ZORAM POLITICS: MI HUAISENTE TUALCHAINA HMUN

Greek thumal ‘polis’ aṭanga lo kal ‘politics’ chungchang Mizote’n kan han sawi tak tak hi chuan kan thu tlangkawmna chu ‘politics avanga kan ram tluchhe mek chungchang’ hi a ni fo ṭhin. A ni tak a, politics avangin 

ṭhenawmpa leh ṭhenawmpa pawh ui leh kel thlun pawlh ang mai an lo ni tawh ṭhin a, thingtlang khaw ṭhen-khatah phei chuan politics avang thoin lo neih duh lam a hrang thei hial a ni. Kohhan programme-a hun changtu thlengin, ‘Party dang mi a ni, a thusawi ka ngaithla lovang’ ti hial khawpin political party ruihchilhna thlarau hian min suasam a. Hetiang hi kan dinhmun a nih avangin ṭhenkhat chuan beidawng takin ‘heti khawpa tluchhe tawh hi chu siam ṭhat rual a ni tawh lovang’ an ti a; politics an hmu tenawm a, mi zak thei lo zualte chauh inhampuarna hmun niah an ngai a, mi pangngai tel vena tlak ni lo hialin an ngai a ni.

Mithiamte chuan Politics-ah hian mipuite hi chi thumin an ṭhen a. Pakhatna chu, Politics field a che tla tak tak ṭhin ho, inthlanah pawh ding ve ṭhin leh anmahni campaigner te/active party worker (Gladiatorial Participant) te; pahnihna, Politics hriatna nei, vote pawh regular taka thlak ṭhinho (Subject Participant) leh pathumna, politics lam ngaihtuah ngai lo, vote thlak pawh ngaihtuah lo emaw thlak ve hram hram, a lo thlirtu (Spectator) te an ni a. Heng zingah hian Subject Participant kan tih te khi an tam ber. Kum 2001 January 20-a amah lawmluhna (Inauguration)-ah US President George W.Bush chuan, “Let us try to be a citizen. Citizen, not Spectator…” tiin American mipuite chu thlirtu (spectator) ni ringawt lova, khua leh tui ṭha (citizen) anga sorkar hmalaknaah tel ve ṭhin turin a sawm a nih kha.

America President lo ni tawh John F. Kennedy chuan ‘Vote thlaktu mawl (ignorant voter) pakhat lek vangin mi zawng zawng himna a derthawng thei’ a ti a, democracy rama vote neitu mi pakhat lek pawimawhzia a sawina a ni a. Politics hi Political Party hotute leh an member-te chauh sawi tur a ni lova, anni hi politics a hmanrua pakhat ve mai an ni tih mipui nawlpuite hian kan hriat a hun ta hle mai. Democracy ramah chuan mipuite’n politics an hriatna a san poh leh sorkar chakna leh Political Party te’n mipuite rawng an bawl ṭhat zawk theihna chance a sang zel a ni. Mipuite’n Politics leh ram inrelbawldan kan en chik poh leh Political Party-te pawh an insiam tha ve zung zung ṭhin. Mahse, chuti a nih lohva, mipuite’n politics an ngaihven peih tak tak lo emaw, sorkar inrelbawl dan an chik peih lo nia politician-te’n mipuite an hmuh chuan politician tam zawkte hian anmahni sahmim tihpuarna bakin politics an khel ngai lo tlangpui. Chuvangin, ramin hma a sawn leh sawn loh hi mipuite rilru a politics hriatna a san leh san lohah thui tak a innghat tlat tih kan hriat a pawimawh hle.

Politics hriatna (Political Conscious­ness) kan tih hi Political party-te hming leh an hruaitute hming hriat ringawt aia sang fe hi a ni a. Nitina kan hmuh leh hriat, leh kan thil tawn aṭanga politics chhui zawn thiamna hi a pawimawh hle. Eng vangin nge helaia in satu hian vantlang kawngpui a nek ngam viau? tih aṭanga bul ṭante a ngai; eng vangin nge power supply khamkhawp kan hmuh loh? Eng vangin nge water supply kan dawn ṭhat loh? tih te hi kan inzawt ngai em? Nitina kan tuarnate hi thutlukna siam theitu, Minister (Politician) te’n thutlukna an siam duh loh vang emaw an siam fuh loh vang a ni thei tih thlenga kan ngaihtuah zui a ṭul. Minister (Politician) a corrupt avangin a hnuaia sorkar hnathawkte’n hna an thawk ṭha peih lo a ni thei! Minister (Politician) leh sorkar officer lian an inmawngzawm avangin mipui thleng phak turin hmasawnna hnathawh (Developmental Works) a chhia pawh a ni thei asin!

Mithiam, a ngaihna hria, ram leh hnam vei mite hi kan ram hian a va mamawh tam em. Democracy ramah chuan political party hi a awm reng dawn. Party chhunga inbeihnate, party dang worker-te beihnate hi tumahin an pumpelh dawn lo. Hetiang hi hlauh tur a ni lo, mi dangte sawisel hlauh vanga politics siam ṭha tura political party-a luh hlauh (scare) te hi a dawizepthlak zawk asin. Politics chu mi huaisente tualchaina hmun a ni a. Hundred percent hlawhtling chiang tur engmah a awm lo, risk laka beih fat fat ngai chi a ni.

Lehkha in zir laiin in zir chhuah hunah hna ṭha tak leh zahawm tak thawh tumin risk in la a, mi dangte aia thiam turin zan mutchhuak leh zing khaw vawt sawi loin, hlawhtlin tumin, hrehawm tinreng tuar huamin lehkha in zir a. University leh College ṭhaa lut thei tura in beihna zawng zawngte kha han ngaihtuah ula, sum leh pai harsa chung chunga zirchhuak tura in beih dan zawng zawngte nen khan, eng vangin nge politics field-ah pawh theihtawp in chhuah theih loh bik ang ni? Chuvangin, mi thiamte hian politics te, political party te hi in hmelma en reng ringawt a, mi dangte luhna tur chauha in ngaih chuan Greek mi fing Plato-a'n “Politics-a kan tel duh loh vanga hremna kan tawh pakhat chu keimahni aia mawl/hniam zawkte rorelna hnuaiah kan awm ṭhin,” a tih hi a thleng dik zel dawn asin.