Awmpuite chungchang
Kan ramah hian awmpui nei kan tam ta hle mai a, hemi chungchangah hian ngaihven leh sawi a lo hlawh ve ta hi a lawmawm hle a ni. Mi ṭhenkhat an awmpuite chungah dik lo taka thil ti an awm theih avangin dan mumal tak neih pawh a ṭha ang a, kan khawsak ho na atan dan a pawimawh em em chhan pawh kan sual ṭhin vang a ni.
Kristian kan nih ang tak hian kan Pathian duh dan angin a thu zawm dial dial thei ila chuan khawsak ho pawh hi dan phuar khawma awm ai chuan kan hlim tlang zawk vek ang. Entirnan - Danah chuan awmpuiten ni 15 chawlh an nei tur ni ta sela, ni 15 chawlh chu lo phut tlat pawh nise a thiam a ni. A chhan chu kan hnenah hian mi 10 chuang lai an thawh ṭhin vang a ni. Hetiang hian ka ngaihtuah ṭhin-
Kan awmpuite hi chhiahhlawh angin kan en tur a ni lo, chhungkhatah kan ngai tur a ni. Ei leh inah kan en hrang tur a ni lo, kan ei ang an ei ve tur a ni. Hna engkim an thawk vek ang a, keini chu kan awm mai mai tura ngaih tua ni bawk lo; kan theih ang ang kan thawk tlang vek tur a ni. Awmpuite chu kan thawh sen loh leh kan tih theih loh min tih saka lo awm an ni.
Hlawh ṭha taka pek tum ila, an hlawh bakah an duh zawng engemaw tal tihsak hram tum ila, keini aia harsa zawk an ni tih hre reng ila. Tuma mitmei veng loa anmahni ina awm ve chu an duh a, loh theih lohna avanga lo awm an ni tih kan hre dawn nia. Damlohna leh harsatna an tawk a nih pawhin kan theih ang tawkin ṭanpui ila chhungkhatah in siam zui zel thei ila a ṭha hle.
Awmpui te pawh hian a nihna tak hrethiamin inngaitlawm takin awm thiam sela. Thil pakhat han sawi ila kan inah hian pawisa min dil hian lokal an awm ṭhin a, midang an awm loh chuan keimahin thingpui ka lo siam sak chang pawh a awm.
Ni khat chu pitar pakhat a lokal a, kan awmpui nula hnenah thingpui han siam teh ka ti a, a han siam sak a, a chhuak nghal ta mai a. A lo haw ta lo a, engtizia nge tia ka han ngaihven zui chuan “chhiahhlawh angin min en a ka lo haw tawh dawn lo” a lo ti a ni. Pitar chhete mai thingpui siam tura ka ti kha a lo la na hle mai chu a lo ni a, a pawi hle a ni. Awmpui chu a rinawm tur a ni, awmpui rinawm lote avang hian mi tam takin an tuar tawh a, keini pawhin kan tuar fo tawh.
Tichuan, a ṭhaa ka hriat dan chu dan anga rorel sak a awm loin awmpui tu leh a awmpuia te chu Krista chanchin ṭha nena inmila nungin inrem taka an nun ho thiam hi a ṭha ta berin ka hria. Chutianga awm ho thei lote tan erawh dan mumal tak chu siam ni se.
- Sanglura Sailo, Electric Veng, Aizawl