CAG Audit Report tih article kha

Vanglaini ni 23 June 2017 chhuaka article “CAG Audit Report” tih Dr Vanlaltanpuia, Pachhunga University College ziak kha ka lo hmu a. Mithiam leh puitling taka ngaihin party inchirhthehna lam ṭawngkam a hmang kha a mak ka ti deuh a. Ṭhalaite a hruai sual ang tih a hlauhawm hle a ni.

Zirna in zinga kan chhuanvawr PUC-a thawkte tan phei chuan fimkhur a ngai hle awm mang e ka ti deuh a, party politics-ah pawh ṭawngkam uluk tual tual a nih tawh lai hian. Kha a thu ziakah khan thu dikhlel deuh tak, mipui pawh hruai kawi thei tur a awm nual avangin chhanna ni lovin sawifiah ngai nia ka hriatte ka rawn ziak ve a ni e.

CAG report hi PAC-in a pawm nghal vek lo: Comptroller and Auditor-General-in report a tichhuah reng reng ‘Public Account Committee leh Committee on Public Undertakings ten i-he lovin an pawm ṭhin’ ti hialin a ziaktu khan a rawn tarlang a ni. He a thuziak a uar mah mahzia chu chiang takin a lang nghal a, 2G spectrum allovation case-ah ngei pawh Public Account Committee nen nasa takin an ngaihdan a inang lo va. Public Account Committee Chairman MP K.V.Thomas meuh pawhin “the Comptroller and Auditor General should restrain from reporting notional losses and rather restrict itself to revealing financial impropriety” a ti hial a ni (link http://timesofindia.indiatimes...). AgustaWestland chopper deal te, Common­wealth Games scam te, leh NPA-te a CAG report hi Public Accounts Committee hian a sawisel a nih kha.

Article ziaktu khan CAG report te sawr­kar laipui pawm thlap angin a ziak a, sawrkar laipuiin ‘scam’ lian LPG subsidy leh thil dangte a hmachhawn mek a ni a. A pawm lo a ni ang an buai ve em mai.

CAG hian an huang lo nawra report an lo siam ve vak vak ṭhin avangin inhnialna a hring chhuak ṭhin niin a ngaih theih a, hei vang pawh hi a ni ang PAC Chairman hian CAG chu “national loss/ hloh nia ngaih” tarlan vak vakte an tih tur a nih loh thu a sawi a. CAG duties leh Power India Constitution Article 149 in a tarlan danah chuan Parliament-in a ruahman sak ang anga awm tur an ni a. Dawhkan aṭanga an chhut ve dan audit report a ziak vak lovin ‘financial impropriety/ sawrkar sum dik lo taka hman’ a awm leh awm loh en mai zawk chauh tur an nih hmel hle.

NLUP PM Special Package a ni lo a tih kha: Article ziaktu khian NLUP chu Prime Minister Special Package “a lo ni reng reng lo chu niin” a ti a. PIB Press Release 15 July 2010 kan en chuan, tun thlengin internet-ah en theih a ni. (link-ah hian en rawh http://pib.nic.in/newsite/erel...). Hetah hian Cabinet Committee on Economics Affairs in NLUP a bik takin a pawm sak tih a lang chiang hle. NLUP Management 3 tier structure pawh an pawm tel nghal thu tarlan a ni. CCEA hi Prime Minister Dr Manmohan Singh a chair-na hnuai a neih a ni nghe nghe. Special Package ni lo sela chuan Ministry emaw, Department emaw, Planning Commission level-a chinfel mai tur a nih hmel a, Prime Minister mai ni lo, Cabinet Committee meuhin a ‘approved’ a nih avangin ‘special package’ tih loh rual a ni lo.

Ziaktu khan NLUP chu ‘micro development’ a nih avangin ‘growth’ tak tak petu a ni lo tiin ‘Mico versus Macro Development’ tih chungchang a sawinaah a sawi bawk. Economic lam zir ve miah lo keini pawhin kan hriat vek chu macro development chu macro aṭanga ṭan lovin micro aṭanga ṭan tur niawm tak a ni a. Micro development infinkhawm khan macro development a siam mai tur a ni awm e. Micro ngaipawimawh hmasa lova macro development a direct nghal a nih chuan mirethei zuankhum policy a nih ngei a ṭul ang. Chutiang chu MNF policy thar SEDP-in a tum dante a nih hlauh chuan mirethei ṭahna thlentu policy a ni ngei mai dawn tihna a ni ang. Pu Tanpuia hi SEDP lam campaigner a nih bawk avangin SEDP hi miretheite tan a hlauhawm hle mai dawn a, mipuite a bik takin thingtlang lam mite kan fimkhur a ṭha hle ang.

