Ṭhalaite Mizoram tan
Mizoramah hian mipui mimir hian Kristianna aiin Politics-a kan ṭan lam kan thlang zawk a ang. Vai rama BDO pakhat awp khawm tham lek mipuite hi kan inthlau tial tial a. Mi hausate’n a ti ve thei lote an rah beh hun laia Zawlnei Amosa mirethei leh mi chanhaite aiawha a rawn din lai hun kha, tuna kan Zoram dinhmun nen hian a in an viau a rinawm. Mahse, kan ram hruaituteah hian Amosa ang kha kan la hmu lo.
Ngaihtuah chian a ngai : Mizo mipui mimir dinhmun a hniam em em laiin ṭhalaite kan harh chhuak thei mawlh si lo! Mizo ṭhalai tam zawk hi hawi zau vak lo, future ngaihtuah lo kan la ni. Lehkhathiam nia ngaihten kut hna thawh hi zahthlakah an ngai tih a ni leh zel bawk a, kan hmabak hi a eng lem lo khawp mai.
Ṭhangtharten tawrhchhel leh mal tlat ngam zir ila. Kan ram leh hnamin siamṭhat a mamawh em em laiin ṭhalaite a phawvuakah social networking site kaltlangin ram kan vei a. Buaipui tur dik ber state hmasawnna tur ngaihtuah chu kan hlat hle! Ṭhalai lehkhathiam hna hmu lo, mi beidawng kan pun zel chuan chuan he hnam hi a ding chhuak ngai lovang.
Ṭhalaite politics-ah : Kum 2018 ah khel lovin Mizoram chuan inthlanpui a hmachhawn leh dawn. Tun aṭangin political party te pawhin ṭan an khawh leh ṭan tawh a, policy an in duan ṭhat siak mek a ni. Chutihrualin Mizorama Political Party hruaitute duh khawp lo, mi hmingṭha nia ngaihten pawl an indin siak mek bawk. “Politics-ah full stop a awm lo” tih changchawiin Politician tam berte leh an ṭhat hun lai zawng zawng kalpel a, anmahni ruaituten, i chhawrtlak tawh lo ti-a, an chawlh hahdam tir tawhten, kan biak Pathian nung zahna nei map lovin Zofate min hmangaih leh ṭan mek lai hian, ṭhalaiten a kam aṭangin kan thlir reng dawn em ni? Inthlan a awmin Kohhran hrang hrangten inthlan thuchah a chhuah fo va, MPF-in thuchhuah an siam bawk ṭhin - mah se zawm erawh a hlawh ngai lem lo. Politics-a mahni hamṭhatna tur a nih dawn phawt chuan Pathian leh Kohhran, Zoram mipuite zah miah lovin, dawt pawh sawi mai duh ni vekin kan lang!
Corruption punlun chhan hi : Politics hi Party-a in hmang, pu chuam neiten an hlawkpui tur leh an khelh turah chauh kan ngai a. Corruption tipunluntu-ah ngaiin, ṭhalaite tel ve na tlakah kan ngaih loh vang leh ram politics veina chang kan hriat loh avangin kan nu leh pa, pi leh pute hi kan future ngaihtuah ve ranin, kan tan, Pathian nung dah ṭhain, Politics field-ah an zuanglut ni berin a lang. Chu chuan, eiru thei chinten zak miah lovin nuam a tawltir a, in leh lo ṭha pui pui an din a, lirthei an hung del dul a. Chung mite chu zaka siam taka ruangin, kan tlawn a ngaih phah a, ṭhianah kan siam a, an neih ei kan tum a, kan phesek hlawm ni berin a lang. Sum ngah na na na chu an lo pawk deuh nge nge a, pawl intodelh lo te te, a hminga thiltum eng eng emaw nei ve fir fer kan din a, sum kan mamawh a, sum tuak a harsa a, eiru te bawk kan belbul leh ṭhin.
Hei hian kan khawltlangah eiru te a ti ngampa a, a ti huangtau a, an thaw lian em em a, saipui kalin an kal nguk nguk tawh mai ṭhin a nih hi. Chumi dangchat tur chuan heng kan thil tih zawng zawng hi bansan a ngai a, eiru te sum awh loh ngam a ngai. An lirthei hman sak zung zung te, sum thawh tir fo te hi ching lo ngam ila kan ṭhatpui ang. A letling zawngin kan kal a, kan nuihzat turten min nuihzat let a, kohhran leh khawtlangah nihna ṭha pui pui kan vawn tir a, in thlahrunna chhete mah an nei lo. Hei hian hnamdang lakah kan society hmel a tibal a. Kan biak Pathian hmel an hmuh theih loh phah a. Kan ramin hma a sawn loh phah mai ni lovin, a hnungtawlh phah a ni. Ṭhalai vision nei lo, mi beidawng, depression nei tam tak a siam phah mek a nih hi.
A tawp berah chuan : Ṭhalaiten, kan ram politics virvel belchiang ila, hnam dingchhuak, ram hmasawn, mahni intodelh kan nih theih nan kum 2018 ah hian, ram hmasawnna duh, Mizo mipuite hmangaihtu, Pathian leh kan ram tan ti tak taktu an lo chhuah theih nan tun aṭangin kan ngaihtuahna hmang ṭan ila. Zoram nuam, kan tu leh fate thleng chenna tlaka siam tur hian nang leh kei bak hi an awm chuang lo tih rilru pu chungin ngaihtuah i seng teh ang u.
- Lalbiaklawma (Tebiaka)