KA DUH LEH KA MU ANG

Mu vum thur rawh, ti khan chaw nghei ṭhak khawpin mu rawh tia nu pakhat ang tun tun hi ka hre tawh a. A mak khawp mai, mu thei hrim hrim hi an awm pek, tho fuh lo phei chu an tum bur a, melh ngai an melh reng chuan biak ngam pawh an ni lo.

Hnathawh nei hran lem lo, zan men rei leh zing thawh tlai hi tunlai ṭhalai tam zawkte hri vei a ni. Tunlaiah chuan phone-a thil en leh inbiak neuh neuh tur a tam tawh khawp a, puan hnuaiah pawh an en tlaivar ṭhak thei.

Kan ṭhian, Phone-lawma kha, sa pan thlirthler a ni a, a ṭhu hlek hi a chhing nghal mai zel a, chhun zan zawmin ka mu thei zu ti a! Mut samlam chuan khawi hmunah an lu leh lukham a indeh rual hian a hnar nghal bawrh bawrh thei tlat.

Chauh vang pawh ni hran lo, mut chhuak ngawih ngawih chang a awm angin mawlhtu awm vang nge ni, mut chhuah miah lo chan a awm fo a, nghate rep angin an meng kar a, mutthilh tum eng ang mah se, an harh tulh tulh emaw tih tur hi a ni - manganthlak tak a ni.

Ṭhalai lam hi chuan mut an duh a, upa lam tawh hi chu mut an harsat. Kum 50 hnaih dawn hi chuan an tho hma thei khawp mai. Upa lam chu khawvar rual velah an taksa a kham ṭhemṭhum a, an tho a, an tei sek tawh mai a ni.

Hrisel pangngai hna­thawk mi tan chuan awm mai mai leh mut reng hi inhremna chi khat a ni a, taksa che reng ṭhin an nih avangin khua an zuam lo deuh pawhin an che tho ṭhin. A bik takin kan nu leh pa leh u zawk te hi hna hram thawk ṭhang, che bawrh bawrh ṭhin an nih avangin an upa hnu pawhin che loin an awm thiam tawh lo. ‘Lo awm mai mai rawh’ kan tih hian kan khuahkhirh zawk a, an dinhmun hriat thiam a, an phak ang tawka zalenna siamsak a pawimawh hle.

Hnathawk mi leh virvat ṭha tan chuan awm mai mai leh mut reng hi hrehawm tak a ni. An thisenin a ṭhan­hnan tawh avangin chet reng an mamawh fo. Amah­erawhchu, hriselna ṭhat vak loh leh upa tawh hnu chuan rilruin hre reng mah se, chaknain a tlin tawh lo. Damlo tan ni khat hi rei tak a ni a, dam hlutzia a tilang thung. Khuahkirhna hnuaia darkar khat mut theih loh pawh hi a rei duh khawp thung.

Kan hun neih dan leh kan taksa mamawh tawka mut hun bithliah thiam hi a finthlak. Zan mut hma a, zing thawh hma a finthlak ber. Exercise lak (Walk) tam a pawimawh, a hun takah thawk la, mu la, tho hma la, i harhvang reng ang, i thau luah lo bawk ang.

Dam pangngai reng sia mu tam lutuk hi a tlangpuiin an thatchhe duh a, khua an zuam lovin an ṭuan a fum bawk. Mahni taksa dinhmun mil tawka mut thiam hi a pawimawh a, men rei chang a awm pawhin in duat thiam a ṭha. Hrisellohna avanga mut tam erawh thu hran.

Tunlai ṭhalai tam zawkte hi a hunin a zir vang nge ni, zan men rei leh zing tho tlai an tam ta hle. Hna pawimawh avanga men rei chu thu hran ni se; chu ti lova phone khawih nan leh thil pawimawh ni loa men rei hian min tichau a, a hrisel lo a ni. Mi ten khawvar rual vela hna an thawh vut vut laiin kan la hnar burh burh chuan kan hmabak a eng lo ngawt ang le. Mahni invawng peih lote hi pa rawn, nu rawn an va’n ni har dawn tak em.

Mu tam reng reng hi an hrisel ngai vak lo. Thisen sang, lu na, tha na, taksa kham bakah chaw ei a tui mawh a, an rit nulh ṭhin. Chuvangin, mu tam lo la, taima leh harhvang nih tum rawh le. ‘Mu rei suh, miin an thawh khalh ang che.’

- Zalianthanga, Tahan