TLAWMNA CHAPO (Vol-1)
Tlawm ngawih ngawiha inhriatna hi mahni indah san vang a ni. Tlawm kan intih viau lai hian midangte tlawmna nun nei ve se kan tih em emna thinlung hi kan hmangaiha kan vei vang ni lovin phut let nun a ni zawk. Tlawmna hian phut let a nei ngai lova a tlawm mai a ni.
Mahni dik intih riauna raute hi rilru chhiat leh suahsual vang mai mai a ni. Tlawmna hian a dik lohna lai a hmu lian ber ṭhin, committee-naah leh puipun nikhuaa bawp khawkherh leh kut kawngkuah hmuka hmun lailum ber berah an thu leh hla ngaihsak loh hlauva ring tak taka hallelui...a men..tuar tuar ṭhinte hian Pathian an fak lova, anmahni an ni fak mai zawk a ni. Tlawmna nun chu kimki takin a inthukru ṭhin.
Fak loh hlau ni awm taka mahni thiltih ṭhat sawi ṭhinte hian midang fak ve tur zuah lovin anmahni an in fak zo ṭhin. Tlawmna hian mahni a infak ngai lova, midang a faka zawk ṭhin. A hre ber leh hmasa ber nih tum reng reng midang ṭawng ve hmaa lo pawt zuah zuah ṭhinte hian tlawmna nun hi midang ṭawng ngaithla nun a ni tih reng an hre lo.
Taksa chetna dawng nasa bik nia inhria, inti zawlnei leh thil hre bik riau, ha aiah ha tih nun Horep tlang kal san lote hian, a chuktu apiang chu ve zel an tum a, tlawmna nun chuan phuba a la ngai lo a, Horep tlang aṭang tuipui sen hnuaiah ke lawngin a kal beuh beuh zawk ṭhin.
Doctrince tih vela lo inhniala mahni duh lai lai Pathianthu nena ṭan lo khawh, inti Kristian em em ho hian Kelkang nun an hre lo a, Pathianthu hi inhnial nan chauh an hmang - nunpui an tum thak lo. Mahni sam khuih pial chiah ngai thei a, midang sam phir sing seng hmuhmawh tlatna thinlung pawh hi mahni thu duh leh in lak vei vang a ni. Tlawmna chuan eng ang mi pawh a pawm. Mahni venga zu zawrh duh miah si lo, zu heh ru zekho hian fel ber nih an tumna lamah anmahni mawng an inhlim a. Tlawmna chuan a nihna a zahpui lo a, amah ngai ngaiin a lang tlang tawp ṭhin.
Mahni hlawha lungawi lo, Sunday sermon thupui thlang ṭha thei fu, thuro nunnem ber ang maia pulpit tlang mittui leh hnaptui nena ṭap ṭhinte hi Moday-ah chuan dragon hnar meikhu chhuah thei an ni leh ṭhin. Sunday kraws lungawipui ten Monday-ah kraws an pu peih lo - tlawmna erawh chuan eng dinhmunah pawh lungawi zel a ching thung.
'Lalpa tlawmna nun min pek avangin ka lawm e' tia ṭawngṭai ṭhinho hi ka hlau ngawih ngawih, midang hriat loh an hlauh luatah mihring beng an ti ngawng mai pawh a ni lo, Pathian beng an chhu ngawng tih hi an in hre si lo. Tlawmna hian a tlawm thu hi a chapo pui lo asin.
- Pate Lyno