Mipuite kan lo inpuahchah a hun

Mizoram kum 5 chhung min kaihruai a, kan ram hmasawnna hnathawktu tur kan thlan hun a hnai leh ta... Tun aṭanga kum khatah vel lekah inthlan kan hmachhawn mai dawn avangin mipuite kan rilru inpuahchah a hun tawh a ni.

Kan ram hruaitute kan sawisel a, kan rel luai luai ṭhin. Kan ram hruaitute thlangtu hi mipui kan ni a, chuvang chuan kum 5 chhung min kaihruai leh tur thlanna atan hian kan rilru zawng zawng kan sen a ngai a ni.

Inthlan a hnai ang a, tun hmaa min be ṭha peih lo kan politician-te chuan ṭawngkam ṭha tak takin min rawn be leh hlawm ngei ang. Sum theh chhuak tawk pawh an awm leh ngei ang.

Inthlan dawn hnaiha pawisa tlem azawng kan dawn avang hian kan ramin a tuar kan phal tur a ni lo. Tun aṭang hian kan biala rawn din tumte chu uluk takin an mizia leh an dinhmun zirchiang ila, kan ram leh hnam tana ṭha ber tur thlan chhuah ngei i tum ang.

Kan ram dinhmun kan hre vek, inhrilh hriat chuan a ngai tawh lo. Kan ram hian hma a sawn zel theihna atan hian kan vote hi a pawimawh tak zet zet a ni tih hriat a pawimawh hle. Politician-te bum fin zawh loh chu nih i tum tawh lo ang u.

Mimal ṭha an pawimawh rualin, sorkarna siamtu an awm miau ṭhin avangin political party-te leh inthlan chuh tumtute dinhmun pawh kan hriat chian a pawimawh awm e. Kan thiam leh phak tawkin kan political party-te hi i zirchiang ang u.

Mahni hamṭhatna ringawt ngaihtuaha vote kan thlak a nih chuan kan ram tan a pawi leh dawn. He ram hmangaihtu tak tak i nih chuan, nang leh i chhungte'n sum tak tak nei mah ula, kan ramin hniam lam a pan i phal ka ring lo.

Zoram hmangaihtu tak takte chu kan vote thlak duh danah a hriat leh dawn. Kan duhthusam leh sawiselbo lo mihring chu kan thlang chhuak hauh lo ang, mahse uluk tak leh chik taka kan inthlan tur hi kan hmachhawn a nih chuan kan ram hi pen khat talin hma a sawn ngei ang.

Inthlan kan hnaih telh telh ang a, ram hmangaihtu an pung leh telh telh dawn. Chung hunah chuan tute nge ram hmangaihtu tak tak tih zirchiangin, kan ram tana ṭha ber tur thlan chhuah ngei i tum ṭheuh ang u.

- K Lalthanga