Power-a intodelh kan sorkarin a tum dan hi

Power (kawlphetha) hi mitinin eng neih theihna a ni a, chu mi nei ṭha tura sawrkarna changtute hmalak dan erawh chuan sawisel a hlawh viau zel. Mizoram UT & State a nih hnua hmalak dan tlangpui en let ta ila.

Mizoram UT/ State sawrkar hnuaia power-a intodelh tura hmalakna hmasa ber chu Tlawng lui khuah ‘Bairabi HEP’ kha a ni. Khatih laia Mizoram CM Brig. T.Sailo Policy kha a ṭha. A chhan chu chuti zat MW Mizoram pual tur tih a awm ve lova, chuti chen company ta tur tih a ni ve lo bawk. Bairabi HEP MW 160-120 inkar pe chhuak thei tur kha a hnua MNF leh Congress sawrkar-te khan chhunzawmin tipuitling ta se tun dinhmuna Mizoram power lama hralh tur chenin a awm tawh ang.

Thil mak tak erawh chu hna ṭanna tur pawh ni lo investigation pawh tih a nih hmaa central Power Minister Ghiani Chowdhury-an Foundation Stone a hawng kha a ni awm e.

PC sawrkar khan Bairabi rel kawng kha a tipuitling hman a, duh se chuan Sairang pawh sial an ti hman ang, mahse cheng sawmhnih khat lek senga nitin vai sang rual lo lut tur kha an duh lo niin a rinawm. Tuna CM hian assimilation a vei pha lo niin a rin theih a ni. PC sawrkar khan Lengpui Airport pawh ruahmanna a siam nain engmah hmalakna nei hman lovin an tla ta a, tuna CM hian Silchar Airport pan reng aiin ṭha dawnin a hria a, a tipuitling ta mai chu ram hmasawnna ropui a tling a ni.

Congress sawrkar hmasa kum 10 chhung khan Mini-Hydel Project siam an uar hle a, sawrkar sum tam tak an hmang a, tam takin a hlawkna an tel a, an siam engemaw zat hluihlawn a ni tawh bawk. Heng Mini Hydel Project, MW hnih/ khat pawh pechhuak reng hleithei lo Kau-Tlabung, Tuipang lui, Serlui-A, Maicham, etc. te hian mipui hriat pawh a hlawh zo lo.

Tlema ziaawm deuh Serlui-B HEP kha MNF kum 10 sawrkar khan mawhphurhna la in hna an ṭan a, a engmah hmain cheng vaibelchhe 4-5 an chen ral hmasa a, a puitlinna tak chu tun Congress sawrkar hian an par chhuahpui a tih theih ang.

He mi hnuah Mizo­ram CM chu a phur thar ta em ni tih theihin lui engemaw zat khuap turin Company-te agree­ment a siampui ta a ni. Tun hnai maia hawn tur Tuirial HEP Mw 60 pe chhuak turah Mizoram chan ve tur chu MW 7 emaw a nih laiin a tuikhuah leh a vel reserve chu tiam chin awm lovin NEEPCO-in an nei hlen dawn nia hriat a ni. Tuivai MW 210, Chhimtuipui, etc. te pawh khuap vek mahse Mizoramin power lei lova hman tur mamawh khawp a nei mai lovang.

Tun hnaiah Sikkim chuan MW 800 vel pe­chhuak thei tur hawngin percent ṭha tawk an chan ve bakah kum 35 hnuah chuan an state sawrkar ta a ni tawh dawn a ni. Hengte ngaihtuah hian Mizoram Congress sawrkarin power-a intodelh tura HEP lama policy a hman mek hi ṭhangtharten thinur

ṭeuhin an la dem ngei a rinawm.

Bairabi HEP tih vel laia min awt ve em emtu Arunachal, Sikkim, etc. ten tam tak an hralh chhuak thei tawh a, Arunachal-ah chuan BPL-te a thlawnin eng pek vek an ni tawha sawi a ni.

- C. Chhuanliana, Bawngkawn