Hnam Martar-te leh Politics

‘Hnam Martar-te hi politics hmanrua atan hman an tum’ tia Pu Hawla leh a hoten MNF an puhna thu kha hetiang zawng hian i lo zir chiang teh ang. Martar-te thih chhan kha Mizoramin zalenna a hmuh theih nana beia nunna hlu tak chan an ni a. Chu zalenna sualna ‘Hnam Movement’ atan chuan hlawh engmah nei lova, ram leh hnam tana in volunteer-a beia thi an ni.

He zalenna sual­na ‘Movement Thu­thlungpui’ pui hi Kohhran ho din a ni lova, Tlawmngaipawl din pawh a ni lo va, eng pawl pawl leh eng association din mah a ni hek lo. A dintu chu MNF Political Party, Pu Laldenga hova din leh chu Hnam thuthlung Politics aṭang liau liaua lo ding, vawiin thlenga la kal zel chu a ni.

He Politics Thu­thlungpui hi Mizoram tan a ṭangkai thei ang bera hmang turin dikna leh tha tia nunna hlana Martar pawh an ni reng a ni.

‘Congress ho hian sorkar laipuia Indira Gandhi hova inthlana an chak hi an Politics-a hman ṭangkai pui an tum’ tia demin sawisel ta ila, awmzia a nei lo kan ti ngawt ang. Inthlanna chu Politics a ni a, hman ṭangkai tuma theihtawp chhuaha bei an ni reng alawm kan ti ngei ang.

MLA candidate pakhat inthlannaa tla chu a ṭhianten “I va tla nasa ve” an lo tihin a ni chuan fiamthu thawh nan “Ngawi teh u, tun kum kan inthlang chu Politics a inrawlh nasa em a lo ni’ a tih ang deuh kha a ni mai awm a sin.

Mizoram zalen­na sual turin ‘Hnam Movement Thu­thlung’ kengtuten Political Party an din a, chu Party chuan Hnam Movement chu kalpuiin kum sawmhnih zet zallenna a sual avangin, kha mi avanga Hnam Martar thi tam tak an awm ta a ni reng a. Chu thuthlung chu dik leh ṭha tiin MNF chuan chu Politics chu a kalpui ta zel a ni. Chu ta tana beitu Hnam Martar-te chu chawimawiin an ruangte pawh lakhawmin Thlan­mual ṭha tak siamin an vui liam ṭhin a ni reng a. Chu chu an Politics thuthlunga Martar-te an nih miau avangin ngaisang leh zahtu an tam ta si a, an hlawk pui reng ang tih chu thu awm sa a ni.

Ram khat hruaitu berten chu thu dik chu dik ta lo anga lo tawn lo tawn hi a ṭul lem lo hle mai. “Tun ṭum MLA inthlan chu Politics a lo inrawlh nasa em a ni” tih ang lek chauh a ni e.

- R Lalhmangaiha, Bethlehem veng