Engtin nge kan hmachhawn tak ang?

Kawngpui in ṭhat a chhuah rei ṭhin si lova, fur khawchhe hnuaiah hlau leh hawi zawk zawkin kawngsir kan bel ṭhin a. Ringtu nun nei inti ve tho si hian hlauh ngah lutuk kianga awm chuan hlauh tur kan hre thei phian a, kan tirilah ngei pawh chu hlauhna chuan min man chho ve ṭan ta a nih ber hi.

Hunbiin a ken tel kum tinin fur kan hmachhawn mek a, ruahtui te hi malsawm­na thlentu a nih rualin ṭhenkhat tan laiṭha ti na tu a ni thung.

Ruahtui tam hun a lo thlen chuan kawm­chhak te inchhawng sang hi ka haw ngawih ngawih ṭhin. Mawi leh nalh taka in satuten an sak ṭhinah hian hmaih an nei fo si ṭhin! An tuidawn leh tuichhe paihten luanna mumal nei loin khawh liam tir tawp an ni si ṭhin - hei hi a ni kan leilung te tinghet lotu leh leimin, in chim te thlentu chu!

Ngaihngam taka kan mut lai hian kan insak lian tak takteah hian mangkhawng kan intuh tih reng kan hre si lo, harh chhuah a va hun tak em!

Ruah a lo sur a, kan Zoram chhung ngei­ah tuilian thawm te kan hria a, Sabereka­khuangkaih tih thawm te kan hre ta fo mai leh tuilian (Sabereka-khuang­kaih) in mi a lak thawm kan hre ta zul hi eng vang nge ni ang tih te hi kan chhui a kan inzawh chian te pawh a ṭul hle mai. Kan tuichhia/ tuihawkten luanna mumal an nei lo in, bawlhhlawh leh ilo paih mai mai kan chin te hian harsatna min thlen chho in min la thlen zel dawn ni te pawn a lang.

Keini ang pa rawn­tlak loh tan chuan tuiluankawr awmna lam kawng dung a sang zei zei daih te hi kan tuichhia/ tuihawk te tan chuan mumal taka luan a har ve ngawt hian ka ring ṭhin a. Heng tui kawngbo te avang hian ka motor kawng te hian rei a daih loh mai bakah kan leilung a tinghet lo hle ni te hian ka hre ve ṭhin.

Zoram chhunga chhiat kan tawh ṭhin tam tak hi a rama chengte kan fimkhur tawk loh vang ni te hian a lang. Heng leimin, in chim tih te hi tam tak chu pumpelh theih a ni tih a chiang a. Keini tlangdunga khawsate hian khua kan tlaichhiat hma hian kan khaw chhung ṭheuhah hian ruahmanna felfai tak kan din a, kan in sak danah te leh tuiluankawr kan sak/ siam danah te hian a innghahna chen a awm a ni tih hria ila.

Kan ram ṭhang zel turah hian ruahmanna mumal tak nen in leh lo te din in a ṭul­ah chuan a ngaihna hria (sorkar lamin a chhawrte chenin) te rawn hreh lo tlang ila. Tuna leilung lam hria mithiam kan rawn nana sum a sang tel kan lo sen hi nakina kan neih zawng zawnga sena kan sak kan in him zawkna tur a ni tih hre reng ila, kan ram leilung a him zawk ngei bawk ang.

- Jemato of Leitlangpui