Ram leh hnam humhalh - Kohhran pawimawhna

Kohhran chuan a duh apiang te hnenah Chanchin Ṭha a hril a. Kristaah hnam bil a awm thei lo va; Grik mi, Juda mi, serhtan leh tan loh, awze mite, Skuthia mi te, bawih te, bawih lo te pawh a awm theih loh tih hriain khawvel pumpui hi kan thlawhhmaah kan ngai sa hrim hrim a (Kol 3:11). Zawhna awm thei tak erawh - “Kohhran hian hnam pawi kan khawih thei em?” tih hi a ni ang.

Ram chhunga Chanchin Ṭha kan hril hian: Ram dang mi (foreigner) kan seng lut thuai thuai ṭhin em? member tam duh luatna lamah hnama min din a, ramri te min siamsaktu Pathian leh hnam pawi kan sawi thei em tih kan ngaihtuah ngun a

ṭul hle (Tirh 17:26). Zoram kil tin aṭanga rawn lutte hian, a ram leilung fate nihna leh chanvo chang tur leh neih ve kawngah kohhran hi ‘kâwr’ ah an hmang thei. “Kan unaute vek alawm” tih reng chi a ni ang em? “kan kohhran an nih dawn phawt chuan” ti a khua leh tui nghet sa te nihna leh chanvo ang kan pek thuai hian ram leh hnam tan nghawng ṭha lo a nei thei em? heng kawngah hian kohhran pawh kan fimkhur a ṭul hle.

Kohhran ṭhenkhatten hnam tenau zawk (minority) kan ngaihpawimawh hi a ṭha e. Kan rama mikhualte chunga ṭhat chhuah hi a la ṭha zel; an chanvo ang pek pawh kan tih tur. ‘Hnam bil’ kohhran kan din sak kher erawh ngaih a ṭha ta hauh lo. Tuna ngaihpawimawh tham loh hi nakin lawkah an la hnawk thuai lovang em ni?

Culture mila Pathian thu hril dan tâwk a awm em?: Hnam nun, hnam ze mila Pathian thu hrilna hrang hrang heng - inculturation, indigenization, cross-culture kan tih te hi a ṭha em em; Mizoram chhungah erawh reh bun chin neih loh chuan kal sual pui theih a ni ang em? kan ram chhunga mikhual cham rei deuhte hnena Chanchin Ṭha kan hril hian hnam nun mila Pathian biakna leh insiamrem ‘cross-culture’ hi a hlawk tih vang hian an rilrua intuh hauh lo - ‘hnam bil feeling’ kan vaw lian thei em? ram pawna ṭha em em kha ram chhungah a

ṭha ve kher ang em? he ram zimtea lo tih ve (apply) ngawt emaw, kal natpui vak emaw hian keimahni ngei ngei pawh hnama min dintu Pathian leh hnam pawi kan sawi pha em tih ngaihtuah vang vang tur a awm.

Israel fate kha an zingah hnam dang an awm ve reng. An ram chhung bikah kha chuan anmahni hnam nun (culture) an vawnghim ṭha em em a. An zinga hnam dang awm ve te pawhin chu chu an zawm mai a. Pathian biaknaah an hnam pawi khawih zawngin an che ve lo. Thuthlung thar lamah Paula ngei pawh khan a lehkhathawnah hnam dang leh he khawvel awm dan apianga awm ve lo turin a fuih a, khua leh tui ṭha ni tlat tur erawh chuan a fuih thung. Kohhran ṭhenkhatin kan ram chhunga Chanchin Ṭha kan hril danah hian ṭhangtharten min la dem mai ang em?

Theology him kan ngaihpawimawh a ṭul: Khawvel ṭhang zel mila Pathian thu pawm dan (contextual theology) turah te, hnam ze mila kal (indigenous) chungchangah te, rahbeh tuarte zalênna thu (liberation theology) te, hmeichhe dinhmun chawikan chungchang te, hun hnuhnung thu (eschatology) leh theology dang dang zirtirna chungchangah te hian kohhran hian dinna nghet a nei sa reng. Hengah hian mipuite âwkai taka an awm loh nan zirtirna ṭha kan mamawh reng a. Khawvel hmun danga ṭha kha helaiah a ṭha vek kher lo thei; thil ṭha tak pawh hi a him lo zawnga kalpui vak theih a ni; a tuar ber tur chu keimahni, he hnam tho hi a ni a, ngun lehzuala kan ngaihtuah a ṭha hle.

