SUM SEM POLICY VOTE BANK POLICY

He thudik tluantling awm sa hi a nihna ang anga sawifiah a hunin ka hria. Lehlamah mipui moral a siam ṭha nge a tichhia tih te tarlan ṭul tawhin a hriat a, chutah ramin ei leh barah intodelhna min thlen em tih te pawh tarlan ṭul tawhin ka hria.

Sum sem policy tih hian a inṭanna a rei tawh a. EGS, NREGS etc. te pawh huam tel tir theih a ni. EGS a vantlang hnathawh te kha tumahin ṭha em em turah kan beisei lo. NREGS an sem regular deuh lai khan khaw ṭhenkhatah chuan thlawhhma lak ṭhulha kum tluan atana lo inhnangfak ta mai mai sawi tur an awm nual. Chutih laiin khua/ veng ṭhenkhatah engemaw zat sem a ni a, a ṭhenin JCB etc. rawih nan an pawisa dawn an thawh khawm bawk a ni.

Tuna sawrkar development policy pawimawh ber NLUP leh a thlakna tur NEDP te leh mi vote bank policy thika MNF-in SEDP an zawrh tak te hi engnge an nih leh NLUP kum sawm vel kalpui tawhah eng nge a thlen tih te hriat chian a hun tain alang. NLUP hi kan teh fung ber tur a ni tlat, a chhan chu tun Congress sawrkar term hnih chhung pawhin kum kua vel zet kalpui a ni tawh.

Mizoram ei leh bara into­delhna lamah chuan kum 2009 tir lamah khan Mizoramin buh a tharchhuah zat chu kum khat atan thla hnih leh a chanve ei vela chhut a ni. Sorkarin NLUP kum nga a kalpui hnuah kum khat atan thla hnih ei vel thar anga chhut a ni leh a, tunah kum kuana a kalpui mek a ni. Mimal ang chuan an trade thlan a zirin an hlawhtlinna tar chhuah tur an awm ang mahse za zela sawm vel bak an eizawnna kawng bika dinchhuahpui an awm tak meuh em tih chu zawhna pawimawh tak a ni.

Congress sawrkar hian NLUP a taka an kalpui thei hi an fakawm a, tunah chhungkaw nuaih khat leh singthum zetin an dawng tawh a nih phei chuan an policy-ah an hlawhtling hle tihna a ni. State Assembly election kan hnaih leh ṭan ta a, zawrh chhunzawm tur an neih loh chuan kum 10 an zawhna tur a ni tawh si a, thil thar ang deuhin NEDP an duang chhuak a, an zuar leh ta mek a ni. Mipui rilru lama a thawh dan tlangpui hriat theih chu dawn ve leh ngei chakna a lian ber a. Eng ang kawnga hman ṭangkai tur nge tih pawh ngaihtuah lem lo hi mi tam ber an ni.

Sem policy hian mipui ‘moral’ a tichhe mek zel tih loh theih lohna chin a awm zel a ni. Hetih laiin he vote bank policy ṭhatzia hriain MNF-in SEDP an duang chhuak ve leh a, a zawrh vel pawh an phurin an thiam hle. NEDP leh SEDP khaikhinna chu ‘chepa nge i duh vahrit’ tih ang a ni tih te a ni. Amaherawhchu, mipui hian rin ngamah an ngai ang em tih chu a pawimawh hle dawn a ni. A hun tawp dawn lamah mau tam Mizoramah an thleng a, sawrkar laipuiin a vaia belhkhawmin cheng vaibelchhe 204.85 vel zet tam tuar Mizo mipuite inhlawh leh chhawmdawl nan a pekah kuthnathawktute nawrh huaihawt leh chem tum nena kawng zawh avang te in cheng vaibelchhe 12.35 vel chauh mipui ṭam tuar inhlawh nan an pe chhuak thei a. Mipuiin MNF te hi an ring leh ngam ang em tih chu a pawimawh hle dawn a ni.

Politician te hian mipui nawlpui retheihna khurah min hnuk lut te te a, chutah vote bank policy min siam sak leh mai a ni.

- Lalruatfela, Ramhlun