QUARANTINE MIZO ṬHALAITE KA NGENNA LEH FUIHNA

Kan hriat angin phai aṭanga lo hawte hi sawrkar leh veng chhûng quarantine centre-ah a tam zâwk chu kan inkulh mêk a ni a. Home quarantine-a awmte pawhin ka ngenna leh fuihna thu hi lo bengkhawn hram teh u. 

Kan hriat angin, quarantine hun chhung chu ni 14 aṭangin ni 21 ah pawh sei a ni leh ta a. Kan awmna hmun azirin ṭhenkhatah chuan hrehawm ti lem lo tak pawhin kan tlingtla thei mai ang a. Ṭhenkhatah erawh chuan a hrehawmin a rei duh zêk maithei bawk. Kan dinhmun a inan miau loh avangin mahni awmna mila media lamah pawh au chhuah chiam mai a awl duh dâwn khawp mai. Mahse, kan ngawi phawt ang! 

Amaherawhchu, eng harsatna pawh kan lo tâwk a nih chuan, kan hotute hnenah thlen hmasak nachang hria ila. State dang (Maharashtra) aṭanga haw kan ni a, state dang zawng aia thinhrik leh hlauh rawn bik kan ni maithei e. Mipui lam pawhin hemi avang ngawt pawh hian kan mit kham khawp khawpa chet 'over' na deuh an lo nei hial a nih pawhin, a lung fing zâwk kan nih theih hram chuan dem let miah loh tûr aw. 

Mi â kan ni lo a, state dang hial thleng thei khawpa chhungte rin ngam leh puitling thawkhat tawh kan nih kha hre reng ila, kan rilru tina khawp khawpa min lo 'treat' palh a nih pawhin, keimahni lam tal chu insum hram hram ila, ngawi phawt teh ang! 

Quarantine centre enkawl­tute pawh hian heti ang hmun hi an vawi khat enkawlna vek a ni a. Inzir lâwkna leh inchhiar zau hmasakna tûr awm hauh lo a ni bawk. 

Tihsual leh hmangchâng hriat tawk loh an ngah khawp dâwn a. Chuti ang kawngah chuan keimahni lam pawh hian kan finchhuah an mamawh takzet zet a ni. 

Kan awmna hmuna an tih dân ṭha leh finthlak tak takte pawh hi kan ṭhiante hmun danga awmte ṭheuh kha in 'share' nachang hria ila, ṭhiante aia kan awmna hmun nawm zâwkzia insawi siak ang lek leka boruak siam ai hian, kan khawtlangin min dahna hmunin a zawh tawk, mil tawk leh phak tawk ang zela lungawi thiam tûrin kan infuih chak tawn hlauh dâwn nia. 

A bikin mipui lam hi zirtir (aware) an ngai ve thei khawp mai bawk a. An dinhmun aṭanga min thlirna lam hi hriat thiamsak kan tum hram hram ang a, zawldawh zawkah pawh ṭan kan tum tlat tûr a ni ang. Hri lêng hi a hre chiang apiangin hlauh dân tâwk kan thiam ang tih hi hriat tlat tûr a ni. Vanduai thilah kan lo 'positive' ta nual a nih pawhin phili hluai lo ila, ṭhiante 'positive' palh hming leh thlalak hmua hriat châka tuihal viau tûr pawh a ni lo ang. An vanduai palh a ni mai a, thinhrik chhan tûr a awm lo bawk a nia. 

Nuamsa tûra inngai tlat hian quarantine-na hmuna khawsak phêt hi tum ngawt lo teh ang; kan ram dam khaw chhuahna kawng beiseia dah khawm kan ni zâwk a... Lal kan ni lo a nia; hetia khung khawm kan nih lai hian, ram ri an vêng a, an ngaihtuahna an sêng a, an mu mang lo tih hi hmuh hmaih hlek suh. 

Engpawh ni se, harsatna kan tawh a inchen thei hauh lo ang, kan manganna te hi mahnia au chhuahpui mai lovin, in tân Welfare lam hruaitute, Fellowship lam hruaitute bâkah, kan haw dân kawng hre chiangtu, Marshal/Leader lamte pawh in tân kan awm reng a nia. 

Tin, tunah hian kan ram sawrkar hmalakna tam tak hi hriat thiamsak ngaihna tûr a tam thei dâwn khawp mai a. District tina mawh latu, a bikin, kan MCS rualte pawhin an vawi khat tawnna a ni tih hriatpui ila, Task Force te lek phei chu kan in puih tawn loh chuan an phur a rit hle ang tih hi hriat thiamsak teh ang. 

Mizoram hi kan ram a ni a, kan ramah kan awm a, indema in cho tawn aiin inrema in chawi kân tawn hi kan mamawh ngawih ngawih chu a ni zawk, a sâwt zawk!

Fimkhur takin, famkim lo tak pawhin, 'ṭanrual hi chakna' a nih kha hre reng ang u.