Hman ata tawh mi ṭhenkhat thu vawrh darh te hian he hnam hi a ṭhen hrang a, inpumkhat aiin inṭhendarh theology; insawi ṭhaih theology an tuipui a. Rinna kawnga min tiṭhangliantu aiin min hnungtawlhtir a, rinna bulfuk tak nei lo te tan phei chuan awih mai tur hiala mawia thu leh hla te a ni nuk a. Vawiin thlengin min la chamchilh a, ṭhenkhat chuan hmana ‘khawchhak lungpui lum hlau’ te thu leh hla; kum eng emaw ti hnua, “a lo ni leh chiah si lo” ti chunga ṭang khawng laklawhte thu leh hla kha rawng an rawn hnaih thar ve leh mai a ni tih an inhrethiam chuang lo. Heng hian min ti chîri a, min ṭhen hrang a, kan ram leh hnam tan thil pawi tak a ni. Hengah hian kohhran hian mawhphurhna lian tak kan nei.

Zawlbûk thar nam thluk an tum - veng tlat ang: Kohhran hi kan khawtlang (society) tana zawlbuk thar a ni tih man pha hauh si lo, mifing nia inngai, â tak a awm theih ta! Kohhran hruaitute hmuh mâwkna leh, chu zawlbûk (kohhran) chu ṭhalaite tana inzirna hmun (institution) ṭha a ni tih man pha loten he ram leh hnam innghahna lungphum - kohhran hi sawi nghin an tum fo. Heng - Pathian a awm rin lohna (atheism) te, rinna leh thiltih aia mihring chhia leh ṭha hriatna thiang (reason) hmanga khawtlang nun khalh tumna te, kohhran hrim hrim beihna leh science thiamna hmanga sakhaw lungphum thlenga nghawr nghing thei nia inngaihna âtthlak te hi he Zoram tih thumal awm hma daih khan ram changkang kan tih zawkah te khuan a lo awm tawh ṭhin a. Vawiin thleng hian hnehna erawh an la chang thei lo.

Sakhuana hian mihring nun a thunun loh chuan awmze nei vak lo hian a nun theih khawp. Kristiannain min kaihhruaina ṭha tak te, a dan leh dûn te hi ram leh hnam tan a lo ṭha em em. Kohhran beia kan zawlbûk thar nam thluk tumtute hian kohhran aia ṭha zawk min kawhhmuh thei em? min thlenpui tum emaw, min hruai thlenna tur ṭha zawk emaw min kawhhmuh thei chuang si lo a nih chuan he ram leh hnam kum 100 chuang lo enkawl tawhtu kohhran hi kan thuam ṭhat sauh sauh a ṭul tihna a ni ang.

Kohhran leh YMA ṭan dun a ṭul: YMA hi missionary te din a ni a, kohhran fa chuam tih pawhin a sawi theih ang. Vawiina YMA kalphung hi a dintute rilru kha la ni zel tak maw kan hre lo va, ram leh hnam tana ding YMA a la ni reng tih erawh hai rual a ni lo vang.

Kohhran hi ram leh hnam humhalhna kawngah YMA nen a ṭan dun zel a ṭul. Hnam a ral a, ram hi chimral a nih bawk chuan kohhran hi a ral riai riai ang. Kan hnam nun (culture) ṭha kan chelh din loh chuan hmabak vak kan nei lo. Sakhuana leh hnam nun (culture) hi inkawp tlat a ni a, lak hran tak tak theih a ni lo. Judaten serh an tan ṭhin hi an sakhuana thil a nih rualin hnam nun a nihna chen a awm. Heti taka Juda sakhua a ngheh chhan bulpui chu an hnam nun nen a kal kawp tlat vang a ni. Kan hnam rohlu ṭha vawnhimna kawngah te, riangvai pachhiate ngaihsak kawngah te, hmeithai leh chhumchhia zawkte dawm chhuahna kawngah kohhran hian ram leh hnam humhim nan a tha a thlah thiang lo va, ‘ṭanpui ngaite ṭanpui’ kawnga nasa taka hma latu kohhran hi YMA in a thlawp ṭhat reng a pawimawh bawk.

He ram, kan pi leh puten chem tum nen chauh pawha an lo sah ên ram; pasal-ṭhaten an lu zuara an lo humhim ṭhin ram hi a neituten hmangaih tak leh duat taka kan enkawl a, kan humhim a ṭul a. Pawn lam aṭanga beihna leh chhung lam hmelma, inṭhendarhna leh keh chhe thei lakah kohhran hian changtupa nihna vuan zelin fimkhur takin a kal zel tur a ni ang.

- Zonunsanga