DIKNA DUH CHU MI HUAT HLAWHNA?

Roman Catholic Kohhran aṭanga in la hrang pa ropui, Prostetant Kohhran bulpui leh Presbyterian Kohhran phei chuan kan Kohhrana pa anga kan neih John Calvin-a (1509 -1564) kha Geneva-ah khan Lal Isua Chanchin Ṭha buaipuiin a ṭul hle a, mahse chutih hunlai chuan Geneva mipui tam takte chu hlemhletna leh dik lo taka thil tih pawisa lo an tam hle. John Calvin-a chuan Pathian thu chang buaipui loin huaisen takin khawtlang nun siamṭhatna (social reformation) a tlang­au­pui nasa hle a.

John Calvin-a chuan hlemhletna leh dik lo taka thil titute chu a do nasa mai a, Lal Isua Chanchin Ṭha hriltu ni si kha Geneva-a roreltu ṭhen­khatten an ngai thei lo a, Geneva khawpui aṭanga hnawh chhuah a ni nghe nghe.

Kum eng emaw zah Geneva khawpui aṭanga hnawh chhuah a nih hnuah a kir leh a, hmanlai huna khaw­pui tawp tak ni ṭhin kha John Calvin-a zarah Geneva chu khawpui thianghlim leh entawn tlak tak a lo ni chho ta zel a ni. John Calvin-a angin Isua rinna kawngah chhuan tur nei loin pasalṭha ni lo mah ila, khawtlang nun leh kan Zoram siam ṭhat kan duhna kawngah John Calvin-a angin ṭhenkhatin min huain, min sawiselin, min diriam ṭhin mahsela kan Zoram a lo thiang­hlim a, tun aia ram nuam leh entawn tlaka kan siam theih nan dikna hi huaisen takin i ṭan tlat ang u.

He khawvelah hian thil ṭha leh thu dik i ṭan avangin mi tam tak huat leh sawisel i hlawh ang! Mihring anga rawn in lan mi dik leh fel famkim kan Lal Isua kha phiarrukna tuarin anchhe dawng Kraws-ah khen beh a ni! Mihring inawpbehna rapthlak leh inhnuaichhiahna tawp khawk, sal nihna rawn nuaibotu, mi dik tak mai Abraham Lincoln meuh pawh kahhlum a ni! Khaw­vel dam chhunga hming dai tawh ngai lo tur, tharum thawh duh ngai lo leh mi dik em em, India hnam pa Mahatma Gandhi meuh pawh rawng taka thah a ni! He khawvel hi zawng dikna duhtu tan chuan a chep ṭhin zawng a nih hi!

Engpawhnise thil ṭha i duh avangin hawtu che tam tak an awm mai thei, chutiangin thil ṭha i duh avang vekin mi tam tak i lamah an ṭang tih hi theihnghilh ngai suh aw. Ring taka kan ṭawng chu theihnghilh a ni ang a, kan nundan erawh chu an hre reng ang. Hriat reng tlak leh entawn tlak nun Zoram tana hnutchhiah turin mitin i ṭang sauh sauh ang u.

- Lalhminghlua NKB