NAWRH LEH THARUM THAWH
Mizo Union nawrhlai kha ka hre pha ve a. Khawlaiah kawng zawhin khuangpui nena inawihte kha ka hre ve phak a. Naupang chhia, a dik a dawk thlu ve lote pawh tlai kawngzawhah chuan min teltir ve ṭhin.
Kan lal kan au khumna ka la hriat reng chu ‘Laltawn, beng hmul’ tih leh ‘Laltawn, beng hlai’ tih te kha a ni a. A nau kan aukhumna chu ‘Thang awr bawk’ tih ni. Tun hnua ka ngaihtuah leh hian a changkang lo ang reng. Pa dam reiho hi an beng a hmul vek a, beng hlai takho hi an dam rei deuh zelin ka hria.
Ka sawi duh tak chu, khatianga kawng zawha au rual kha mipui bawl nan chuan a tawk tiu teu viau lo maw? tih hi a ni. Ram changkang zelah hnamdang tih dan ṭha lem lote pawh ka duhzawng au chhuahpui nan kan hmang ta zel hi Kristian thlirna aṭang chuan thil dik ni theiin ka hre lo.
Ram mipui leh sawrkarin a tawrh dan tur leh a pawi theihzia ngaihtuah lovin nge, hre duh lovin kan ti dawn, ka hre lo. Kawngpui dan chah te, office kal tur dan te, mipui pawn chhuak thei lova siam te, sawrkar in leh bungraw tihchhiat te, hal te kan ti ve ta zel a. Tharum tel lo chin hi chu maimichhing chunga ngaihhnathiam theih niin ka hria. Amaherawhchu, tharum tel chin hi chu Kristiante tan tih ve chi a ni lo va, van lam khian a ngaihhnathiam ka ring thei lo. Thunung, Bible thu nen a inrem thei lo.
Kan pi pute puithuna pakhat chu hei hi a ni. ‘Thinur nikhuain bungraw chungah ṭuan loh tur. Thinur vanga bungraw tihchhiat chu a malsawm lo ve’, tih hi. Kan ṭawng tu huatthu ni suh sela, tu kan tih bikna pawh ni hek lovin UT hun lai aṭang tawh khan sawrkar in leh bungrua tichhe zawnga chet hi a awm ta fo va, a pawi hle. A titute lah sawrkarin a hre lo nge a puang mang si lo va, P.U College Library hal te kha, lehkhabu pawimawhzia leh uiawmzia hre pha chin chuan kan ui tawp thei dawn lo a nih hi!
Khua in zah a ngai ang a, sawrkar bungraw tichhetute chungah chuan eng em thleng lo turah ngai ila. Kan ram pachhe tak, mahni khawpui ber kawngpui pawh siam ṭha hlei thei lo khawpa sum tlachham tan chuan motor pakhat pawh hi a va uiawm em!
Hawh u, Kristian kan nihna hi Biak in pawn lamah, kan ni tin nun leh sawrkar auh eih kan tumna kawng tinrengah i lantir ang u hmiang. Pathian malsawm tlakin nung ila, kan vela miten an hmu ang a, kan Pa vana mi an chawimawi mai ang.
- Lalbiaktluanga