50% SCHOOL FEE LEH ONLINE CLASS

Monthly Fee a nilo ti tawk awm mahse, thlabi a pe kan nih vang leh kan vaia hriatthiam dan a nih avangin Monthly Fee ka ti dawn a ni.

50% MONTHLY FEE -

School thenkhatin School kal hma chu Fee lak an tum loh laiin Sorkar berin 50% Fee lak a phalsak avangin kan in khawn tan a, Total Lockdown lai pawhin School Account No thawn darhin kan in khawn ta mar mar mai.

Thlalaka hnathawk i hmuh hi HSS English zirtirtu, kum 55 mi Paleri Meithal Babu, Kerela lam mi a ni a, kum 30 chhung zirtirtu a nihna chu School a kal theih tak loh avangin a chhungkaw chawm nan ti hian insakna ah a inhlawh a ni. State thenkhatah Sorkar zirtirtu ngei pawh hlawh lak theih loh vanga thil zuar lawp lawp hriattur pawh an awm tan a ni.

Hetiang a nih lai hian keini ah chuan School kal lo leh zirtirna pe lote thlabi hlawh pe turin eichawp dap ve thlengin kan nawr mek zawk a, dawrkai hian min la dawr dawn tho tiin pawisa lo la lawk se, Taxi Driver hian min la hmang leh dawn tho a tiin chuang miah lo chu a Fare dil lawk se chutiang nen chuan a in anna lai a awm.

Private ah hnadang zawn pah, hna tha zawk hmuh hun huna bansan huamin an thawk tlangpui a, hna an thawh theih miau loh chuan inhlawhfa dang ang bawka hlawh neilo, hlawh hmuhna tur dang theih ang anga dap ve mai tura kan lo ngaih laiin thawh loh hlawh thlenga lâk tum bik hi a Fair bik chiah em le?

Sumo khalh, Night Bus khalh, Lighter 3 cheng 10 a zuar thin, Bazar a chawhmeh zuar thute, mi dawr nghaka khawpui rawn bêl thlengin an eizawnna a tawp titih a, ram changkang ber thlengin Unemployment Problem in min nuai lai hian engvanga a nghet lova thawk si, inhlawhna remchang dap mai lova thawh loh hlawh lak tum reng bik nge kan nih le. Fee kan dilchhuahte hian thlan tla in hri leng vangin an hna pangngai lo thlengin an thawh tawrh tawrh phah ve bawk a sin.

ONLINE CLASS -

MZP lamin Minister ah nei tawh lo turin an nawr a, mahse School thenkhatah chuan Fee khawn dâl ang lekin an kalpui reng tho a, Internet kan Access theih dan chin a in ang lova, kan Signal dawn chin a in ang hek lo. Kan Phone neih that dan lah inchen lo tak a ni.

Central lam pawhin Syllabus ennawn tura ruahmanna a kalpui lai hian October ah School hi lut thei pawh ni ila, kan Syllabus/Prospectus ah hian chhawk then a awm ngei ngei dawnin a lang a, tuna Online Class a an lo zir fo hi Exam Oriented tho a kan kal dawn avangin tangkai lo tak a la ni thei tho. Kerela Sorkar chuan pawl 5 chin Online Class a khap hmak a, tunkar mai khan pawl 7 chin tiin a puang tha leh hial a ni.  

Online kan kalpui dan ka en a, Teacher ten Blackboard ah emaw Projector hmanga Live a pe chhuakin naupang tin thlir turin an ti dawn emaw ka tih laiin a tam zawk chuan Whatsapp kaltlangin Group an siamah chuan Page chuti zatna hi vawiin ah zirtur an ti thawr a, zirtirtute chu zirtur petu, nu leh pate chu Zirtirtu ah an tang zawk a, a buai a buaiin Zirtirtu nih an fawmkem zui a, hei hi Online Class a nih chuan a harsa lo ngawt anga, Fee chawina tham a tling lo tawp a, nu leh pa hah zualna, buai zualna thlentu mai a ni.

TLIPNA -

Hawh u, US meuh pawhin Academic Session pum a Suspend a, Tamil Nadu ah Class X an Send Up vek bawk a, a pawlhniam zawk lam phei hi chu hri leng nen, retheih nen, hnathawh tur vang nen sum leh tihtur lamah phurrit insiam tawn lova in chhawk zangkhai zawk dan i zawng teh ang u.