Sawisel kan haw deuh em ni?

MNF sorkar hi he Covid 19 dona kawnga a hma a lak­na­ah hian opposition party te leh mi ṭha­hnemngaiten an duhkhawp lohna an sawi ṭhin a. Chuti zawk chuan hmalak ni zawk se te pawh an ti ve ang chu le. 

North Korea leh Communist ram ang maia, 'hripui laka Mizoram kan la him chhan chu kan Chief Minister-in Pathian a ṭih vang a ni' tih vel ram hruaitute sawi ngaithla a pawm duak duak tur ringawt Mizote hi kan ni hleinem! 

Democracy-ah chuan opposition ten sorkar an duh khawp lohna te, an beiseina te leh a thil tihah dik lo nia an hriatte huaisen takin an aupui ngam tur a ni a. Ruling Party pawhin heng sawiselna te hi a ṭul angin mipui hnenah sawifiah a, rorelna ṭha, chak leh langtlang zawk siam turin opposition te sawi hi an ngaih pawimawh a ngai ve a ni. Sorkar ṭha chu ṭhil ṭha zawk lo thlenna tura insiamrem phah a ngaih pawha insiamrem zel thei tura ngaih a ni. 

Chutiang ni lova thurawn leh sawiselnate kan haw tlat zel a nih chuan kan ram rorel dan kha "Oligarchy emaw Totalitarianism" emaw lam tluang kan zawh tihna a ni a. Democracy hlutna a bo ṭan tihna a ni mai dawn a ni. 

Kan ram sum dinhmun pawh 'Pathian chauhvin a hria' tia kan hotupa berin mipuite hnena a puan pawh a... 'a dik chiah' kan lo tih dual zel mai kha a ni, "Kan ram tana hlauhawm chu!"

Sum harsat chhuanlama sorkar hnathawk hlawh cut sak a nih mek laia, kan hmuh reng kan tuallaia Party workers ten contract hna an thawk a, an bung suau suau hi 'an ti ṭha hle mai' kan ti dawn em ni? 

Mimal leh pawl tam takin he hripui dona turin sum leh pai leh tha te an thawh a, a let leh phut miah lovin. Chutih laia "Raw chi supply tender lo koh te, inrenchemna awm lova phuahchawp Board hrang hrang 14 lai kan ṭhiat duh miah lo te, PSU sick unit sorkar hmasa in a ṭhiah tawh dinthar leh a, staff thar lak leh te leh a dang tam tak te hi, 'sorkar sawisel hun a ni lo'  tiin an tiṭha hle mai, tiin opposition-ten an tihpui kan beisei em ni?! 

Democracy vulreng rawh se! Sakhaw zalenna vul zel rawh se!