Ṭanpui ngai ṭanpui - A thlamuanthlak
Mizoramin khuarel chhiatna kan tuar a, leimin leh tuilian nen, mi tam takin in leh lo an chân a, nunna hial pawh an chân. Hetiang harsatna kan han tawh chiah hian Mizoram chhung leh Mizoram pawn
aṭang te pawh ṭhian chhan thih ngam rilru dik tak a rawn tho chhuak leh ṭhin a, Mizo nih a thlamuan thlak hle.
Mizoram hmun hrang hrangah chanchin ngaihnawm lo tak tak kan hre mawlh mawlh a, chumi hnu lawkah a tuartute tana thlamuan thlak em em mai chanchin kan han hre chho leh mawlh mawlh mai a, Mizo nih hi a va nuam tak êm! PUMP ten chhiat tawkte ṭanpuina turin vehbur an khawn nghal a, MZI lam pawhin charity concert an buatsaih a, nghal a, heng mai bakah hian mimal leh pawl dangten chhiat tawkte ṭanpuina turin ke an pen nghal chur chur mai.
Kan rilruah heng chhiat tawkte ṭanpui duhna kan nei ringawt pawh hi a hluin, Mizo Kristian nih tinuamtu a ni. Khawtlangin ei tur an nei lo ang tih hlauin hma an la a, political party pawh sawi loin party-te pawhin hma an la nghal. Pawl hrang hrangin thleibik nei hauh loa harsatna tawkte an mangan hlaua a thawk chhuak suau suau mai han hmuh hian lawm avangin mittuite pawh a luang thei hial ang.
Vanduaina hi a tuartu tan chuan rapthlak a, mahse vanduaina aṭang hian min hmangaih a, min lainattute an lo lang chhuak ṭhin. A tuartute tan chuan a lawmawmin, a thlamuan thlak.
Mizo nunze mawi, Mizo Kristian rilru hi nung zel se, hei hi kan ram tinuam a, min thlakhlelhtirtu a ni.
- Lalrinsanga Hlondo