IN SAK LAI LEIMIN FO MAI HI

A satute tuar chu thu hran, an ṭhenawmte'n an tuar ve zel a, in neih hi a harsat tehreng nen, lei min hnua din thar leh chu harsa tak a ni. 

Aizawl khawpui tawt lutukah, rem leh rem lovin, kan inhnawh tâwt vak a, mi hausain hmun rem lo pawh, a sum hmanga siam rem chawp theih beiseiin, a theihna hmanga in ropui din a tum a, vanduaithlak takin amah leh ṭhenawmte nen an tuar phah leh si ṭhin. Eng vang nge?

KAN BUILDING REGULATION HI:

AMC hian building regulation ṭha tak a nei, officer pakhat sawi ka hriat dan chuan, in sakna tur reng reng, 60 degree aia awih chu, sak phal a ni lo. Chuti ni si eng nga ti nge 70, 80 mai ni lo, 90 degree thleng pawhin, miin in a sak theih si, dan nei reng siin, thiltihtheihna hmangin dan chu kan namnul ṭhin a nih hmel a ni. Kan dan siamte hi zâwm tláng ila chu, chhiatna kan tawh tam tak hi kan pumpelh ang maw le.

MIZO ZE THA LO:

Mizote hi hnam nunnem tak, mi huatthu sawi hlau ṭhin kan nih avang hian, dan tlawhchhan tur awm reng mah se, chu dan chu kan hmachhuan ngam lo ṭhin. 

In sa tur reng rengin, a ṭhen­awmte leh AMC leh Local Council remtihna a lak a ngai, in sak lai lei min tam tak hi, phalna neia in sa vek an ni, chuvangin dem theih an ni ngawt lo ang, demawm zawk sawi tur an awm lo. 

In satuin sorkar lamah a thiltihtheihna hmangin, phalna a nei tawh si a, a ṭhenawm pa chuan, a tan hlauhawm dawn mah se, hotu lama phalna a neih tawh si chuan, lo object kha a hreh a, a tawpah a tuar phah leh si ṭhin a nih hi.

Dan lekkawhtu AMC lam hian, mi in sak an vil ṭha tawk lo tlangpui. Miin in a sak dawnin, engineer plan awmsa vek nen, dilna a thlen a, chu engineer plan chu a hlauhawm em tih kha a en diksak ṭha tawk lo ni awm tak a ni. Complain a lo luh a, a hmuna va en ringawt an tum chuan a dik lo a ni. Mizo zia chu mi complain nuam ti lo kan lo ni hlawm si a, complain a awm loh a, office aṭanga phalna kan lo pek ringawt avangin kan tuar ṭhin a ni thei ang em?

HMANA MI KHA:

Pu H.V Lalringa, Chief Secretary a nih lai khan, Delhi Development Authority entawnin, Aizawl Development Authority din a ni a, khatih lai khan, Aizawl in sak lai chhe leh ta a vang khawp mai. Kha hun kha a ngaihawm ta zawk a ni.

Tunah chuan, AMC kan din thar a, AMC membert-te chu, mipui thlan an ni tawh a, mipui thlan reng reng hi chuan, mipui huat hlauvin, dik taka dan lekkawh an ngam ṭhin lo. Thuneitu ve bawk, Local Council te pawh, mipui thlan bawk an ni a, inthlan leha tlinna tur ngaihtuahin, mi lawmna zawng reng rengin, dan dik tak lekkawh an harsat ṭhin. Hetiang neih nuaih a nih ṭhin vang hian, chhiatna kan tawk ta fo mai niin a lang.

DAN I TLAWHCHHAN NGAM ANG U:

Building regulation tha tak kan nei a, kan dan neih ang hian kal tlang ila, mi hausa pawhin dan ding lai chu nek puar tum lo se, thenawm khawveng pawhin, dan kan neih hi tan chhanah nei ngamin, mahni tana hlauhawm lo thleng thei a awm chuan, objection pe ngam ila, dan lehkawhtu pawhin, chhiatna kan tawh thin hi in enfiah nan hmang tawh ila, kan hma hun lo kal turah hi chuan, i fimkhur tlang tawh ang u. Chu chu kan that tlanna tur a ni ngei ang.