Mipuiin Telphawk thli tleh tirin sawrkar thar i siam ang u...

Kan ram, Mizoram kristian ram kan tihah hian, District Council leh UT hunlai nen chuan Party mal sawrkarna kan hrawn rei ta hle mai a. Mahse, state kan nih ve hnuah phei chuan a rulling party mi leh sa te aia tam daih, Mizo mipuitea rulling party office-ah leh Minister office thleng ngam lo, va thleng ve mah ila engmah sawtna leh khawtlang tana thil ṭha va hlawhchhuak lo tur kan awm ziah a nih hi, ‘Chhura chengkek lo’ kan ang rei ta.

Kan ṭhenawm Tripura leh Bihar CM te ang hruaitu nei ila, ram hmasawnnain min hrut tel ang a, kan changkangin kan nun a hlim ve deuh tur. Hmanlaiin ei leh barah kan intodelh a, tunah central sum tam tak leh tunlai thiamna hmang pawhin kan thla hnih ei emaw chauh kan tharchhuak a, mi state thar chhuah hmangin kan in tungnung a, kan chhiah chawi leh central sum lo lut zar zo phak hovin motor ṭha pui puiin mipui retheite kawng diak min chil per a nih hi.

MNF Party rorel kum 10 chhung khan Bafacos sum tam tak nen state dangte thâl ve theih loh thal chunga min hruai pawhin eng lua kan ang lo. Congress party sawrkarin Pathian lamṭang programme nena kum 20 dawn min hruai pawhin kan hmasawn dan chu Rihartui phur an sawi ang mai kan ni bawk si. Hetiang a nih avang hian MNF leh Congress party hruaina duhkhawp lo kan lo tam ta em em a, anmahni mi leh sa ngeite pawh duhkhawp lotu deuh hlir an ni lehnghal a. Heng kum 30 vel lai min lo hruai tawhtute hi kan haw reng reng lo, mihring mihrinnaa mi ṭha tak tak an ni. Amaherawhchu, kan ram an hruai dana a ni lo zawnga hruaitu anmahnia bet tlat hi kan duh lova, kum 5 te han paih thla ve phawt ila, chumi hnuah chuan a ṭha hlei hlei pawh an ni ang chu!

Tin, kan hruaitu ropui Pu Laldengan Hnam movement a beih lai khan hla lar deuh Congress an tihna niawm tak, “A dawi ang che zawlaidi pawh a keng” tih kha a ri ring hle a, khang ang deuh khan tuna min nêktu politic boruak phei chu kan hruaitu pa ber duhzawng chauh ei emawah kan lut dawn ni awm tak a ni. Israel leh Mizote chauhin sachek ei anga an sawi ṭhin, kan kutpuia bawngsa ruhkawl leh a chek kan thlakhlelh ber pawh kan thlahlel thei dawn lo emaw ni tih tur a ni ta. Kristianna phei chu India hmarchhak su turin Nepali te hman tur tih thawm te a awm ta nual a ni awm e.

Tichuan, mipuiin sawrkar ṭha siama hmasawn kan duh tih hi a chiang a, chutiang tur chuan MNF leh Congress Party lian hneh turin mipuiin telphawk thli kan tlehtir a ngai a ni. PC leh ZNP te pawhin Policy leh hruaitu

ṭha tak tak in nei. Tin, PRISM te pawh ram tana in thawh ropuizia hi mipuiin kan hai lo, i ram lo thleng rawh se, titute Zoramthar titu leh RDP te ZRF leh ZEM te leh kil hrang hrang aṭanga Zoram siamṭhat duhtu thawm nei zawng zawngte hian mahni inphah hniam leh ram leh hnam tan tak meuh thawkho turin kan rilru i buatsaih ang u. Chutianga term khat lek pawh ram tan kan thawhho theih loh chuan, ram hmangaiha rawn zuang chhuak ni lovin, mahni duhdana ram hruai tuma party lian sa te nek ral leh mai mai tur hmuhin an hmu ang che u. Ram ropui min hruai thleng bawk lovang.

Mipui tam zawk rethei bakberha awm na nâ nâ chu han inzawmkhawm ila, convention neihna tur hun leh hmun ruat ila, thingtlang khaw tinah aurinna hmangin han in aukhawm ila, Mizo upaten, thli nâ an sawi ṭhin, politic thli nâ, telphawk thli miretheite hian i han tlehtir teh ang. Chuti lo chuan, nakkum MLA thlan leh a din tumte chuan nuaih 50 aṭanga nuaih 100 te an inring a ni awm asin, reilote nawmsakna sum tlemtein kum tam tak retheihna tur kha kan thlang leh mai dawn em ni.

Fiji ram rethei, lo ding­chhuak ang khan, Lalpa au ila, kan sual te ngaidama tuifinriat ral aṭanga min zawn chhuah chhan angin, kan ram tidam leh a, missionary nuaih tel tir chhuak thei turin chunglam i rinchhan ang u.

Hnam a chhiar tham loh hnama min dintu hi au ei ila, he leiah hian vanram tlafual chen turin Zion lawng lianah min han luhpui teh u le.

- Khualluna Pautu