Jeremy hlawhtlinna leh politics

Mizo tlangval Jeremy Lalrin­nunga chuan Common­wealth Games 2022 neih zawh takah Kg 67 category mipa weightlifting ah Gold Medal a dawng a, Zofa zawng zawng han ke khaia lawm tur a ni. Jeremy hlawh­tlinna a thlen rual hian lansarh tum an lo lang rual ta ṭhawt ṭhawt a, chutah chuan politician pawh an tel.

Jeremy hi naupang vannei tak a ni. A naupan laiin "Catch Them Young" prog­ramme Mizoram sorkar hnuaiah an veng lamah Weight­lifting lam zirna a awm hlauh a ni.

Goverment Complex Veng lamah hian he policy hi kal pui ta lo se Jeremy hi a chak tih pawh kan hre thei kher lo mai thei. Catch Them Young programme kal puitu sorkar chuan Jeremy hlawhtlinnaah hian credit chu an la ve thiang a ni.

Jeremy kal zelna lam kan thlir a erawh chuan Mizoram sorkar tih ṭhat lam aiin kum 9 mi lek a niha amah la lutu Army Boys Institute, Pune hnuaia Boys Sports Company lam hian a hlawhtlin zelnaah hian mawh an phur lian tawh zawk ang.

He hmunah hian Mizo ngei mai weightlifting coach Zarzokima a lo awm fuh hlauh a. Kum 2012 aṭang khan Jeremy hi he hmunah hian a awm ta char char a, an ni hian an chawm a, an train bawk avangin he Gold Medal hi Congress leh MNF lama lo sawi luh tum ṭalh chi a ni lo. Catch Them Young bulṭantute hian a talent hai chhuah kawngah chuan chibai chu an phu ve chauh ang.

Jeremy hian nau­pang te niin Natio­nal Sub Junior Weight­lifting Championship-ah record te a siam a, a kal zel dan chu kan zavaia kan hriat tawh niin World Youth Weightlifting Cham­pionship lamah pahnihna a kum zawnin a rawn ni.

Kum 2018 khan Youth Olympic Games, Argentina lama neih ah khan pakhatna niin Gold Medal a la ta nge nge a nih kha.

Jeremy hian, "Kan sorkar chak tak," zar a zo lo kan ti lova, insawitheihna tham tur chuan Army Boys Institute lam aia thawh hlawk an awm dawn lo. A hlawhtlin tawh hnuah Mizoram sorkar hian pawisa ṭhahnem tak a lo pe tawh a, hengte hi chu sorkar tih tur dik tak a ni.

Jeremy a lo haw a, "Ka chher chhuah" ti niawm taka mi zara hming ṭhat lak lo tum ran, a neitupa ber anga lo insawi luh tum te, a zinkawnga mi pawimawh tam ta lutukte hi chu mihring zia chi khat ve mai a ni e.

Politician lamin social media lamah thang ṭhat lak an tum te pawh hi an tihawm tawkah ngai ang u. Olympic medal la thei ngei turin Jeremy hi duhsakna kan hlan a ni. Kan politician te pawh lo inti langsar lutuk lo turin duhsakna kan hlan tel che u aw.

- Maremmawia