Happiness Department i din ve ang u

Tuk khat chu kan sitting room-a ṭhu zal pahin eng eng emaw ka ngaihtuah a; consumer activist ka han inti ve ta ngawt te, kan chenna in Charity Lodge ka han ti ve ngawt maite chu atthlak ta riauvin ka hria a. Consumer-te hamṭhatna leh an dikna te, an zalenna te, an chanvo leh mawhphurhna han buaipui nafam chu tiin ka inthlahrung zui duh bik ta lo a ni.

Tichuan, ka bula sapṭawng chanchinbu ‘the Hindu’ May 20, 2017 ka han chhiar a. Chutah chuan India rama state lian ber zinga mi Madhya Pradesh sawrkarin Happiness Ministry a din thu a lo intar kulh mai a. Ka chepthla a, hun remchangah he thil behchhan hian article ziak ila ka ti a, ka rawn ziak ta a ni.

Mizoramah hian Happiness Ministry emaw Department hi din ni ve ta se, a ṭha viau lawng maw? Sawr­karah hian mipuiin beiseina thi mai thei lo kan nei a, chu kan beisei chu hmuh ngei pawh kan duh a ni. Madhya Pradesh sawr­kar tih dan ang deuh hian Happiness Index-te buatsaih ila. Mipui hnenah zawhna awlsam tak tak siam ila - Mipuite hi an hlim em? Sawrkar hmalaknaah an lawm tawk em? Mizoramah hian i thla a muang tawk em? I hlim lo a nih chuan engnge a chhan? Eng vang nge? Chhungkua in hlim em? i nun a ruak em? Tuna i dinhmunah hian i lungawi em?

Questionaire-te hi mipuiin an chhan dan a zirin roreltute pawhin hmalak dan tur an hre thei dawn a ni. Kan ramah hian mithiam tak tak kan nei a, tuna kan ram awmdante hi kan khawpkham lo a nih chuan tihdan ṭha zawk pawh zawna hmuhchhuah theih a harsa lovang. Hetia han ngaihtuah thuak hi chuan kan hlim tlang viau alawm maw le, a tih theih a. State hlim ber pawl pawh kan la ni maithei. State ralmuang ber kan intih lai hian mipui, van­tlang leh mimal hi kan lo hlim viau lo thei bawk.

Mi tam tak chuan mipui hlimna hi a theih tak tak loh, hun rei lote chhung atan chauh a ni, rilru lam a ni an ti ṭhin. Mahse hlimna hi a tak tak a lo thleng thei a ni a, mihringin a duh ang a neih chuan a hlim ṭhin. Hmasawnnain a tum ber pawh khua leh tuite hlimna a ni. Khua leh tuiten kan chanvo kan chan hi chuan kan hlim ṭhin.

Ram hlim dan tehfungah India ram hi 122-na daih a ni, hei hi World Happiness Report for 2017 in a tarlan dan a ni. United Nations-in 2016-a report a pekah chuan India aia ram hlim zawk 117 zet an awm!

State chhunga mipui­te an lo hlim vak lova, an thlamuang tawk lo a nih chuan engtin­nge ni ang tih chu he Ministry hna tur chu a ni.

- Fakawma Khawlhring