MNF, Cong leh ZPM fimkhurna turte

Kum 2023 nakum mai hi inthlan pui a lo ni leh ta, tuna a lan dan hi chuan sorkar tur chiang sa an la awm lo.

MNF hi sorkar lai an ni chungin Covid hripui vang te, an pawisa neih loh vang te, hruaitu ṭhenkhat khawsa zia vang te hian mipuiin an ning na tawh hle. Congress hi a hmaa party lian leh ruhrel nei ṭha ni ṭhin kha an rawih ṭan a, ZPM hi thatho taka kal ṭhin kha neuh neuh an neih avangin an fimkhurna tur tlem ka han sawi ve dawn a ni.

MNF:-

MNF fimkhur na tur lian ber chu an Minister ṭhenkhat hi an thuhruk a ngai. Tuna an khawsa zia en hi chuan mipui 95% deuhthaw hian a ninin an ning tawh. Social media lamah tu emaw a lo lan hian thil ṭha ti eng ang pawh ni se a zatve aia tam daih hian an duh lovin an ning a, an nuihsawh bakah ṭhenkhat chuan thinrim taka an sawi zui tawh avang hian hei hi 'hlauhawm chhinchhiahna' a ni tih MNF hian hre tawh rawh se. "SEDP kan sem anga kan tling thovang," ti suh se, Congress khan nuai 1 a taka sem chungin an tla a, nuai 3 tiama cheng 50,000 lek sema tlin chi a ni tawh lo. MNF ruhkawl khan MNF an sawiin nangni leh vangvat kai an lang tawh lova, in Pu leh amah tlawntu Minister pahnih pathum intilar chiah an lang tawh tih hre rawh u. Hei hi Hnam Run hian a hmeh mih loh chuan Kamrul-a vang ni lo pawhin in tla thum dup thei a, mipui lawm hlawh tum luata media lawm huam huamten MNF ninna an kui ṭiak mek a ni.

Congress:-

Congress hian ram pum dap chhuakin Unit leh Block neiin Chakma leh Tuikuk zingah pawh voter nei ngah angin inchhal engang mahse 'That loh theih lohna bawm' tih ringawt hmanga inawi nun leh hi tum duh tawh suh se, a bawma an luhpui tur hi hman ni lawka Minister mipui nin em em te, worker inluling te, supplier leh contractor duhsakna uchuak tak dawngte kha an la nih avangin mipui an ko lo. Congress tan hmel thar zawrh thiam a ngai a, President kumhlun hruaitu chak tak chawlh tak avanga Congress thar ta hluai anga lan tum hi President kal chhuak kha a mawh zawng zawng phurhtir tum na a ni. A mihring ngai, mipui hne tawh leh paih tawh 10 rual vel hi chawlh tir ngam se, hei hi an fimkhurna tur a ni.

ZPM:-

Mipui boruak kengtu leh neutral ṭan rawn deuh ber an ni chungin ZPM hi anmahni leh anmahni hi an inbuan tawk thial thial ang mai hian media lamah an lang. An chungril nun zuk hre phak ve se su lo mah ila midang aia ṭha bik leh thianghlim bik anga inlan tir tumna hian mipui a ko lem lova, "Kan thiam loh leh ṭhat loh ang ang hian sorkar ṭha zawk, eiru lo zawk din kan tum," ti zawngin au hla nei mai se a ṭha ang. ZPM hian sorkar an tum chuan Lai leh Mara ADC lam bakah Chakma ADC lamah kua an hreuh a ngai, hengte hi a tawpah vote belhkhawmah chhiar tel an nih avangin saw lama tereuhte ni chunga ram pumna sorkar tum hi an fimkhur a ngai .

- Lalhruaizela