Catch Them Young
An naupan lai aṭangin zirtir la, nakinah an la hlawhtling mai ang. Puitlin tawh hnua inzir ṭhat leh hluai ai chuan, kawng kal nei sa deuh taka naupan lai aṭanga inzirtir hi hnampui zawkte pawhin an tih ṭhin a ni - keini pawhin entawn ila a fuh a ang.
Tun hnaiah pawh "Catch Then Young" rah chhuah pakhat kan hmu, a hming chu Jeremy Lalrinnunga a ni. Ainawn Veng rawlthar hian Commonwealth Games-ah India tan weightlifting huangah gold medal a chawi chhuak.
Mizo chauh ni loin hnam hrang hrangin lawmpuina an ziak nasa. Mizoram Pradesh Congress Committee President Lalsawta chuan, catch them young chhuak a nih thu leh a lawmpui thu a rawn ziak. Hei hian tualchhung bikah chuan titi a ti tam zual niin a lang.
Govt. Complex, Aizawlah 2010 September 24 khan Weightlifting Academy din a ni a, heta ṭang hian Jeremy Lalrinnunga hian bul a ṭan. Ani rual hian Zakuma leh Jacob Vanlaltluanga te pawh 'Catch Them Young' policy aṭangin an chher chhuak bawk.
Anni pathum hi 2013 khan Army Boys Training Centre-ah an chhuk a, he hmuna awm tur hian trial an paltlang. Anni pathum hian international medalist vek an ni a, a bik takin Jeremy hian hma a sawn a, tunah hian Vision Olympic zinga mi a ni.
Khawvel huapa Mizoin hlawhtlinna kan chang a, political party pahnih MPCC leh MNF te chuan an chherchhuah leh anmahni siam chhuah nia ngaiin, midang fak leh sawi pawh nghak zo loin anmahni leh anmahni an infak zung zung mai a nih hi maw.
An infakna leh thu inchuh hian mipuiah eng angin nge nghawng a neih chu ka hre chiah lo, mahse politics ngaihsak lem lo mipui nawlpui chuan heng political party pahnih thu inchuh hi a 'ho' kan ti tlang viau niin a lang.
Tu sorkar laia chawr chhuak pawh ni se, Mizoin hlawhtlinna kan chan hi a lawmawm - fak tur ber chu Jeremy Lalrinnunga a ni. A phena mi pawimawh tam tak chu an awm ngei mai, mipuiin thil nihna tak chu kan hre tlang; catch them young hunlai aṭanga chawr chhuak ngei a ni.
Infiamna huangah chauh a ni lo, lehkha zir kawngah pawh hian naupan lai aṭanga inchher hi kan tih tur a ni dawn lawm ni? Mizoram Youth Commission hnuaiah 'Super IAS' kan ti mup mup a, hengah hian puitling tawh sa te chu sorkar sum tam tak sengin lehkha kan zirtir.
Sum tam tak sengin kan bei a, vawi lehkhata hlawhtlin nghal theih chu ni lo mah se a awlsam dawn lo niin a lang.
Graduate tawh hnua inhrual ai chuan, kum naupang deuh leh thluak ṭha kan neih - civil service lama tuite hi thlang chhuak ila, an naupan deuh lai hian kaihruaiin sum nen vur zawk ang u hmiang.
College an zirlai aṭang talin hrual ni se, chumi hnua inhrual thar leh ngawt ai chuan a thawk na zawkin a rinawm. Sum kan seng a, sorkar pawisa hmangin lehkha kan zir ta sa sa, an naupan deuh lai aṭangin IAS turin i chher ang u.
- Lal Thansanga