Zirna kawnga nu leh pa mawhphurhna
Chanchin Ṭha Luka ziak 2:51-na kan chhiar chuan, mipa naupang ṭhang mek Lal Isua Krista awm dan leh khawsak dan, finna a neih chhoh dan te chu a nu Mari chuan a rilruin a vawng reng a, a chhinchhiah reng tih kan hmu.
Mari hian a fapa Lal Isua khawsak dan leh mihring a nih anga finna a zir chhoh dan, a che zia leh ṭawngkam te hi a chhinchhiah reng a; a ṭul phawt chuan a zilhhau fo ang tih kan hmu thiam ang.
Pathian thu leh zirna (education) aia pawimawh thil dang hi a awm lo. Noble Prize dawngtu naupang ber Malala Yousafzai, Paskistan hmeichhe huaisen chuan, 'Kan hriat reng tur chu - lehkhabu pakhat, naupang pakhat leh zirtirtu pakhat hian khawvel a thlak danglam thei' tiin a sawi a, a pawmawm hle.
Khawvela mi fing ber Solomona chuan, 'Naupang chu a kalna awm kawngah chuan zirtir ula, a upat hun pawhin a thlah lo vang' tiin a lo sawi tawh bawk.
Nu leh pate hian kan fate hriat chian hi kan tihtur hmasa ber a ni. An tui zawng leh an thiam zawng te, an theihna hriat chian te hi kan mawhphurhna a ni.
Kan fate social media hman dan te, an ngaihven zawng leh an en duh zawngte hi nu leh pate hian kan hriatpui a ngai hle. Kan dinhmun leh khawsak dan a inchen lo a nih pawhin, kan fate ngaihsaka hriatchianna kawngah nu leh pate zawng zawng hi kan dinhmun a inchen vek. A tlai tawh hnua buaipui aiin an naupan laia enkawl uluk hi kan inchhir lohna tur a ni.
Nu leh pate hian kan fate hi 'A rilru a chak lo lutuk, lehkha a thiam thei lo, a â lutuk adt' tiin an hriat laiin kan sawi fo mai. Hetiang ṭawngkam, naupang tana inrintawkna hloh thei thil sawi hi sim ila, i fuih sauh sauh zawk ang u.
Kan fate chu mi aia lehkhathiam thei lo leh rilru chak lo tak an lo nih pawhin, nasa leh zuala tan lak a ngai a ni tih hriain, 'I ti thei, i thiam dawn lutuk' tia fuih zawk tur a ni. Kan nu leh pa te berin chutianga min fuiha min tihpui tlat chuan hma kan sawn nge nge ṭhin. Kan fate zirtir thei turin kan thiamna in a lo tlin lo a nih pawhin a hre zawkte rawn ṭhin ang u.
Fate aia mobile phone ngaihsak zawk, fate zirna kaihhnawih aia mahni tuina leh hmuhnawm tih zawng ngaihven nu leh pa kan ni tur a ni lo. Pathian laka kan rochan kan fate enkawl turin keini aia ṭha an awm lo. Chumi tur chuan nang leh kei hi Pathianin mawhphurhna min pe a ni.
- Rinfela Zadeng