Post Devolution Revenue Deficit Grant

Ministry of Finance-in Post Devolution Revenue Deficit Grant (PDRDG) August, 2022 atan August 3 khan state dang 13 rualin Mizoram chan tur a rawn release a, thil thar ang maiin social media-ah a darh ta chiam mai. A zia lo hle mai, kan sum dinhmun a chhiat em vanga miin sum dinhmun kan ngaihven thar vang pawh a ni mahna...

Kan budget-ah hian sum hmuhna hnar chi hrang hrang kan nei a, chung zinga a lian pahnih chu Share of Central Taxes leh PDRDG hi a ni. Kum 2022-2023 hian Share of Central Taxes atangin cheng vbc. 4,083.24 leh PDRDG atangin cheng vbc. 1,615 hmuh tura ruahman a ni a, hei hi budget buah pawh tarlan thlap a ni.

Share of Central Taxes leh PDRDG aṭanga kan sum hmuhte hi a tam tham a, a dang aṭanga kan sum hmuhte hi a tam lutuk loh bakah, a hmanna tur ruahmansa a ni deuh vek hlawm. Chubangin Share of Central Taxes leh PDRDG hi keini ang state thawhchhuah nei tam lo tan chuan a hlu hle a ni.

PDRDG hi thla tin release ṭhin a ni a, Share of Central Taxes erawh release hun bik a awm lem lo. August 3 a Ministry of Finance-in PDRDG release hi kalphung pangngai a ni a, August atan cheng vbc. 134.58 an rawn release mai a ni. Tun lai kan sum dinhmun nen kaihkawp chi a ni lo. Kum 2022-2023 April-July chhung pawh khan thla tin PDRDG hnuaiah hian vbc. 134.58 rawn release char char a ni.

PDRDG hi thil thar a ni loa, kan sum dawn tura 15th Finance Commission-in min recommend angin central-in thla tin an release thin angin August atan an rawn release a nimai. 15th Finance Commission hian PDRDG-ah hian 14th Finance Commission aiin min recommend hniam a, kan hmuh a tlem sawt hle a, keini ang state tan chuan thil pawi tak a ni.

Tin, kan hriat tur chu PDRDG hnuaia release cheng vbc. 134.58 hian sorkar hnathawk thla khat hlawh chanve pawh a daih teuh lo a nia. Sorkar hnathawk, a bik takin a nghette hlawh pe tur chuan Share of Central Taxes kan hmuh phawt a ngaih ka ring. Contractor leh Supplier bill ba, pension-a chhuakte pawisa hlawh tur, buhfai man, kawlphetha man etc. ngaihtuah ngai a la tam lutuk.

A hre lo zawkte bum i tum lo ang u. Tunlai sum harsatna nen sawizawm phet tum chi a ni lo. Kalphung pangngaiin kan budget-a ruahman sa vek central-in an rawn release mai a ni e. State dang pawh 15th FC-in PDRDG dawng tura recommend-te chu release sak vek an ni.

- Malsawmdawngzela Hrahsel