Mimawl thlirna ve thung
Tun hnaia tuilian leh leimin chungchangah mithiamte ngaihdan leh thlirna ka chhiar nual mai a, Facebook, Whatsapp leh chanchinbu lamah an thlirna bengvarthlak tak tak ka lo en tawh a, kei ve thung chuan mimawl thlirna aṭanga ka thlir dan ka ziak ve dawn a, a mawl ang angin in lo chhiar chhuah ve ka phut tlat a ni.
TV interview na lamah khan Sairang ho khan tui lian an sawi khan 1957 leh 1975 kha an sawi ri ziah mai a, kha khan ngaihtuahna thui tak min neih tir a ni.
Kum 2017-a tui lian hi deforestation vang ang deuhin an sawi nasa a, thing leh mau a chereu nasat avangin ruah tui lo dawng khawltu tur awm loin luiah direct-in a luang lut pawp pawp tawh a ni an ti.
Ka sawi ve duh chu 1957 leh 1975-a tui a len khan kan ram kha a la ngaw ṭha awm hle si a, tui kha a lian tho a. Chuvangin, tui lian hi deforestation vang chu a ni vek dawn em ni? ka ti deuh a ni.
Aizawl khawpuia leiminna hmunhmate mithiam tak pakhatin 'Tun hmaa leivung paihna hmun a ni,' ti dawt duh si loin a ti ngei tih hriat siin, 'Chumi leivung paihna chu a ni lo maw' tiin lei minte hi mihring vanga thleng (man made disaster) ang deuhvin a chhuah a, kei mimawl hi ka sa zak mai. Aizawla leiminna hrang hrang hi thlir kual ila, tute leivung paihna hmunhma mah ni lo hi a min nasa a, a khi nasa a, kan buai tlang a ni. Mi chhiat tawh lai laia lo fin viau hi a finthlak loh ka ti!
Keia ngaihdan chuan tui a han lian maite kha ruah a sur rei loh tehlul nen Chung Lama Mi khian a hun tiin a thlen tir a ni mai lo maw? Nikum maiah pawh kha aia rei, kha aia tam awm kha a sur tluk tluk a, fur a rei vangin kan kawngpui pawh a chhe nasa a, sorkar pawhin insawifiahna atan ruah tui a tam thu leh fur a rei thu an sawi hial kha a nia. Nikumah pawh tui lian lo a, kumina a len thut dan kha kan thing leh mau a chereu thar thut lam ni lovin a lentir theitu a rawn che a ni maiin ka hria.
Lei min dante pawh hi en ila, lei min tir theitu lam a che a ni maiin ka hria. Aizawl hmun hrang hranga lei khi leh lei min hi han en ila tute leivung paihna hnuhma anga puh theih tawk awm mahse puh theih loh a tam zawkin kei mimawl chuan ka hria. Keia mimawl thlirna aṭang chuan Pathian thil rel dan hi a mak a, hriat phak rual loh a ni a tum zauzia hi.
- Lallawmkima