Lakhuihthei hralhna a awm lo!
August thla kan chuang kai leh ta der mai a, Mizoram hmun hrang hrangah a bikin lakhuihthei hralh a hun chho ta ṭan leh mek a ni. Hmanni pawh khan Sialhawk lakhuihthei hmin pickup motor ah an rawn phur ṭeuh a, khaw chhe hnuaia lo kal an nih avangin an in hralh hleithei si lo a, engemaw zat chu hralh zo thei loin an ti chhe nghe nghe a ni.
Thlai dang pawh a vanglai a han nih chhoh ve hi chuan phai lam aṭanga thlai lo lut ve reng tho bawk nen a hralhna lamah kan buai fo mai a, hei hi mipui hma ngaitu sorkar tan chuan engtia chin fel chi nge ni ang tih ngaihtuah a ṭha khawp mai.
Thlai chingtute hi an khawngaih thlak a ni, a sur a sa hnuaiah kut hna thawh an ban san thei si lo a, theihtawpin an thawk ve a. Chutah hralh a hun ta cheng a, a hralhna tlawm si a, hah man a awm lo a, ṭhenkhat phei chuan hralhna tur an hre lo fo bawk nen, an lainatawm ṭhin khawp mai.
Lakhuihthei pawh hi Sialhawkah te chuan kg ah Rs 10/ 12 velten an lei sak a. A kharchhawngtu lam hian khawpui lamah to deuhin an han zuar chhawng ve leh a, kg ah Rs 10 vela an lei kha kg 2 pum ang vel hi Rs. 70 te an han ti daih a, thlai thartute aiin a khar chhawngtute hi an hlawk zawk daih ṭhin.
A hralhtu a chingtu ngeite hian an pe to thei lo tlangpui a, lo kharchhawngtute hian an ti to leh em em a, mi nawlpuiin kan lei ngamna tur hian zuar thei se chu heng lakhuhthei, dragon fruit, dawnfawh etc hi hralh theih loh vanga tih chhiat a awm lo deuh bawk ngei ang.
A pawimawh ber pakhat chu Mizorama kan thlai neih ang angte a thar vanglai chuan phai aṭanga thlai kan lakluhte hi sorkar hian titawp rih ngam se, tichuan awlsam tein Mizorama kuthnathawkute nasa takin kan pui a ni ang.
Sum leh paiah leh thil dangah kan ṭanpui theih loh pawhin phai lam aṭanga an thlai thar ang lo lut ve tur kan dan chah lailawk hian nasa takin Mizoram thar chhuah hralh a kal dawn tih a lang reng mai.
Hetiang thil tih awlsam lutuk pawh kan sorkarin a chingfel mai thei ṭhin lo lai hi hriatthiam a har ṭhin ngawt mai. Kuthnathawktute hi mangangin retheih takin awm reng hlawm se, inthlan dawnah vote leina sum it ngawih ngawihin awm se suma lei zel an tum emaw tih mai pawh thil ngaihtuah tham tak a ni.
Thil awmze nei lo thlai thar rate te an han siam vel a, bawhzui ngaihna awm si loin a thu chiahin hna an thawk vel kha kuthnathawktute ngaihtuah anga lan tumna, lemchanna te pawh a ang zawk hial a ni.
Kuthnathawktute hi an hah ang phu tawkin hlawkna hmu se, chutiang tur chuan sorkar hian hma la vat rawh se.
- Lal Pekhlua