June thlaa Grade III MHS lak dan kha

Tuna kan sawrkar chak tak hian sorkarna an chelh leh ṭan (Dec, 2008) hnu lawkah Mizoram Health Department la neih ngai reng reng loh “The Mizoram Health Service Rules, 2009” leh “The Mizoram Health Service (Competitive Examination) regulation 2012” chu hman nghal theihin kum 2012 khan an siam puitling a. Hun reilote chhunga kan Medical Officer-te lak dan tur felfai tak an han duang chhuak chu an fakawm hle a ni. Amaherawhchu, hetianga Service Rules leh Examination regulation ṭha tak siamtute hian kum 2012 hnuah ṭum thum lai Medical Officers za (100) chuang teh meuh an la tawh a. An dan siam anga la loin personal interview chauhin Medical Officers leh a dangte chu lak an ni leh lawi si hi thil mak tak chu a ni.

Tun ṭum June ni 1-13 (2017) chhunga MPSC hnuaia personal interview aṭanga lak doctor 26 (sawmhnih paruk) chungchanga sorkar chhuanlam ber chu Champhai mipuite nawrna vang niin an sawi a. Champhai khawtlangin an nawr hma daih hian Health Department lam aṭangin doctor 26 lak tura ruahmanna hi chu tihfel a ni tawh. Champhai ho nawrhna kha sawrkar thil tum tih hlawhtlinna remchang tak a lo ni ta hlauh zawk niin a ngaih theih ta a ni.

British India hunlai daih tawh aṭangin sorkar hna lian chin thawk turte lak nana thil felfai thei ber chu competitive examinations (written leh personal interview) kal tlanga lak hi a ni tih finfiah a ni tawh a. Hei aia dik leh fel zawk hi vawiin ni thlengin kan mithiamten an la hmu chhuak lo a ni. Kan ram ngeiah pawh hetianga competitive examination kal tlanga lak IAS, Central Services, IFS, MCS, MPS, Engineering Service, MFAS ets te chu kan en dan pawh a dangin hetiang service a tlin tuma bei ve si tling zo ta lo te pawhin an tlinlohna an pawm thiam tlangpui ṭhin.

Tun hma lam kha chuan MBBS zir chhuakte an la tlem bakah service dangte angin Medical Officer lak dan felfai tak kan la neih loh bawk avangin personal interview hmanga Medical Officer te an lo la ṭhin kha tih awm tak a ni. Tuna doctor zahnih (200) aia tam mah sorkar hna hmu lo kan lo neih chhoh tak hnu hi chuan Medical Officer te lak dan tur kan legislature-te meuhin an siam tawh hi chu palzut mai mai lova lak ṭhin hi tih makmawh a ni ta.

India ram medical college hrang hranga doctor zir turin Mizoramin quota a neih ve seat sawmthum (30) bawr vel chu inchuhin kan tu leh fate class 12th Science zir zo sang hnih (2000) chuang zet zingah competitive examination kum tin conduct ṭhin a ni a. Heta a thiam bik mi sawmthum (30) bawr vel thlan chhuah te chu an tih ṭhat dan indawtin chung Medical College hrang hrangah te chuan MBBS an zir ta ṭhin a. Mahni sum senga medical college ṭhen ṭhena lut ve pawh an awm nual bawk awm e.

Heng Mizoramin MBBS seat a neihna college te hi India ram level-ah an standard a inthlau hlawm viau mai. General line a zirna college te an grade a inang lo ang chiah hian doctor zirna college te pawh hi an grade a inthlau viau hlawm a ni. An grade hrang hrang han tarlan kher chu ṭul lovah ngai ila. Hetiang a nih avangin doctor 149 bawr vel zinga doctor ṭha sawmhnih pathum (23) thlang chhuak tur hian kan MPSC member-te tan hian thil awlai lo tak a ni ngei ang. Minute 10-15 chhung lek interview na aṭanga an thlan chhuah doctor 23 te aia thiam leh ṭha zawk hi an awm ṭeuh ang tih a rin theih nghal a ni.

Mizoram hi India ram state zinga te ber pawl, mihring nuai sawm zet zawt awmna, han inchhui chiana in chhungkhat hnai thei mai zel ṭheuh cheng ho kan ni a. Sakhuana lamah Isua Krista ringtu hlang awm khawmna state kan ni. Kan sawrkarna chelh mektute phei chuan an lal (Dec, 2008) phat aṭang khan Amosa 5:24 (Bible ami) chu ram Thuvawn-ah neiin rorelna dik leh langtlang sorkar siam ngei tuma hma la an ni. Kan ram hriselna kawnga min kaihruaitu tur Medical Officer-te laknaah dan awm sa palzut a, awlsam taka interview conduct tir mai hi chu ti tawh lo hram se a duhawm hle ang. Keimahni Mizo ṭhalaite ngei lakna tura depde taka thil kalpuitu nih hi kan hotute hian an ti nawn leh ngai tawh lo turah ilo ngai phawt mai ang u.

- Ramhmangaiha Pachuau, Aizawl