FCI KUDAM HMUN THLAN CHUNGCHANG

FCI Kudam chungchang kan buaipui ta hle mai. Hei hian a hmun thlan thua fimkhur a ngaihzia a tilang. Univer­sity kawng bul maiah Kudam lian a awm a, buhfai phurtu motor liante chu kan mamawh min petu ṭangkai tak an ni reng chungin ninawm leh hnawksak an chang ta mai a. Anchhia kan lawh lo chauh a ni ta.

Hei hi kan buhfai min phurhsaktu motor liante thiam loh a ni reng reng lo, Kudam hmun thlangtute thiam loh liau liau a ni zawk. Kudam hmun thlan chungchang hi keima tawka ka veina a rei ta khawp mai. University kawnga mi mai hi a thlangtuten an tihsual a ni lo va.

Kolasib Rengtekawn kawngpui bul mai thlangtute pawh khan an tisual ve tho mai. Kawng kam mai a nih avangin motor lian pui pui buhfai phur luttu leh phurh chhuah tur nghaktute chu kawngpui dungah an intlar put reng mai a, an tawlh hruau hruau reng a. Motor dangte tan an nelawm loh em em ṭhin. Heng motor liante hian motor dangte kalna an dang chauh a ni lo va, kawngpui an tichhiaa, Silchar kawng chhe berlai a ni reng ṭhin.

Tunah University kawng bul maiah Kudam lian dah an ni leh a, a engnge upa zawk? University nge Kudam, chu ka hre hauh lo. Amaherawchu, kawngpuia kal motor dangte tan kan ei bar min phurhsaktu truck lian pui puite chu hnawksak leh ninawm an chang leh ta a nih hi. Kudam hmun tur dang zawn leh tur a lo nih hian thuneitute an fimkhur hle a ṭha. Kawngpui kam maia dah kher tum vang chauhva ram hmu zo lo an ni em? A lo berah kawngpui (highway) aṭanga Km khat tala hlaah dah ni se la. A kawt zawl (parking plate) zau tak concrete, motor lian rit phur pawhin an dai chhiat mai mai theih loh, truck 50 tal park reng theihna tur siam ngei ni bawk se la. A kawng km khat chhungah hian kawng kamah mimal in sak phal loh ni se. Parking plate aṭanga fal deuh hlekah thingpui dawr dah ni bawk se la. Heng thingpui dawrahte hian zu leh ruih theih zawrh khap tlat ni bawk se. Tichuan, Kudam lian avanga kawng dunga kan harsatna hi chu a kiang ngei ang.

Kolasib Rengtekawna Kudam an dah lai khan tuna Rengtekawn chhuah lam pang chung tlang leh a panna kawng siamna tur ram zawng zawng hi ram ruak vek a la ni. Tlang chung zawlah khuan lo dah ni ta se, kawngpui dung a tibuai miah lo tur a ni a. Eng vanga ti lo nge ni ang tih ka ngaihtuah fo ṭhin. Tunah Aizawl daiah FCI Kudam atan hmun a vang an ti a, ram duh thlan tur a awm lai pawhin hetiang ngaihtuahna hi an nei ngai chuang lo niin ka hria.

Tuna Kudam hmun tur harsat tak chhan pawh hi thuneituten hmang ṭangkai miah lo turte hnenah fimkhur lo taka ram an sem zel vang mai a ni. Keimahni leh keimahni harsatna kan insiam chawp mai mai a ni e. Sawr­kar hian thil pawimawh, loh theih lohva kan neih ngei ngei mamawh ang thilah hi chuan system zui tur fel tak, dan hmanga ven him tlat hi nei zel sela. Tichuan Kudam leh thil dang hmun thlan chungchangah pawh harsatna tam tak kan pumpelh tawh ngei ang.

- Commissioner Lalkiamlova, Tuikual South