Fak tur nge an tih tur an ti?

Presbyterian Kohhranin Puitling Sunday School-a Nazareth Isua kan zir kuma zirlaia mi 'Chhiahhlawh chuan a tih tur a tih avanga fak phut tur a ni lo' tih kha ka rilruah a awm zui reng ṭhin.

Chhiahhlawh chuan tih tur a nei a, a tih tur a tih loh chuan chhiahhlawh rinawm lo leh lak tlak lo a ni. A tih tur a tih avanga fak phut tlat a nih bawk chuan chhiahhlawh lak loh tawp a ni tihna bawk a ni.

Tunhnaiah Mizo­ram hmun hrang hrangah khuarel chhiatna a thleng nasa hle a, kawngpui a ping a, PWD chuan kawngchhia leh ping te theihtawp chhuahin siamṭhat hna an thawk nghal char char mai, fakawm tak an ni. Chutihrual chuan fak miah lo pawh ni ila, PWD hian an tih tur an ti a ni mai. Hetiang kawng chhia thawm leh siamṭhat hi an ti lo a nih chuan PWD hi laktlak loh tak an ni tihna a ni.

PWD hian thil ṭha tak an ti a, an tih tur an ti a, hemi avanga an hotuten fak an phut emaw, an thil tih an sawi chhuak a, chapo tak leh thil ṭha ti inti tak maia an ṭawng chhuak a nih chuan PWD hian an tih tur an hre tawh lo tihna a ni ang. P&E hian kawng siam ṭhain, kawng pingte a tlang theih nan bulldozer te nen thawk chhuak ta se, fak tlak an ni; an chanpual ni miah lo, mipui tana ṭhahnem ngaih avanga an tih a nih avangin.

PWD sawi lan takah chuan hman deuha ZONET-a Inthlan Thlirlawkna kha ka en a, khata PL Liandinga thusawi kha ka rilruah a lian hle. Kawng chhia hi sum senso vak pawh ngai loa siam theih a nih laiin an siam duh lo emaw tih mai turin nasa taka a chhiat hun an nghak ni berin a lang. Kawng chhe lai belthleng tiat chauh a nih lai khan siam ta se, sum tam tak sen a ngai lo. Se bawkna tiat vel a nih pawhin ngaihsak a la hlawh lo ṭhin a, an ngaihsak lo zel a, mipui phun luai luai hun an nghak emaw tih mai tur a ni ṭhin.

Kawng a chhiatin khawtlangin hna­tlangin an siam ṭha a, an bialtu MLA, ruling lam ngei maiin hnatlang thingpui lumna turte an han pe hi a zahthlak hle. An party sorkarin an tih tur an tih loh nasatzia an pawm tihna a ni a, anmahni leh anmahni mawng hlim an ni.

Thil tê tham a la nih lai aṭang hian kan ngaihsak a, kan siamṭhat thuai thuai loh ṭhin avangin sum tam tak sen a ngai a, pawisa a awm lo kan ti leh ṭhin. MLA pakhat thla khat hlawha siam theih a nih lai khan siam ni ta ṭhin se, sorkar hian sum tam tak a hum ni mai tur.

Kawng chhiate pawh hi tute emaw sum siamna hmanrua a nih ṭhin avang hian hma kan la chak thei lo ni zawkte pawhin a lang.

- Lalhmahruaia Ralte