Covid-19 leh chhuanlam

Tun hnaiah Mizo­ram sorkarin sum lamah harsatna nasa tak a tawk tih kan hria a, sorkar sum leh pai dinhmun ngaihven lo thlengin hriat loh theih loh khawpin kan dinhmun a chhe mek.

Mizoramin thawh­chhuah kan la neih mumal loh avang­in, Mizoram sum che vel hi sorkar hna­thawkah thui takin a innghat a. Kan sorkar hnathawkte hian hlawh la thei dawn lo ngat ta se, kohhran aṭanga sumdawng thlengin na takin a nghawng dawn, tih hi thil lang chiang tak a ni.

July 27 Vanglaini chanchinbuah khan, Mizoram sorkar sum dinhmun a ṭhat loh avangin Mizorama Treasury lian pahnih Aizawl South leh Aizawl North Trea­sury-te chuan khar la ni chiah lo mah se sum an pe chhuak tawh lo tih kan hmu.

Mizorama Trea­sury lian ber Aizawl South Treasury erawhin sum pe chhuak rei deuhin, an pek chhuah hnuhnun ber chu July 23, 2022 kha a ni tih kan hmu bawk.

Hei hi a chhan ber chu, kan hriat ṭheuh angin sorkar lai­puiin, ti tura a tih anga Finance depart­ment-in centrally sponsored scheme (CSS) sum, Reserve Bank of India (RBI)-a Mizoram account-a awm mekte chu Trea­sury-te a pek chhuahtir char char vang niin a lang a, tun hnaia CSS sum pek chhuah zat chu vbc. 570 vel a tling tawh hial a ni.

Hetiang meuha kan ram dinhmun chhe tawhah chuan, sorkar hian huaisen taka mawh la ngam mai tur an nih lai­in, hei leh chen chhuan­lam atana an hman tawh Covid-19 bawk an la chhuanlam cheu hi chu Mizote hi min zah lo mah mah em aw, tih mai awl a ni.

Hei chauh hi a ni lo - kan home minister, ramri buaia a hming kan hmuh khât tak pawh, sorkar sum dinhmun chhe karah a rawn lang hlawl a, a thusawi erawh "SEDP pawh kan kalpui zel dawn," tih a la ni hem mai!

Hetihlai hian Sports minister pawh­in sorkar laipuiin, sem tura a tih avanga sorkarin CSS sum a sem chhuak thei chu fak tlak a tih thu social media lamah, a profile 'blue tick' ngat hmangin a puang bawk a, kan namai lo ṭhin khawp mai.

Heng zawng zawngah pawh hmuh hmaih theih hauh loa lang pakhat chu - kan thuneitute hian Covid-19 an chhuanlam ve ve tih hi! Kan ṭhenawm state sorkarte pawhin Covid-19 an chhuanlam thu hriat tur a awm tawh loh laia, kan puten Covid-19 an la vei reng bik mai hi chu a manganthlak a, mipui hi min zuamin, min ngai mawl mah mah ṭhin em aw, kan ti ve deuh a ni.

- K Lalrinpuia