ZORAM ZAM NAN EXODUS MOVEMENT

Kum 1986 khan ka nupui Rev. Dr. R.L. Hnuni chuan Eastern Thelogical College, Jorhat, a kan chenna quarters hnung lamah huan a siam a, maian zamna a siam a. “Maian zamna hi min lo siampui teh” tiin min au va. “Mizoram zamna ka siam mek, ka hman lo,” tiin ka chhang a. Mizoramah Social Crusade nei turin kan inbuatsaih a. Tichuan, ‘I ram lo thleng rawh se’ tih thupuia hmangin Vanpa Hall-ah crusade kan nei a. He crusade atana kan senso zawng zawng hi EZE Germany-in min tum sak nghe nghe a ni. ‘I Ram lo thleng rawh Se’ tih lehkhabu chu Upa Dr. C.Darlawma (L) chuan min chhuahsak nghe nghe a.

Kha lai hun aṭang khan Mizoramah hian a theih ang chen chen Pathian Ram kan thlentir tur a ni tiin, Mizoram zamna tur ngaihtuah hi ka bang lo. Mizoram tihhmasawnna atan Association of Social Economic Development (NGO) kan din a, EZE Germany aṭangin fund pawh min pek an tum a, registration pawh kan tifel vek a, mahse Melbourne, Australia-ah Doctor of Theology zir turin kan kalsan leh ta si a, a tak a chang thei ta lova. Australia aṭanga ka lo kirin Eastern Theological College-ah kan zirtir chhunzawm a, Tribal Study Centre dinin Tribal Theology kan develop a, Tribal Theology chu Senate of Serampore Curriculum-a telh niin khatih hun aṭang contextual theology-a subject-ah telhin tun thlengin BD zirna branch pawimawh tak a ni zel a. Baptist Kohhran hruaitu atana min thlan ve avangin kum 1998-ah khan Mizoramah ka lo chhuak a. Education lamah theihtawp chhuahin Zonunmawi Movement kan buaipui leh a. Tunah ka lo pension hnu hian World Class Education siam tumin School ka din a, tichuan Zoram hruai chhuak turin Exodus Movement hi kan buaipui ta a ni.

Exodus Movement kan han tihna chhan leh ṭobul chu Pathianin Israel fate Mosia hmanga Aigupta ram aṭanga sal ata a hruai chhuah kha kan biblical leh theological innghahchhan a ni. Pathianin Pharaoh hnenah Mosia a tir a, Aigupta ram ata Jehova chibai an buka a rawng an bawl theih nan Aigupta aṭangin chhuahtir turin a hrilh a ni, “Lalpa Hebraite Pathianin, ka mite hian thlalerah ka rawng an bawl theihna turin chhuahtir rawh”, tiin (Exod. 9:1, 3:9, 10, 7:16, 8:1). Mizoram hi sal chi hrang hrang hnuaiah a tang mek a, Pathian chibai kan buka a rawng dik taka kan bawl theihna turin heng sal tanna aṭangte hian hruai chhuah kan ngai a ni. A chhan tam taka awm zingah a hnuai ami hi ka han tarlang duh a.

Zoram hruai chhuah (exodus) a ṭulna chu:

1. Education hi politics aṭangin hruai chhuah a ṭul. Diustrict council hun aṭangin education hi politics khel nan kan hman a, tunah chuan sawrkar school chu kalna tlak lovah kan siam a, tunah hian politic aṭanga kan hruai chhuah a ṭul a ni.

2. A thlawna sem leh dawn nun (subsidy culture) aṭangin Mizoram mipuite kan hruai chhuah a ṭul.

3. Development hi politics aṭanga kan hruai chhuah a ṭul. Deve­lopment pawh hi UT kan nih aṭang khan politics khelh nan kan hmang a, a zual zel a. Chuvangin, Development hi politics aṭangin hruai chhuah a ṭul a ni. Politics aṭanga hruai chhuah a nih loh chuan kan ram hi engtikah mah developed state kan ni dawn lo.

4. Politics hi party politics aṭangin kan hruai chhuah a ṭul. Party sawrkar siam ṭhin hi bansan a, huap zo sawrkar siam tur politics buaipui a hun ta.

5. Corruption aṭangin kan hnam leh sawrkar hi kan hruai chhuah a ṭul. Third world/ developing countries hmansawnna daltu lian ber pakhat chu corruption hi a ni. Hei hi kan ramah development daltu a nih lo nan theihtawp kan chhuah a ṭul a ni.

6. Hei le, Zoram zâmna tur chu: Zoram hi hmasawn kawngah ke kan pen ve dawn a nih chuan thil kan tih ngei ngei tur a awm:

1. Sawrkar zamna tur: Thim ata enga min hruai luttu chu Isua Krista Chanchin Ṭha hi a ni. Chuvangin, kan ram sawrkar chu Pathian mite kaihhruai, Pathian thua innghat, Pathian rorelna a ni tur a ni. “I ram lo thleng rawh se,... I duhzawng tih ni rawh se” (Thy Kingdom come, thy will be done) tia kan ṭawngṭai angin. Pathian rorelna sawrkar chu sawrkar

ṭha, lang tlang, mipui sawrkar, party sawrkar ni lo huap zo sawrkar a ni tur a ni. Chuvangin, sawrkar ṭha siam turin ke kan pen a ṭul a ni.

