KAN RETHEIH CHHAN, COVID VANG A LO NI LO LEH ZAWK

Khati taka hripuiin min nuai kha chu, kan zavaiin kan bet rawk rawk mai a, sorkar lah a che phelh phengphung mai a, sum hmanna lah a tam, kan rethei dawn mange, tiin mipui pawh kan thla a phang a. Chutichuan kan lo rethei ta ngei a, a chhan pawh covid-19 vang a ni e, kan ti ta hmiah hmiah mai a, sum harsat thu sawi hlek chuan, covid-19 kha tanchhanah kan hmang tlat a. Mahse a lo ni miah lo nia mawle.

DR. VANLALTHLANA, MLA THUSAWI: Social media hi a chak pur pur khawp a. Hmun kil khawra mi thusawi pawh, khum laizawlah chhing diar diarin kan lo ngaithla thei zel a. Dr. Vanlalthlana MLA in ZPM party chhung inkhawma a thusawite pawh kan lo ngaithla ve kar mai a.

Sorkarin Covid hripui do nan a sum an sen, Mizoram budget bik chauh atang chuan a lo tlem em emzia a rawn sawi chhuak ta.

Covid hri len tantirh kum 2020-2021 khan kan budget atangin zaah pawisa sawmthum chauh(0.30%) an lo hmang alawm mawle. Kum 2021-2022 hri hluar lai ber pawh khan Sorkar budget atang chuan, zaah pawisa sawmruk leh pali (0.64%) lek an lo hmang zuk nia, zaah Rs. 1 pawh an hmang tling lo. A source hi Assembly zawhna an chhanna atangin a ni lehnghal. Chhanna dik lo an pek chu a rinawm lo.

Kan retheih chhan a rawn sawi zawm leh nghal. Airport siam nana kan pawisa hman chu, sorkar department 30 dawnin an bugdet-a an neih phak loh a nih thu te. PWD ah ringawt hian, budget siam sa atanga hman khumna, zaah sawmnga leh pariat(58%) a tlin thute, chu chu sorkar tirh kuma an hman a ni. A kum hnihnaah chuan, PWD a an mamawh belh chu zaah sawmriat leh paruk(86%) a ni hem mai le.

A sawi zelnaah chuan, inthlan hmaa thusawi, central atanga sum hman theih, North East te insem tur a chuang a liam awm thei anga sawite kha, khawiah mah hian a awm lo. Kan sorkar hian an sorkar tirha an sum puk tur ruahman chu zaah pahnih point paruk (2.6%) an ruahman a, kum a tawp meuh chuan zaah pariat point pathum pali (8.34%) ah a pung ta awlh mai. Kum 2020-2021 ah khan zaa pakhat point paruk paruk(1.66%) in ip ang an ti a, kum a tawp meuh chuan, zaa paruk point pariat pasarih(6.87%) kan puk leh ta awlh mai. Kum 2021-2022 ah chuan zaa pahnih point pakhat pali (2.14%) puk turin an ruahnam a, kum a tawp meuh chuan 5.20% an puk leh ta daih mai. Tunah hian 2022-2023 kan budget kal lai mek ah, 3% kan puk dawn an ti a, thla thum chauh kan la kal a, kumin chhunga kan puk tur aia tam daih April-June ah lek hian kan puk tawh. Hei hi sum enkawl thiam zia a ni em? Mi thiam economist-ten state sum puk an thlirna atanga, a va tam em an tih, an chek tlawk tlawk dinhmunah Mizoram hi kan awm mek.

Revenue(hman rala zo mai chi) leh Capital(hman atanga lo let leh awm) a kan sum hmanna pawh, kan hna thawh tur kan buaipui velna ringawta kan hman ral tawp, 4% a tling a. Tin, state in anmahni vek atanga sum an dawn let hi, a thlawn tawpa sem a awm thin a. Kan sorkar hian chu pawh chu 43% a thlawna sem a tum a. Mi thiamten thawh chuah mila sem ni rawh se an tih mawlh mawlh laiin, state dangte aiin kan sorkar chuan an pe sang ta duai mai, a pe sang ber Punjab dawttu kan ni pha daih maite hi, state pachhe tak nih laia SEDP board 14 lai kan din hluai te, thawk mang lo board suma kan vurh hluai maite kan hmuh hian, sorkar muhil der hi koh eih kan tum a, an beng bulah music tum thiam an awm tlat bawk si a, koh eih an har a ni" a ti.

JEREMY-A LAWMPUINA KAN PE VE DAWN EM: CSS sum kan lo kawl rauh rauh, Pu Modia-te'n pe chhuak vat rawh u, an tih thut si avanga kan pek chhuah huk tak avanga pocket a gorom loh lai takin, Mizo tlangval hmel tha leh fel, rit chawi chak Gold Medalist, ropui taka kan lo hmuah tuma, mi state ten Gold medalist chu Cheng nuai 40 te pek an tum laiin, keini chuan thingpui inpui leh Medal fawh sak mai maiin kan tlingtla mai ang tih hlau vin, social media lamah kan fiamthu a sang thei khawp mai a. Kan pu berin Jeremy-a hnenah sorkar mamawh a thlen, ti tein kan fiamthu hluai lai hian, suma lawmpuina kan pe thei lo a nih pawhin, kawng dang a awm em em ang.

Kan lo hriat danin Jeremy-a te hian in pawh la nei ve lovin, sorkar Quarters an la luah reng a ni awm a, Sport lama kan chhuanvawr mi hmasate kha, in hmunte pe in, a sakna daih pawisa te pawh khan kan vawm kha a ni a. Jeremy-a te pawh hian an sawi chhuak hauh lo anga, mahse an mamawh in hmun emaw talte chu, pawisa pek tur kan nei lo a nih pawhin, kan thuneihna in a tih theih, sorkar sum hek si lo va tih theih hi chu kan nei tih hi, mipuiten kan hriatpui ve a nia.

- Lalrinliana Colney