CAG audit report

India rama sorkar sum hmanna endiktu sang ber (Supreme Audit Institution) - Comptroller & Auditor General (CAG) chuan sorkar laipui bakah state sorkar hrang hrangte sum hmanna Audit Report (for the year ended March, 2016) a tihchhuah zingah Mizoram a tel ve a. He audit report hian thil tam tak zingah Mizoram sorkarin a kalpui NLUP chuan inkaihhruaina dan (manual) a siam te a zawm lova; State Budget aṭanga pek a nih thu a tarlang bawk. Hei hian sawi zui a hlawhin mithiamte thlirna (review) leh comments te pawh kan chhiar nual tawh a. Rorel lai party insawifiahna ni thei awm te pawh kan hre bawk a. He report hi a pawimawh avang leh mipuiten kan dawnsawn dan leh pawm dan pawh fimkhur a ngaih avangin zau deuh zawka thlirlet ṭhain ka hria a. Dik tak chuan ziaktu ṭhenkhat ziah dan hi chu a him tawk lo a, mipui rilru a dik lo zawnga hruai thei a nih avangin sawi zui a ngai.

1. CAG hi engnge a nih? India sorkara a dinhmun (status) eng nge?

Comptroller and Auditor General (CAG) of India hi constitutional body a ni a. India dan pui (Constitution) Article 148 to151-ah a nihna leh dinhmun chiang taka tarlan a ni. Sorkar sum (public accounts) leh sorkar ṭanpuinaa din corporations te sum hman dan fel taka endiktu a ni. Tin, India rama sorkar lal dan indawt (order of precedence)-ah pakuana (9th ranked) niin, Supreme Court Judge te nen dinhmun inang (same status) pek a ni. CAG hi Indian Audit and Accounts Department a lu ber (head) niin, audit report a tihchhuah reng reng hi Parliament of India leh State Legislature a Public Accounts Committee (PACs) leh Committees on Public Undertakings (COPUs) ten i he lovin an pawm ṭhin. Audit report dik (authentic) leh sang ber, sorkar laipuiin a pawm thlap a nih avangin a rintlakin a zahawm hle a ni.

2. CAG Audit report sawi hnawm leh sawisel hi a serious a ni

Constitution-in a ruat (mandate) angin, sum leh pai hman kawnga sorkar vengtu a nih avangin report dik tak a tichhuak ṭhin. Data lakkhawm kawngah pawh sorkar inrelbawlna zulzui thlapa kalpui a nih avangin thulakna (source) rintlak chauh hman a ni ṭhin. Ram changkang zawkah phei chuan (USA, Australia, Great Britain), sorkar tihdik loh puangtu (whistle blowers) ang hiala hman ṭhin a ni. India-ah pawh hetiang anga kalpui beiseina a lian mek zel a ni.

India rama eirukna case lian ber zinga mi 2G Spectrum Scam (Indian Tele communication Scam), politicians leh sorkar official tam tak kankaina chungchanga CAG Report (2008)-ah khan sorkar sum hloh chu vaibelchhe sangkhat chuang (1760 crores) a kai dawn nia tarlan a ni a. He report hi khatih laia Indian National Congress led Coalition sorkara Telecom Minister lar tak Kapil Sibal-an a dik lo hulhual (completely erroneous) tiin a lo sawisel a. Heti hian - “we are extremely pained at the methodology adopted by CAG. But it is human to err and to err is human” (NDTV, 2011) a tih chu Supreme Court Justices GS Singhvi leh AK Ganguly ten na takin an lo khak tawh a. An chhunzawm zelnaah phei chuan 2G Scam chhuitu Central Bureau of Investigation (CBI) in he a thusawi hi an lak chhunzawm ngei kan beisei an ti hial a ni. (NDTV Jan 21, 2011).

Sorkar tih dik lohte pawh thup awm lova tarlang ṭhin report a nih avangin a rintlakin a zahawm a ni. Tunhnaia ziaktu ṭhenkhatten a dikhlelna (fallacy) nei anga an ziak pawh hi a pawi hle. Mahni Party vawn lai kan hum him (defend) duh luatah khua kan hmu lo a ang riau mai!

3. NLUP - Prime Minister’s Special Package?

He report hi a hlutna leh sawi zui a hlawh chhan ber nia lang chu, mipuite thil hriat chak ber leh rinhlelh ruk, a chhanna chiang kan hriat si loh - NLUP hi Prime Minister’s Special Package aṭanga pek a ni em? tih tihchianna hi a ni. Tuna kan ram hruaitu lu berin a campaign laia Thenzawl (22nd November, 2008), leh hmun danga a sawi, “NLUP hi Prime Ministers Special Package aṭangin kan pe dawn a ni” a tih chu an han pe ta a, a lo ni reng reng lo chu niin. Ram hruaitute’n State Budget nghawng vaibelchhe sang chuang a dawt an sawi hi a serious em em a ni. 14th Finance Commission-in State tinte kan budget chu chawfun peka a tela min pek tawh thu kan hre vek. Chu chuan NLUP pawh pek a tih awlsam dan te a hre phak an tam. State Budget aṭang pawh chuan lo pe pawh ni tehreng se ram hruaituten dawt an sawi kher hi a pawi lai chu a ni a, ram mipuite zah lohna a kawk thei tlat. Dik tak chuan CAG Audit report hi lo chhuak ta lo se mipuite hian thu dik kan hre lo mai awm mang e!

