Engineer tak tak ka hmu!

Kumin furpui inṭan­tirh, 12 & 13 June, 2017 ruahsur nasa lutukin NH 54, Chhingchhip khaw chhunga leilawn titla­hniam a, eng motor mah kal tlang hlei thei loin a awm a, a lu hai thlak hle a ni.

Hetiang dinhmuna kan din lai hian PWD, Highway changtu, an hotute lam pawh an bengngawng ṭhut ngawt lo a ni tih khaw mipuiin kan han hriat hian a lawmawm a. Leilawn hi hmar lama a foundation nen a tlahniam a, chu chu a siam ṭhat dan tur an ngaihtuah nghal a, a piah deuhah a foundation hran an buatsaih nghal a, a leilawn zawm sei belh deuhva siamṭhat an tum a. Tihlaiin an hotu, Highway Chief Engineer chuan a leilawn zawm belhna tur chu hmun dang aṭanga ngaihtuahin, ni 17-6-2017 hian an han phur thleng a, a lawmawm hle mai. Mahse heti chung pawh hian a khaw neitute chuan eng tikah tak dawh zo ang maw tiin, kan la beidawng hmel hle awm e.

Hetiang dinhmuna kan din lai tak hian a ni engineer tak tak chu a lo inlar tak ni. Ni 18-6-2017 (Sunday) a lo thleng a, zing lamah an Chief Engineer, Pu K.Lalsawmvela a lo thleng ta der mai. A hnathawh dan turte han ruahmanin, Sunday nileng ṭhakin hna chu an thawk ta mai a. Tlai lam a lo thlen meuh chuan a leilawn pawh zawm sei belh theih mai turin an peih chu a ni ta nghal ut mai a. He Sunday kher kher hi chuan an rilruah Pathian biaa inkhawm lam reng reng a lang lo, anmahni hna pui ber, Pathianin an ei­zawn nana a pek lamah an rilru chu a full-in an pe a ni ber awm e.

A ni CE ber pawh chuan chang dang kan tum lovin, a hmunah, a naute hnathawk a vil a, tih tur ang angte a hrilh zel a, a chang leh amah ngei pawhin a’n khawih pui ve ang bawrh bawrh a. Zan khaw thim hnuaiah thleng khan ama ho hian zuk thawk zel a maw le! Hetiang taka mahni hnaa inpe zo Chief Engineer kan ramin a lo nei hi a ropui a ni.

CE hi Kohhrana a dinhmun te ka’n zawt fiam vel a, Sunday sikul zirtirtu a ni a. Kohhran ṭhenkhat hi chuan Sunday hi kan ngai pawimawh khawp a. Kan engineer pa hi thunun ve mai tur a ni ang em le ti tein ka inzawt hial a ni. Mipui harsatna sut kian sak turin a ban a phar a, hei zawk hi Pathian rawngbawlnaah a ngai a nih hmel. Kohhran te pawhin in beng lo chhut chhet sak ula.

Hetiang taka ram leh mipuite harsatna sut kian duh mi engi­neer kan nei hi a ropui a ni. Chawlhni bawhchhe khawpa a thawhna avangin hei kawng ṭha kan nei leh ta ni.

Tunah chuan NH 54 kawng kalna lam pawhin ration buhfai leh thil dangah kan harsatna a bo ta a, kan lawm tak zet zet a ni.

Helai lei tlahniam hi tuihawk tam luat vang niin sawi a ni a, mimal pakhatin culvert a dan pin tlat vanga chhiatna hi thleng nia sawi a ni bawk.

Chuvangin, he lai lei hi a tlak hniam zel loh nan thuneitu lamin culvert dan pin hi a hawn dan ngaihtuah sela a ṭha awm e. Chhiat lehzualna a thlen hma hian.

- Patrick Z, Chhingchhip