Sum harsatnaah tunge thupuangtu ni ber?
Hman ni khan Sports Minister chuan Mizoram sum dinhmun hrang hrang social media lamah a lo puang hluai tih kan lo hmu ve leh a.
CSS sum sorkarin a lo hren khawl reng a pe chhuak thei kha sorkar a fakawm te a rawn ti lehling a, chumi hnu lawk chuan Rural Development Minister chuan Mizoram sum dinhmun a rawn sawi ve leha sorkar hnathawk hlawk lak hun turte thleng thlengin a lo puang bawk a ni.
Kan hlaah khan "Zawlnei dang puansak reng kan ngai lo," tih a awm laiin kan Finance Minsiter kan chhan luatah kan ti dawn nge, kan Finance Minister kan TLAWN luatah kan ti zawk dawn nge, kan Finance Minister a bihruk tlat avangin kan ti zawk dawn nge kan sum dinhmun chu a hman hmanin kan han sawi fiah ta bawrh bawrh mai ṭhin ta mai chu a nia.
Sorkar kalphung awmze nei leh mumal deuh tak kan neih ve kan lo beisei em em laiin hetiang vel hi Mizoram sorkar sum dinhmun mipuiin kan lo hriat ve theih dan chu a ni ta mai hi a bangbo thlak letling viau a. Sorkar ber hi a mumal tawh loh chuan mipui lam phei chu kan hawihai der a ni ta ber mai. Sorkar ṭha nei ila mipui chuan thuawi takin kan zui zel mai tur a nih laiin sorkar kalphung mumal ta lo lutuk hian mipui min ti luhai hle a ni.
Hetiang hi MNF sorkar kalphung tur atan kan ruat phal lova, a Chief Minister ber a ngawih tlat chu thuhran ni se heti zat Cabinet Minister an awl laia Protocol lam aṭanga teha a chung lama awm pawh ni lo Minister of State pahnih an rawn ṭawng chhuak ta hlawl mai hi sorkar kalphung atan thil dik lo tak a ni.
Tichuan kan sawi ta zel ila, kan ram sum leh pai dinhmun sorkarin official takin thui takin a sawi fiah tawh a, kha kha mithiam ziak leh thil awm dan dik sawi chianna a ni. Kha kha i ring tlang mai ang u; tuna taka a phur phurin kan sum dinhmun an rawn sawi fiah ve leh ta mai hi chu ram kalphung atan thil ṭha lo zawk a ni thei dawn tlat.
Kan Minister te pawh hian ngawi reng loin Cabinet Meeting te kovin Party mumal tak an nih angin spokes person felfai deuhin inruat ta se a ṭhat a rinawm mang e.
- Lalthanmawia