Per Capita Income pawimawhna leh Growth Driver Mizoram: A mak lehzual ta ber erawh chu ram ṭhanna chungchang a sawinaah kan Minister hming ṭha ber zinga mi Pu Zodintluanga’n Per Capita Income a san chhoh chungchang Varsity Platform 2017 a a sawi a hnialna hi a ni. Pu Tanpuia hian Per Capita income tehfung rintlak lo leh technical lo mipui rilru dik lo zawnga kaihhruaina ang hialin a rawn sawi nghe nghe a ni! Chumi a sawi fiahnaah chuan Mizoram chu India ram state 29 zingah GSDP hniam ber a nih thu leh chu chuan kan economy ṭhan leh ṭhan loh a kawk mai e, tiin a sawi nghe nghe a ni! GSDP (actual size/ amount) hi ram ṭhanna tehfung atan an hmang ngai reng reng lova GSDP Growth Rate (kum hmasa khumna) zawk hi ram ṭhanna tehfung atan an hmang ṭhin.

Entirnan, India hi ‘emerging economy/ global growth drivers’ tih a ni a, ram dang (USA etc.) GDP chu a tam zawk si, GDP tam apiang ‘growth driver’ an ni tihna a ni si lo! A chhan chu GDP growth rate (kum hmasa khumna) a san zawk avangin global growth chhutnaah kum hmasa khumna tisangtu chu kumin a growth rate sang ram te kha an ni ta tihna a ni. GDP sang ur mahse growth rate a hniam si chuan ram ṭhanna tehnaah chuan USA chu growth rate a hniam avangin growth driver a ni ve ta lo a ni! Growth rate sang zawk India kha growth driver a ni thung. Chutiang chiah chuan Mizoram chu state dang aia growth rate a san zawk fo avangin mimal tin thawhchuah chawhrual (per capita income) a lo sang chho ta a. India ram pum average a khum ta hial a (kum 2015-16 aṭang khan) chuvangin India economy-ah Mizoram chu growth driver dik tak a ni. Hetiang hi mi tu pawhin kan hriatthiam vek a ni a. PUC Professor meuhin a hrethiam lo tlat mai hi a felhlel hle a ni.

Ram changkan dan leh ram ṭhanna tehfung technical lo a tih Per Capita Income hi ram hmasawnna tehna ber a ni zawk a, hei pawh hi a hre fuh chiah lo a ni. Entirnan, chhungkaw pahnih tehkhin nan hmang ta ila. Chhungkaw pakhat chu mi sawm (10) awmna a ni a. An chhungkuaah chuan hnathawk panga (5) zet awmin kum khata an sum lakluh pawh Rs 100000 ṭheuh ni ta sela. Chumi chhungkua income pumpui (Gross Income) chu Rs 500000 lai tihna a ni a, a tam khawp mai. An chhungkaw member sawm hnena sem rual (Per Capita Income) erawh chu Rs 50000 tihna a ni ang. Chhungkaw dang lehah thung chuan mi pahnih chiah an awm a. Hna an thawk ve ve a, an kum khat lakluh pawh Rs 100000 ve ve tho a ni a. Chumi chhungkua income pumpui (Gross Income) chu Rs 200000 chauh tihna a ni a, a tam lo khawp mai. An chhungkaw member pahnih hnena sem rual (Per Capita Income) erawh chu Rs 100000 lai a ni thung. Tu chhungkua nge changkang zawk anga awm nuamsa zawk ang le? Per Capita Income sang zawk apiang khi an awm nuamsa zawk dawn tihna a ni.

A chhan chu chungkaw pahnihna khi chuan mimal tin tana sum hman theih (per capital purchasing power) chu Rs 100000 a nih avangin Gross Income tam tlurh chungkaw member 10 awmna ai khian sum hman tur mimal tinah a let zet an nei dawn tihna a ni. Hei vang hian GDP (Gross Income) ni lovin Per Capital Income hi ram changkanna tehfung pawimawh leh technical ber zawk chu a ni. Pu Tanpuia tehfung chu hmang ila a rethei zawk khi hausa zawk leh changkang zawk ah kan chhuah hlauh a ngai dawn tihna a ni. Kan Minister zahawm takin Per Capita Income pawimawhzia a rawn hre chat mai leh University zirlaite zingah hetiang fact leh figure rintlak thur chhuahna chang a hria hi a lawmawm tak meuh meuh a, Per Capita Income en chat chat Minister te hi nei tam ila kan changkang chak fu ngei ang le.

He article hi inhnialna emaw Pu Tanpuia article chhanna emaw a ni lova, mithiam zawka kan ngaihten dik lo taka mipui hruai kawi thei tur an rawn ziak tlat mai hi hriatthiam har ka ti a. Mimal in kheina lam ni lovin, tun hnu zela mipui kan fimkhurna a nih hlauh takin tiin ka rawn tarlang ve a ni e.

- Zoa Tlau