PHE ṭangkaina ka hre ve chauh
PHE department hi tun hnaiah sorkarin a remchang zawk tiin a hming a thlak a, mahe kan la bel loh vangin ‘PHE’ tiin ka la sawi hram rih dawn a ni. He department hi han en mai chuan sorkar department pakhat, mipui tana hnathawk ve mai angin a lang ve tho. Mahse Aizawl khawpuiah tui kan han nghei chiah chu department dangte nen chuan a lo inthlau thei khawp mai.
Mizoramin tun hnaiah ruahsur nasa vangin chhiatna nasa tak kan tawk a, mi 10 chuangin leimin vangin an thih phah a, tuilian hi chhungkaw tam takin an chhiat phah a; Tlawng lui lian chuan nasa takin Aizawl khawpui min nghawng mek a, eng chin nge min nghawng dawn hriat a la ni lo. Kan la buai dawn chauh pawh a ni mai thei.
Aizawl khawpui chu Tlawng lui tui hmanga ei leh in tur ‘tui’ hmu ve chauh kan ni a, Tlawng lui hi kang ta se eng tin tak awm ang i maw? Tunhnai ruahsur nasa khan tui a tilian a, PHE-in Aizawl chawmna tur tui an lakluhna khur thuk em em mai chu hnawl leh chirhin a chhilh hmuk mai a, a chhung thuk taka tui an pump chhuahna khawl lah chu siam mai theih loh khawpin a tichhia a, tui pump chhuahna khawl a chhiat takah chuan kan buai ta hle.
A awmzia chu Tlawng lui kamah PHE ten khur thuk tak an siam a, chu khurah chuan Tlawng tui chu a luang lut a, chu chu khawl hmangin an pump chhuak leh ta ṭhin a ni. Chu khur thuk tak chu hnawl leh chirhin a chhilh a, a khawl ber a tihchhiat takah chuan tui kan nghei ta rup mai a ni. A tirah a changtu Minister-in engineer te nen a hmunah an en nghal a, theihtawp chhuahin engineer leh thawktute chuan hma an la a, mahse hna sawt tak a ni thei lo.
Tui pump-na ber a chhiat takah chuan Vaipuanpho tui cravity-a an lak chu an pump mek a, harsatna lian lutuk tawk lo thei tur ang berin thawktute'n an thawk a, mahse duh khawp a ni lo. Serlui pawh Dihmunzawl thlengin an luan luhtirna pipe leimin-in a tihchhiat leh zel avangin harsatna a chhawng a, hei tal hi chu ṭha se a pangngai deuhin tui an pump thei tur. Chhe lo tura ngaih a chhe leh zel si hi kan harsatna ti liantu niin a lang.
Tui han nghei meuh chuan PHE ṭangkaizia ka hriat chhuah phah a, kan ei ber a nih bawk si avangin an hnathawh hriatpuina chin a awm phah bawk. PHE-in tuna chhiatna tawh mek hi theihtawpin hmala se, a pangngaia mipuite tui min pek leh theih nan a sura sa hnuaiah, chhun leh zan sawi loa an thawh rah hi mipuiin kan ṭangkai pui thuai i beisei teh ang u. Tui-a harsatna hi a namai lo si a.
- Lal Rinmawia