A TE THAM DEUH LO MAW LE!
Dt. 22-4-2017 zan Zonet chanchinthar kha ka lo ngaithla a, ‘Sikul Education Dapartment chuan Zonet an hrilh danin kumin sikul luh ṭanah sikul zirtirtute awm loh vanga sikul lut ṭan thei lo an awm lo,’ ti lam hawi khan a han puang a. He thupuan hian ngaihtuah a tithui duh hle mai.
Zirtirtute hi sikul awmna tawhah chuan appoint vek an ni a, an dil ang ngeia zirtirtu a thawk pawh an ni. Chuvangin, dah an nihna hmunah chuan an awm tur a ni a, an duty-na hmun chu an ngai pawimawh hmasak ber tur a ni.
Mahse hetiang ni chung si hian mahni thawhna hmuna awm lova, hmundanga awm ta daih sawi tur an awm leh tlat ṭhin. Hei vang hi a ni ang chu kan sorkar pawhin lawm tak leh chapo angreng tak chunga khatiang thu khi a puan tak mai ni! Kan inchhuanna a va te tham deuh em!
Zirtirtu chu a thawhna hmunah sikul ṭan ni chuan a awm tur a ni. Zirtirtute lek phei chu a ni lehzual. Zirtirtu hna hi hna thianghlim, hna zahawm bik a ni a, in thlahdah a thiang ve lo.
Sorkar hian a duh thala a lak zirtirtute hi ngatinge a control theih loh le? An duh hun huna sikul an kal a, an duh hun huna an zin bo san mai mai hi a dik lo. Hun pangngaia sikul an ṭan thei mai mai hmai uang takin chanchinbu mite hmaah kan sawi ta a ni a, kan lawmna hi a va beithamin a va fahrah ta ve le! Hetiangzel a nih chuan kan ram zirna hi eng nge a an chhoh zel ang tih pawh ngaihtuah ngam a ni ta lo e.
Sorkar lo ding tawhte khan zirtirtute hi an ngam thei meuh lo! Tun hma kha chuan sikul endiktute kha a khat tawkin an feh chhuak reng a. Khatiang vang kha a ni chek ang chu, zirtirtute pawh an viak a ṭha em em ṭhin. Tunah erawh sikul endik sawi hi a khat ta hle!
Kan ṭhianpa, Middle sikul zirtirtu pension chhuak chuan a ṭan chhung, kum 35 chhungina a thawhna sikul chuan endik a tawh a hriat loh thu zuk sawi a! Heti taka inspecting staff lamte an inthlahdah chuan sikul ṭha leh zirna ṭha neih chu a va har dawn em! Sorkar enkawl sikulah naupang an tlem tual tual a, sikul khar hial ngai a awm ta fo mai te pawh hi a chhan a ni thei mai lo vang maw le?
Sorkar sikul zirtirtu tam tak hian an fate pawh an thawhna sikulah zuk kaltir duh tlat lova! Private sikul emaw mission sikulah emaw an kaltir hlauh zel! Heng aṭanga pawh hian kan sorkar sikul dinhmun chu thui tak a hriat theih awm e.
Sorkar pawh hian a hnathawkte hi tun ai hian enkawl fir deuh se, political ball-ah kan sikul leh zirtirtute hi hmang mai mai tawh lo se a ṭha hle awm e. Ram aia mahni party hmangaihtu ang chi hi chu inthlan lo awm leh turah pawh thlang duh tawh lo ila, kan zirna pawh hian rual a pawl ve deuh tawh ang chu!
Zirtirtu neih loh vanga sikul lut thei lo an awm loh thu hlim taka report a ni khan kan sorkar rilru a hailang a, an lungawina a te tham ka ti hle.
- Patrick Z, Chhingchhip