Infiamnaa naupang/ ṭhalai chher

Commonwealth Games 2022, Birmingham-a neihah Jeremy Lalrinnunga, Ainawn Vengin gold medal cháwi chhuaka hlawhtlinna ropui tak a nei hi a lawmawm tak zet mai. A hlawhtlin theihna tura a thawhrimna a chhuanawm a, a kawng hawnsaktu Catch Them Young policy, a chhung te, amah zirtirtute leh atana thâ leh zung, sum leh pai sêngtu zawng zawng an fakawm.

Mizoramah hian sport association hrang hrang an awm a, Mizoram State Sports Council (MSSC)-in a pawmpui bik pawh pawl 33 emaw lai a awm a ni àwm e. Sports association zingah chuan Mizo mipuiin kan hriat lar zual zingah football, table tennis, hockey, weightlifting, boxing leh contact sport discipline dang ṭhenkhat hi infiammi chher chhuak ṭha, player-te'n hlawhtlinna an chan sanna deuhte an niin a lang.

India ram mai ni lo, khawvel huap pawha lang pha infiammi, mipui náwlpuiin kan hriatpui vak si loh chher chhuak association dang pawh an awm mai thei e.

Rilrua awm rauh rauh han sawi zui ila. Sport asso­ciation zingah pawl hruaitu­te'n an khelh ve nasat apiang­ah hian India rama cham­pion thei, khawvelah pawh lang pha infiammi kan nei lo deuh tlangpui em aw, tih te, Mizoram leh Mizote'n hlawhtlinna sang tak kan neihna infiamnate hi association hruaitute'n an khelh ve chiam chiam lohna a ni deuh zel em aw, tihte rilruah a awm a.

Tu huatthu suhah ti ila. Badminton leh tennis hi patling pui puiin an khelh nasat a ni a, khêl ṭhin zingah infiammi naupang zawkte aiin, puitling/ patling tak tak tawh khel an tam zawk hial mai thei. Hei hi mi ṭhenkhatin an ngaimawh ve fo a ni pawhin a lang. A chhan chu, naupang zawk, eizawnna atana la hmang thei turte khelhna hun leh hmun tam tak an lo la hêk ve a, naupang/ ṭhalai zawkte'n khelhna hun leh hmun an neih tam loh phah a ni ve palh thei.

Khelhna hun leh hmun hi chu siam rem theihah pawh lo ngai ta ila. Pawl hruaitute'n inkhelh ve an tuipui lutuk chuan, nau­pang/ ṭhalai zawkte chher chhuak tura hmalak, ṭan lâk lam ngaihthah deuh phah theih a niin a rinawm. Inenfiahna tur an nei ṭheuhin a rinawm. Badmin­ton leh tennis hi kan sawi lang bik a ni mai a, anni chauh an ni tihna a ni lo a, pawl dang pawh an awm ang.

Badminton-ah hian naupang leh ṭhalai zawk, eizawnna atana badminton hmang thei tur zingah khawvel huap intihsiaknaa champion kan la nei lo niin a hriat a, India ram pum huapa champion an awm tawh em ka hre lo. Tennis-ah pawh India ram chu sawi loh, hmarchhak bial pum huapah pawh inelna puitling taka champion a la awm lo mai thei a; tournament tênau deuha champion tawh erawh an awm mai thei e.

Chutih laiin, Mizote India ram pum huapa kan champion tawhna te, player mal thleng sang tak kan neih tawhna te, khawvel huap pawha lang pha leh champion hial kan neih tawhnate hi association hruaitute'n a tak taka an khelh ve vak vak lohte a ni duh phian em aw, tiin a ngaihtuah theih viau mai. Entirnan - weightlifting-ah Jeremy Lalrinnunga, hockey-ah Lalremsiami Hmar leh mi dang tlem azawng, table tennis-ah Jeho Himnakulhpuingheta leh mi dang tlem azawng, football, boxing, etc.

Mizorama sport asso­ciation hruaitute'n an enkawl infiamna an khelh ve hi a ṭha lo ka ti hauh lo a, a ṭha ka ti zawk mah a; intihlimna atan te, rilru leh taksa hriselna atante pawh a ṭha hle ang. Mahse, a khelh ve lamah kan tui ta lutuk a, naupang zirtir leh chher chhuah lamah rilru kan pek tâwk loh phah thei em? Eizawnna atana hmang thei tur khawpa naupangte/ṭhalaite chher chhuah tum tak takna rilru kan put loh phah em? A hming maiin kan inzirtir ve hrâm hrâm deuh em?

Sport association-te din chhan leh an thil tum pui ber eng nge ka hre lêm lo a; naupang/ṭhalaite'n eizawnna ṭha an neih phah theihna tur khawpa chher chhuah hi an tum ber ni turah ka ngai ngawt a. Sorkarin sum tam tak sénga hmunhma ṭha a siam chhan ber pawh naupang/ṭhalaite'n infiamna hmanga eizawnna an neih theihna tur a nih a rinawm.

Sport association hruai­tute'n an nihna leh dinhmun te, an thil tum te, an thil tum tihlawhtling tura ṭan an lâk dante leh an inpek dante chu an inhre chiang zawk ang a. Tuna páwl an kalpui dan te, infiammi ṭha chherna lam an kalpui dante chu India/khawvela lang pha leh champion thei tur khawpa inzirtir/inchher nan emaw, bul ṭanna atan emaw a ṭha tâwk an ti em, tihte pawh inenfiah a ṭul àwm e.

Infiamna lama pawl hruaitu kan ni ta sa sa, keimahni inkhelhna tur leh inkhelh paha intihhlimna tur aiin, India ram mai ni lo, khawvela lang pha tur khawpa naupang/ṭhalaite chher chhuak thei turin ṭhahnemngai lehzual ila, rilru leh ngaihtuahna séng ngun lehzual ila, inpe lehzual ila, naupang leh ṭhalaite tan a va ṭha dawn em.

- K Zothanpara