Ṭampui mitthiin unau laina a kai chhuak leh dawn ta

"A tam emaw, a tlem emaw, a theih ang angin Mizoram tan sum thawh khawm a, khawn kan tum," tiin Burma Zofate chuan he lama kan chhiat tawhna hre rengin, ṭan­puitu kut phar an tum ve ta. Unau, chhulkhat kual kan nihna te, 'Dam leh tlang khatah, thih leh ruam khatah' tia kan pi leh pute aṭanga thurochhiah ropui tak ka neih kha a takin a lo lang zel a nih hi ti rawh u. Kha, in la hria ang tiraw? Nikuma khawchhak unauten tuilian vanga harsatna an tawh lai khan, an tan pawisa in thawh a; in Branch YMA ṭheuh kaltlang te, MZP leh MSU kaltlangtein sum in thawh a nih kha.

A ṭhen chuan Burma a Zofate mangang ṭanpui nan YMA kaltlangin in Pathian ram thawh ai meuhte in thawh a nih kha! Zirlaite u, in vawi khat chaw chhun ei ai hu in thawh te kha in la hria em! Khata in sum thawh khawm khan khi lama in unaute, nangmahni ang hmel pu, ei leh in leh nunphung tinrenga nangmahni nena danglam chuang lo, chhiatni ṭhatnia nangmahni ang thoa mi dangte tana che chhuak ṭhinte hnen a thleng a nih kha. Manganga an awm laiin, an biangah lawmna mittui in luan tir a, in ṭanpuina kut vangin an lungngaihna hmel chu thlamuanna hmelin a thlak a, ṭapa lei lam an en tlawk tlawk laia hlimna hmel nena van lam en theia siamtu chu nangmahni kha in ni asin.

In sum thawh khawm hmanga tui lian zel tur danna an siam te, an ei tur in tumsak leh an thawmhnaw hak tur thlenga in ngaihtuahsakna hmun kha a takin kan han hmu a, kan khawih a, kan han rap a; an hmelah lawmna leh thlamuanna in siamsak lai hmel hmuh hi khawvela ennawm ropui a tling asin. Tunah rih chuan khitah leh hetah kan awm chhan hi chu a zar peng dang ni se la, hmanah an sawi tawh a, mi ropuite pawhin an sawi tawh a, nakinah pawh kan la sawi zel ang chu ti rawh u.

Tunah chuan Sairang, Aizawl, Tlabung leh Mizoram hmun hrang hranga ruahsur vanga harsatna kan tawhte hian khi lama Zofate thinlunga naute a khawih che ve ta a, "A tam emaw, a tlem emaw, a theih ang angin Mizoram tan sum thawh khawm a, khawn kan tum," tiin kan tan an insang mar ve mek a nih hi. Mizo Upaten engtin nge an sawi kha, "Sakawlh mikawlhin Pasal-ṭha a puangzar a, Ṭampui mitthiin unau laina a kai chhuak," an ti a nih kha.

Hmuh theih loha chuan min hruai a, chhul khat kual, thlah khat, thisen zawmpui kan nihna lo lang thar mek hi he lama mi ṭhahnemngaite hnathawh rah a ni a, khi lama kan unaute hnathawh pawh a ni bawk e. Manganga kan awm laia kan chet chhuah tawnna leh unau, thisen zawmpui kan nihna a lan thar zel avang hian, Mizo hnama min siamtu kan Pathian pawh hi a lawm ve lo ang em ni? a siam chhanah kan chiang a, inchemhar aia ṭanpuina kut kan lênte hian beng a fah ngawi ngawih a, vanram meuh pawh lawmin kut a beng ve ta foin ka ring hial mai!

Suahsualna kut leh hmanruate chu dân leh a lekkawhtute chinfel atan dah ila, thisena unau kan nihna nen inzawm tir hauh suh ang u.

- Lalnunṭawma Fanai