/put dan leh leilung ngheh/ ṭhat dan dik tawk loh vang a ni ber.

Kan mithiamte’n heng zawng zawng ngaihtuah chungin hmun him lo - leimin thlen mai theihna, leitlak hniam theihna, lei tawlh theihna, lung tlak mai theihna, awm lo lutuka in sak, khawpui thli mumal zawka sawngbawl leh chhiatna hrang hrang thleng thei laka kan himna an ngaih pawimawh piah lamah, khuanu duansa thil chi hrang hrang - ram hmelhmang, a chhunga awm venhim leh hriselna ngaih pawimawh hi a tum a ni. Lei laih leh hmunhma siamrem kaihhnawih a thununna lekkawh leh enzui thlengin a tum a ni. He dan hi Building Regulations, 2012 nena kalkawp tur leh tichangtlung tura duan a ni.

Hmalak dan tur...

In sa thar tur emaw, zauh tur emaw, kalpawhna kawng siam emaw, kawng thar emaw, tui dah khawlna emaw, thildang leilung khawih danglamna lama hma kan la dawn a nih chuan AMC Office-ah kalin emaw, AMC website: amc.mizoram.gov.in-ah lut in AMC hnuaia registered Geologists/Soil Engineers leh Civil Engineers te be rawnin AMC-ah phalna dil tur a ni.

Technical persons (thiamna bik neite) rawih man hi AMC lamin thuneihna a neih loh avangin, a rawih man tlawm leh ṭha nia kan hriat kha thlan mai tur a ni (AMC SD&SM bika technical Persons AMC-in a neih dan: Geologists - 95, Soil Engineers – 07, Engineers – 143 leh Firms – 09, ni 02/07/2022 thleng). Ordinary Building (Assam Types) sa tur kan nih erawh chuan, Online Building Plan Approval Sytem (OBPAS) in kan dil phawt ang a, anni lamin lei laih phalna dil tura min tih chuan kan dil chauh ang.

Dilna thehluh hmaa hriattur

Geologists/ Soil Engineers leh Civil Engineers kan sawi takte zinga mi hi biak fel hmasak phawt hnu-ah chauh dilna hi AMC Office-ah a thehluh theih a ni. Chung hovin an thiltih tur an tih fel nan ringawt pawh ni 20 vel an mamawh a, Office-a thlen hma in hun heti zat hi alo ral der!

Office lam hmalak dan

Sipai lak an sawi angin, a ni (date) mai ni lovin a darkar ang zawngin, a hmun endiktute hnena thlen vat theih nan a theih anga chaka hma la in, thlentir vat ṭhin a ni. A endiktute hian dilna thehlut hmasa apiang an lo ensak hmasak ṭhin. Report engkim a felfai chuan file kaltir leh nghal niin, fel lo a awm chuan technical persons te hnenah siam ṭha vat tura hrilhin, an ran leh file a kal rang a, an muan leh file a kal muang deuh tihna a ni mai (Hei hi mipuiin kan hriat ṭhin loh technical persons leh office inkar niin a lang).

A hmun endiktute lamin endik hun tur ni leh hun hi technical persons-te a hrilh lawk ṭhin a, hemi hunah hian technical person leh ram neitu lam kan awm ve ngei ngei a ngai a. Technical persons emaw, ram neitu lam kan remchang lo a nih chuan a endiktute lamin kal leh hun an tih kha kan nghah thlen ve leh phawt a ngai ṭhin. Hetiang a nih avang hian mi buai tak technical persons kan ruai a nih chuan kan tlai palh thei.

A chiang lehzual ṭhin

Chi a vang dawn, petrol a vang dawn, adt. aṭang hian a va chiang si em! Zawlnei hrilh kher pawh ngai lovin hei hi chu Luka ziak angin kan pawm tlang mai thei awm e. Mizote hi in hmakhua uar lo tak hnam kan ni. Amaherawhchu, lei laih dilna hi chu a kawng a thui deuh. Hun a duh rei dan heti hian han sawi ila - Technical Persons– Geologists/ Engineers leh Soil Engineers zawn chhung, field investigation (ram endik) tih chhung, lei/ lung (soil/ rock) test chhung, application thehluh aṭanga file kal chhung, AMC aṭanga an lo endik hnu-ah kan ramin a zir loh phei chuan GRB (Geologic Review Board) a kaltlang a ngai leh bawk, lehkha (report) aṭanga thutlukna siam mai theih loh chu a hmunah GRB member-te hian an endik leh ṭhin a ni. Heng zawng zawng hi hre rengin, lei laih mai piahlamah in sa tur chuan kan chhut a ngai a ni. Permit min lo hawn teh a? tia in chah mai chi a ni lo.

Kan neih zawng zawng bakah kan hmangaih kan chhungte nen hahdam leh thlamuang taka kan chen hona tur innghahna/ dinna leilung hriat chian nan pawisa kan lo seng deuh emaw, hun a lo duh deuh a ni emaw, mithiamte an lokal chhen a nih pawhin dawhthei takin fimkhurah fimkhur luat a awm love tih rilru-ah vawng rengin ngai pawimawh ila, dawh­theihna i nei hram ang u.

(AMC chuan lei laih 01 July 2022 – 31 October 2022 a khap nachungin, lei laih dilna erawh dan pangngaiin a kalpui reng. A hun taka hma kan lak theih nan, hemi hun chhung hi, permit dil fel nan i hmang ang u).

- Jessy J Laltlanzauva Consultant Geologist, AMC