Hotute sum duh luat mipuiin an tuar
Mizoram sawrkar hnathawkte'n thla liam ta, July thla hlawh an la thei rih lo mek a nih hmel a. Thla tawpah emaw, thla tir, ni khatnaah emawa hlawh la ṭhin khan thla thar hnua chawlhkar khat a liam hnuah pawh hlawh an la la thei lo a; kan Mizoram sawrkarin sum nei tlem miau hek le.
Mithiam zawkte sawi danin, Mizorama hmasawnna lam hawi hna thawhna sumte hi sawrkar laipuiin aṭanga a hranpaa hmuh ni ṭhin mah se, state sawrkarin eng emaw zat a tum ve zel a ngaih avangin, Mizoram sawrkar sum tam tak a kal ve zel tho a ni àwm a. Phûl lem an phahna te, airport cute ber siam tuma hna an thawh te, hna dang dangte pawh central-in sum tam tak rawn tum mah se, Mizoram sawrkarin a sum a hman tel ve zel a ngai tho niin a lang a. Kan mamawh hmasa ni lo leh a loa kan awm theih lohna ni si loa kan sawrkarin sum tam tak a hman avangin ram pumin kan tuar ta a; sawrkar hnathawkte pawhin a hunah hlawh an lâk theih loh phah ta a nih hi. A pawi ngawt mai.
Hmasawnna lam hawi hnathawh tam tak hi thil ṭha a nih tho rualin, eng emaw zat hi chu kan mamawh hmasa erawh a ni lo. Rilrua awm dan tak han sawi ta ila, hmasawnna hna an thawh tam takah hian ram hruaitu lute zinga tu tute emaw hi chuan nasa taka an hlâwkpui ngei ka ring nghet bur mauh mai a. Entirnan - khelmual hrang hranga phûl lem an phah hian khelmual awmna khua leh veng mipui tan chuan a lawmawm ngei mai a; mahse, hlâwkpui bertu chu ram hruaitu lute zinga mi tu emaw a nih ngei ka ring. Phûl lem phah a tam poh leh a hlâwk zual sauh zel pawhin ka ring tlat zu nia!
Airport chei ṭhatte hi aw... Kan pu ber hian bank account lamah chuan a hlâwkpui ber hian ka ring bur mai a; hemi chungchanga ka rinna hi Kristiannaa ka rinna ai mah hian a sang zawk mah awm mange, te ka ti rilru rum rum!
Hna hmanhmawh thlak bik a ni lo chunga restricted tender hmanga an thurualpui theih tur an thawhtir chat mai te, hna lian - sum tam tak sênna tur ni si, contractor level hniam tak an pe tlat mai te, work order chhuah hma hmaa hna an inthawhtir ṭan ngawt maite hian ka rinna hi a tinghet fu mai.
Kan hotute hian mawi leh mawi lo leh mi ngaihdan tur pawh dáwn zo loin, an bank account vûm thûr tur mitthla rau rauh chung leh, inthlan leh huna an sum hman tur thlir rânin sum an zawng vel ta niin a lang. Hetiang zel a nih chuan, kan ram hmabak hi hmuh ên a har a ni.
Tu tute emaw sum duh lutuk hi kan leh mipuite'n kan tawrh zel loh nan ram hruaitu te, sawrkar hnathawk te, mipui nâwlpui te, kan zavai hian i harh mawlh teh ang u.
- Zoramchhana