RT-PCR hawh khawm hmanga hri do hi

Mizoram sorkarin Covid-19 dona atan mipui aṭangin Chief Minister's Relief Fund aṭangin ni tin pawisa a nuai biin a dawng khawm a, sorkar laipui aṭangin pawisa a dawn bakah NEC aṭangin a dawng bawk tihte hi mi mawl ber pawhin kan lo hre ve thei a, sorkarin sum neihsa a neih zozaite pawh kan hre reng chunga khawl hawh chawp hmanga Covid-19 min lo hmachhawnpui tih hriat hi chuan lung a awi thei mawlh lo a ni.

June 11-a "Vanglaini zirchianna: Mizoram leh Covid-19 endikna RTPCR" tih kha kan chhiar chuan kan ram dinhmun zahthlakzia kan hmu thei a ni. February 10-a Vanglaini kha in lo kawl ṭhat chuan lo en ula (website an neihah pawh a en theih ang) "October 3 aṭanga November 30, 2019 chhunga Tripura aṭanga Mizorama Bru hruai­kir hna thawhnaah chet velna (tran­sportation) atan Rs. 5,13,72,470 hman a ni. Bru hruai kîr hna thawktu sorkar official mi 73-te ei leh in atan Rs. 22,42,305 hman a ni," tihte a inziak a, Mizoram leh Mizo hnam him leh him lohna hriltu tur RT-PCR kháwl chu kan sorkar hian tun thlengin a la lei lova, a zahthlak bakah a thirimthlak a ni hei kher kher hi chu.

Congress sorkar lai khan Parlia­mentary Secretary kha ṭul lo em em maiah khan an han ruat a, an lirthei senso nen, an office enkawlna senso zawng zawng nen khan PRISM chuan Parliamentary Secretary ruat an nih avanga Mizoram sorkarin sum a sên zat an chhût  chu cheng vbc. 18.81 chuang a ni daih a ni. MNF hian tunah hian ṭul lo takah bawk SEDP Board 14 an han ruat leh ṭhawt mai a, SEDP Office-a hlawh hi cheng nuai 100 chuang a ni a, office senso pawh hi cheng nuai 119 bawr vel tur angin an chhut bawk a ni. Congress Parliamentary Secretary-te pawh an hnawk a, ṭhiah an ni ta nghe nghe a, anni kha chu MLA rual kha an la ni zawk a, SEDP Board Vice Chairman ah hian MLA pawh ni lo a hranpaa thla bi hlawh nei tur an ruat nual a ni - hei hi a tirah khan mipuiin kan ngai haw vak lo a nih pawhin RT-PCR kháwl hawh chawp state kan nih takah chuan mipui thin a ur thar dawn a ni.

Vanglaini Zirchiannaah khan kan lo hmuh ve chu a tirah Laboratory din harsatzia hlir kha kan mi thiam sorkar lam ṭang deuhte khan an sawi a, mahse state dangin an neih tak sup sup hnua an inràwn zau kha chuan kan mi thiamte khan an lo huphurh lo nasa mai si a, rei lo te chhungin ZMC ah Laboratory chu an din ta a ni. A tirah Mizoram University (MZU) leh Pachhunga University College (PUC) lama an RTPCR kháwlte hawh a ni a, chumi hnuah Selesih lama Central Agricultute University (CAU) khawl an hawh leh tih kan hmu. A bul ṭanna atana khawl hawh hi chu a hriatthiam theih a, June thlaah pawh mi khawl hawh hmanga hripui min la dopuitute hi chu an demawm kan ti lo thei lo a ni.

RAT hmangin kan in-test ngar ngar a, Kolasib lama mite a hlawma an positive ṭhawt khan RAT kha kan sawi hnáwm ngam ṭan chiah a, kha pawh kha sorkar official lam chuan RAT-a hmuhchhuah zawng kha swab sample laa RT-PCR lama an test nawn hnua positive angin an sawi zet a, mahse Vanglaini khan Kolasib lama mite kha RAT-in a hmu lo chungin hlauhthawn leh fimkhur thilah RT-PCR-in an test-tir a, RAT hmuh loh kha RT-PCR khan a lo positive tir ta ṭhawt a, tichuan a man tlawm leh rintlak loh zawk RAT chu sorkar pawhin a kal san ve ṭan a, a man to zawk (mahse a dik leh rintlak zawk) RT-PCR chu a rawn chelek leh ṭan chiah a ni.

RT-PCR kan han hman dawn tak tak chuan kan hawh khawm chuan a lo tlin lova, mi 10000 chuang state pawn aṭanga rawn haw (Mizoram chhunga rinhlelhawm chu lo dah ṭha ta ila) zingah 50% pawh he articla ziah lai hi chuan an la test phak lo nasa vai vai si a, RT-PCR man to pawh ni lo hi eng vangin nge kan sorkar hian a lei mai loh? Vanglaini Zirchianna lama kan hmuh chu Pu Thantluanga (Hauva & Sons) khan cheng nuai 21 a pe a, chumi chuan RT-PCR khawl kha an lei nghal dawn an ti rum rum a, a hma khan cheng nuai 21 lek hi kan hmang thei lo em ni? tih hi zawhna a ni ta a ni.

Mizoram sorkar SAD khan kum 2019 March leh October khan Chief Minister leh Minister-te hman tur Car thar 24 an lei a, a vaiin cheng vaibelchhe 3 leh nuai 54 chuang an seng a ni. A man to ber leh car ṭha ber Jeep Compass hi kan Chief Minister car atan lei niin cheng nuai 25 man zet a ni a, a dang hi chu Verna, Scorpio leh Duster a ni a, heng lirtheite ai hian RT-PCR khawl pakhat pawh Mizoram tan a hlu zawk si a, kan VIP te hi chuan lirthei dang hman tur an la nei thova, RT-PCR chu kan neih loh avangin kan hawh a, mi hausa thil phal pakhatin a rawn donate hlauhva kan lei belh dawn a ni bawk si a, kan Covid-19 do dan hi ennawn deuh chu a ṭha lo maw, "Ṭanrual hun a ni, in sawisel lovang," tih ringawt hi a hun tawh lo a ni.