4. NLUP Vis-à-vis Land Holding System

NLUP hi a hmingah reng pawh ‘Land Based Development Policy’ a ni chung a, ram neih dan leh hman dan siam ṭha hmasa lovin bul an ṭan hian ruahmanna ṭhat tawk lohna a nei a tih theih. Professor pakhatin a comment naa Village Level Committee ṭheuhten an ram an survey ṭha lova; sorkarah information pe lovin an tihtur an ti lo zawka a chhuah phei hi chu a zialo lam deuh a ni. NLUP an kalpui hnu kum 7 hnua NEDP kalpui a nih hnu chauha Land Reform Policy sawi rik a ni hian sakawr hmaa tawlailir dah (putting cart before horse) a ang mah mah zawk. Khaw tin aṭanga land holding data pekkhawm chawp aṭanga sorkar policy innghah chi chu a ni lo. Hlawhtlinpui tham leh awmze neia ram hman dan chungchang chu rorelna in sang (State Assembly) a sawi fel (legislate) chi a ni. Dan siam tura kan thlan lalte hian hemi chungchangah hian kut thlakna an neiin a lang lo bawk.

5. Micro versus Macro Development

Kan hriat angin 2011-2016 chhunga NLUP atan sorkar sum sen ral hi vaibelchhe sanghnih zanga leh sawmnga pahnih (2524 crores) vela chhut a ni a. Keini ang state rethei atan chuan a tam ngiang mai. Amaherawhchu, en maia a ṭhat viau lai leh mirethei chawikanna hawi riauva a lan laiin ram ṭhanna (growth) min pe tak tak tur chuan a lo ṭha lem lo. A kalphung (pattern) hi mithiamten micro development an tih ang deuhvin development te thamah a ral vek a ni ber e. Sum tam tham sen ralna ni mahse, a dawngtutea a thlen dan erawh chu ‘saṭahchhuakpek’ ang chauh a ni. Khawpui milian fate nikhat bazarna ang lek chauh a ni. A kalphung hi ‘micro development’ dik tak a ni. Dinchhuahna lam aiin ṭamchhawlte chhawkna a ang mah mah.

Dik tak chuan keini ang ram rethei, vantlang mipuite inṭawm thil nei chhe em em tan chuan hmasawnna ruhrel lian (big infrastructure) hi kan mamawh hle. NLUP-in hmasawnna ruhrel lian (macro development) - entirnan kawngpui

ṭha, zirna in changtlung, electricity hnianghnar tharchhuah, industry lama hmasawnna, tui supply leh health care leh a dangte min hnutchhiah tlem em em hi a hlawhchhamna tilangtu lian zual ber zinga mi niin a lang.

6. Ram ṭhanna (growth) min pe em?

Kan Parliamentary Secre­tary pakhat chuan NLUP hlawh­tlinna chu ‘sawma pakhat’ (tithe) pung leh Kohhran thilpek

aṭangin a lang chiang a ni a ti a. Tin, UD&PA leh PHE Minis­ter Pu Zodintluanga khan, Varsity Platform (2017)-ah khan Mizoram per capita enin NLUP a hlawhtling a ti bawk. Tunah hian ram pum (national per capita income) ṭhanna aiin Mizoram ṭhanna rate a sang zawk a, chuvang chuan ‘India economic khalhtu’ (economic driver) kan ni a ti bawk. Mahse thil chiang tak erawh chu heng tehfungte hi a rintlak (technical) lovin mipui rilru a dik lo zawnga kaihhruaina (misleading) a ni thei. Dik tak chuan kan state pumpui thawh chhuah Gross State Domestic Product (GSDP) enin India ram state 29 zinga a hniam ber kan ni hian kan economy ṭhan leh ṭhan loh chu a kawk mai awm e. NLUP a pawisa kan sen tamna ber Agriculture & Allied Sector hian tun dinhmuna kan ram economy a dona chu za zelah 12 bawr chauh a ni - a tlem lua em a ni! Ziaktu ṭhenkhat beisei anga kum sawm, sawmpanga hnua par chhuang chauh tur a nih erawh chuan a la pung chhunzawm turah ngai ila. Tun dinhmunah chuan ram ṭhanna chu a la hlat riau a ni.

7. NLUP - state budget aṭang zawkin

He CAG audit report aṭanga kan hmuh tak chu NLUP chu state budget aṭanga pek a ni tih a ni a. Prime Minister intepui aṭanga pek ni ta lovin, Mizoram sum bawma mi ngei pek a lo ni. A lawmawm em em lai chu kan ram mipui retheiten engemaw zawng tala hnemhnanna an lo neihpui ve hi a ni. A tam leh tam loh, ramin a ṭhan pui leh pui loh chu thuhran. Amaherawhchu, kan ram - Mizoram mipui pawisa ngei ni si, mirethei zawng zawng huap lova, Congress Party a hming pe te tan chauh ruai hlui kil theih tura buatsaih a nih avangin ram pawisa hmansualna rawng a kai tlat thung.

Chhungkua in hah taka kan thawh chhuah leh neih chhun chu lungrual takin kan ei ho za ṭhin a ni ngai a. A thawk thei chauhten sa hrang chan bik chu a patling zia lo deuh tlat. Tunlai ṭawng takin a fair lo bawk. Rorel lai party hian an la sem zawm zel dawn a nih chuan rualkhai takin sem tawh se.

Dr. Vanlaltanpuia Pachhunga University College