(1) Corruption awm lohna, lang tlang sawrkar siam: Third world/ develo­ping countries hmansawnna daltu lian ber pakhat chu corruption hi a ni a. Hei hi kan ramah development daltu a nih lo nan theihtawp kan chhuah a tul a ni. Zofate hi kan hnam nunphungah mi corrupt hnam kan ni lo, corruption hi Vai PWD hnathawkte aṭanga kan zir a ni. Chuvangin, Vai leh Mizo inkara inbumna hi corruption-ah kan ngai lo a ni mai thei. Hei hi a lanna chu vawiin thlengin Kohhranah hian corruption hi a awm lo tih theih a ni. Chuvangin, sawrkara corruption pawh hi nasa taka tihnep theih a ni. Corruption ti

ṭhinte hi ram leh hnam hmelma an ni tih hi mipuite kan zirtir tur a ni.

(2) Efficient management: Kan sum hmuh ang ang hi efficient takin hmang thei ila chuan tun ai chuan nasa takin hma kan sawn ngei ang. Hei hi Secretary level-a hun rei tak Mizoram sawrkara thawkte sawi dan a ni.

(3) Innovative sawrkar: Hun danglam zelah harsatna chi hrang hrang a lo thleng ṭhin a, kan mamawh pawh a danglam ṭhin. Chungah chuan tihdan tur ṭha leh dik kan dap chhuah zel a pawimawh. Chu chu kan thiam loh chuan sawrkar ṭha kan nei thei lovang.

(4) Corporate leadership: Mipui rorelna sawrkar (democratic system)-ah hian Constitution lalna (Constitutional democracy), mimal lalna (Autocratic demo­cracy) leh Committee lalna (Corpo­rate democracy) hi kan buk a ṭul a. State dang dinhmun thlirin Chief Minister chak leh lal tak kan duh ta viau mai niin a lang. Mahse Mizoram pawl nghelnghet leh chak ber chu Presbyterian Synod hi a ni a. Hetah hian a lal ber chu Committee a ni; committee lalna sawrkar hi kan mamawh zawk a ni mai thei. Chuvangin, Exodus Movement chuan kan ram rorelna venpui turin Val-upa committee a din ta a ni.

2. Education zamna tur : Education hi mawlna aṭanga min hruai chhuaktu, finna leh thiamna min petu a ni a, kan hnam innghahna leh hmaswn nana pawimawh em em a ni. Chuvangin, education hi politics aṭanga kan chhanchhuah a ṭul a ni.

(1) Required knowledge and skill: Education kan sawi hian hman lai mission education kha kan sawimawi (idealized) fo ṭhin a, a dikna chen pawh a awm a. He hi hria ila, tunlai naupang hriat tur leh thiam tur hi a sang ta hle a ni. Rualban kan duh chuan nasa takin zirna kal phung hi kan siam ṭhat a ṭul a ni.

(2) Non-political education committee: District Council hun aṭanga vawiin thlenin Mizoram educationah hian nasa takin politics a inrawlh ṭhin a, hei hian nasa takin school education a tichhia a, hei hi bansan a ṭul.

(3) Education service: Education hi mihring butsaihna (human resources development) bulpui ber a nih avangin a service-ah hian mihring quality ṭha, thiam, inpe leh taima a mamawh avangin education service hi en ṭhat tur a ni. B.Ed degree neih, written exam leh interview a ti ṭha ringawt hian harsatna a su kiang lo.

(4) Non-Political Education Committee: Education enkawl tur hian party based, politically elected te hi an ṭha tawk lo. Village - District - State level-ah education enkawl tur hian Non-Political committee neih vek a ṭul a ni.

3. Economic zamna tur : Khawvel buaipui ber chu economic development hi a ni. Ram hmasawnna tehfung pawimawh tak a ni. Chutih rualin UT kan nih aṭangin development hi politic khel nan kan hmang a, hetiang a nih chuan Mizoram chu developed state a ni dawn reng reng lo. Chuvangin, kan tih dan hi kan thlak hlauh a ṭul a ni.

(1) Overcoming poverty and depen­dency: Retheihna avanga chawm hlawm state nih reng mai hi a zahthlakin a hrehawm a, chuvangin he dinhmun hi chhuahsana state intodelh leh hausa ni ve tura hmalak hi tih makmawh a ni.

(2) Restructuring development approach: State intodelh leh hausa ni ve tura hma kan la ve dawn a nih chuan tuna kan tih dan hi bansana development kan kalpui dan (system) hi re-structured vek a ṭul. Kan duh emaw duh lo emaw economic liberalization leh globalization hian min rawn chim ta a. He mi mil hian central sawrkar chu a insiam rem mek zel a, chutiang bawkin Mizoram pawh kan siam rem a ṭul. Development hi politic khelh nana kan hmang zel a nih chuan education kan tih chhiat tawh ang bawk hian development lama hmalakna pawh kan tichhe (paralyzed) dawn a ni. Chuvangin, Non-Political Economic Development Board - State, District leh Village level-ah kan neih vek a ṭul. Chu chuan planning leh monitoring-ah mawh a phur ang.

(3) Development Bank: Second World War hnuah Europe din thar leh turin World Bank leh IMF te din a ni ang bawkin Zoram hmasawnna tura hmalakna atan Development Bank siam a ni ang. Industrial culture pian hma leh policy mumal pawh neih hmaa sum hmuh nana Industrial Corporation kan siam ve ngawt a, Industry lama hma lakna zawng zawng 90% a hlawhchham ang ni lovin. Development Bank aṭang hian development project hrang hrang kan finance ve tawh dawn a ni.

Mizoram hruai chhuaka ram tiam (promised land) hruai lut turin ‘Mizoram Exodus Movement’ a lo piang ta. Pathianin Mosia a tir ang khan keini pawh min tir a ni.

- Rev. Dr. K. Thanzauva